ಫಿಲ್ಮ್ಡೆಸ್ಕ್: ಕೆಜಿಎಫ್, ತ್ರಿಬಲ್ ಆರ್ ಸಿನಿಮಾಗಳು ಬಾಲಿವುಡ್ ಬಾಕ್ಸ್ ಆಫೀಸ್ ಮೇಲೆ ಸವಾರಿ ಮಾಡೋ ಮೂಲಕ ಎಲ್ಲರ ಹುಬ್ಬೇರಿಸಿದ್ದವು. ಇದೀಗ ಮಗದೊಮ್ಮೆ ನಮ್ಮ ಸೌತ್ ಸೂಪರ್ ಸ್ಟಾರ್ಗಳ ಪ್ಯಾನ್ ಇಂಡಿಯಾ ಮೂವೀಸ್ ಬಿಟೌನ್ ಮೇಲೆ ಸರ್ಜಿಕಲ್ ಸ್ಟ್ರೈಕ್ ಮಾಡೋ ಮುನ್ಸೂಚನೆ ನೀಡಿವೆ. ಬಾಲಿವುಡ್ ಬಾಕ್ಸ್ ಆಫೀಸ್ಗೆ ಬರ ಬಂದಿದ್ದು, ಈ ವರ್ಷ ಬಿಗ್ ಸ್ಟಾರ್ಸ್ ಬಿಗ್ ಮೂವೀಸ್ ಎಲ್ಲಾ ಮಕಾಡೆ ಮಲಗಿವೆ. ಈ ಕುರಿತ ಇಂಟರೆಸ್ಟಿಂಗ್ ಸ್ಟೋರಿ ಇಲ್ಲಿದೆ.
ಯೆಸ್.. ಕೊರೋನಾ ಸಮಯದಿಂದ ಬಾಲಿವುಡ್ ಸಿನಿದುನಿಯಾದ ಸಕ್ಸಸ್ ರೇಟ್ ನೋಡಿದ್ರೆ ಪಾತಾಳಕ್ಕೆ ಇಳಿದಿದೆ. ಅದ್ರಲ್ಲೂ ಸೌತ್ ಸಿನಿಮಾಗಳ ಅಬ್ಬರ, ಆರ್ಭಟಕ್ಕೆ ಅಕ್ಷರಶಃ ಹಿಂದಿ ಮಂದಿ ಬೆಚ್ಚಿಬಿದ್ದರು. ಅಷ್ಟರ ಮಟ್ಟಿಗೆ ಮೇಕಿಂಗ್ ಹಾಗೂ ಕಂಟೆಂಟ್ನಿಂದ ನಮ್ಮ ದಕ್ಷಿಣ ಭಾರತದ ಚಿತ್ರಗಳು ಬಾಲಿವುಡ್ಗೆ ಎಫೆಕ್ಟ್ ನೀಡಿದ್ವು. ಕೆಜಿಎಫ್ ಚಾಪ್ಟರ್-2, ಕಾಂತಾರ, ರಾಜಮೌಳಿಯ ತ್ರಿಬಲ್ ಆರ್ ಚಿತ್ರಗಳಂತೂ ಗುಡಿಸಿ ಗುಂಡಾಂತರ ಮಾಡಿಬಿಟ್ಟವು.
ಕಳೆದ ವರ್ಷ ಹಿಂದಿ ಚಿತ್ರರಂಗದ ಅಷ್ಟೋ ಇಷ್ಟೋ ಮಾನ ಕಾಪಾಡಿದ ಚಿತ್ರಗಳು ಅಂದ್ರೆ ಶಾರೂಖ್ ಖಾನ್ರ ಪಠಾಣ್ ಹಾಗೂ ಜವಾನ್. ಹೌದು.. ಇವೆರಡೂ ಸಿನಿಮಾಗಳು ಸಾವಿರ ಕೋಟಿ ಕ್ಲಬ್ ಸೇರೋ ಮೂಲಕ ಕಂಗಾಲಾಗಿದ್ದ ಇಂಡಸ್ಟ್ರಿಗೆ ಬೂಸ್ಟರ್ ಡೋಸ್ ನೀಡಿದವು. ರಣ್ಬೀರ್ ಕಪೂರ್ರ ಅನಿಮಲ್ ಕೂಡ ಅದಕ್ಕೆ ಸಾಥ್ ನೀಡಿತ್ತು. ಆದ್ರೆ ಈ ವರ್ಷ ಶುರುವಾಗಿ ನಾಲ್ಕು ತಿಂಗಳು ಕಳೆಯುತ್ತಾ ಬಂದ್ರೂ, ಬಾಲಿವುಡ್ನಲ್ಲಿ ಹೇಳಿಕೊಳ್ಳೋ ಅಂತಹ ಚೇತರಿಕೆ ಕಂಡಿಲ್ಲ.
ಹೃತಿಕ್ ರೋಷನ್ರ ಫೈಟರ್, ಅಕ್ಷಯ್ ಕುಮಾರ್- ಟೈಗರ್ ಶ್ರಾಫ್ ಜುಗಲ್ಬಂದಿಯ ಬಡೇಮಿಯಾ ಚೋಟೆಮಿಯಾ, ಅಜಯ್ ದೇವಗನ್ರ ಮೈದಾನ್, ಸಿದ್ದಾರ್ಥ್ ಮಲ್ಹೋತ್ರ ಅಭಿನಯದ ಯೋಧ ಹೀಗೆ ದೊಡ್ಡ ದೊಡ್ಡ ಸೂಪರ್ ಸ್ಟಾರ್ಗಳ ಬಹುನಿರೀಕ್ಷಿತ ಚಿತ್ರಗಳೇ ಬಾಕ್ಸ್ ಆಫೀಸ್ನಲ್ಲಿ ನೆಲಕಚ್ಚಿದವು. ಶೈತಾನ್, ಕ್ರ್ಯೂವ್, ಆರ್ಟಿಕಲ್ 370 ಚಿತ್ರಗಳಿಂದ 450 ಕೋಟಿ ಕಲೆಕ್ಷನ್ ಆಗಿದೆ ಅನ್ನೋದು ಬಿಟ್ರೆ ಬಿಗ್ ಸ್ಟಾರ್ಗಳು ನಿರೀಕ್ಷೆಗಳನ್ನ ಹುಸಿಯಾಗಿಸಿದ್ದಾರೆ.
ಇದನ್ನೂ ಓದಿ: ಬೆಂಗಳೂರಿನಲ್ಲಿ ನಟ ಪ್ರಿನ್ಸ್ ಮಹೇಶ್ ಬಾಬು ಒಡೆತನದ ಮಲ್ಟಿಪ್ಲೆಕ್ಸ್ ಓಪನ್
ಇದನ್ನೆಲ್ಲಾ ನೋಡ್ತಿದ್ರೆ ನಮ್ಮ ಸೌತ್ ಸಿನಿಮಾಗಳು ಮಗದೊಮ್ಮೆ ಬಾಲಿವುಡ್ ಬಾಕ್ಸ್ ಆಫೀಸ್ ಮೇಲೆ ಸವಾರಿ ಮಾಡೋ ಸೂಚನೆ ಕೊಟ್ಟಿವೆ. ಈ ವರ್ಷ ತೆಲುಗು, ತಮಿಳು ಹಾಗೂ ಕನ್ನಡದಿಂದ ಐದಾರು ಬಿಗ್ ಬಜೆಟ್ನ ವೆರೈಟಿ ಜಾನರ್ ಸಿನಿಮಾಗಳು ಬೆಳ್ಳಿಪರದೆ ಬೆಳಗೋಕೆ ತಯಾರಾಗ್ತಿವೆ. ಇದನ್ನ ಸರ್ಜಿಕಲ್ ಸ್ಟ್ರೈಕ್ 2.O ಅದ್ರೂ ತಪ್ಪಾಗಲ್ಲ. ಅಷ್ಟರ ಮಟ್ಟಿಗೆ ಹೈಪ್ ಕ್ರಿಯೇಟ್ ಮಾಡಿವೆ ರಿಲೀಸ್ಗೆ ಸಜ್ಜಾಗ್ತಿರೋ ಸೌತ್ ಸೂಪರ್ ಸ್ಟಾರ್ಸ್ ಸಿನಿಮಾಗಳು.
ಆ ಪೈಕಿ ಕಮಲ್ ಹಾಸನ್ ಹಾಗೂ ಡೈರೆಕ್ಟರ್ ಶಂಕರ್ ಕಾಂಬಿನೇಷನ್ನ ಇಂಡಿಯನ್-2 ಇದೇ ಜೂನ್ 13ಕ್ಕೆ ರಿಲೀಸ್ ಆಗ್ತಿದೆ. ಭ್ರಷ್ಟಾಚಾರದ ವಿರುದ್ದ ಮತ್ತೊಮ್ಮೆ ಗುಡುಗಲಿರೋ ಕಮಲ್ರ ಈ ಚಿತ್ರಕ್ಕಾಗಿ ಬರೋಬ್ಬರಿ 250 ಕೋಟಿ ಬಂಡವಾಳ ಹೂಡಿದ್ದಾರೆ ನಿರ್ಮಾಪಕರು. ಇನ್ನು ಅಲ್ಲು ಅರ್ಜುನ್ರ ಪುಷ್ಪ ಸೀಕ್ವೆಲ್ ಆಗಸ್ಟ್ 15ಕ್ಕೆ ತೆರೆಗಪ್ಪಳಿಸಲಿದ್ದು, 500 ಕೋಟಿ ಬಜೆಟ್ನಲ್ಲಿ ಸಾವಿರಾರು ಕೋಟಿ ಲೂಟಿ ಮಾಡೋ ಲಕ್ಷಣ ತೋರಿದೆ.
ಜೂನಿಯರ್ ಎನ್ಟಿಆರ್ ನಟನೆಯ ದೇವರ ಚಿತ್ರದ ಮೊದಲ ಭಾಗ ಅಕ್ಟೋಬರ್ 10ಕ್ಕೆ ರಿಲೀಸ್ ಆಗ್ತಿದ್ದು, 300 ಕೋಟಿ ಬಿಗ್ ಬಜೆಟ್ನ ಈ ಚಿತ್ರ ಅತೀವ ನಿರೀಕ್ಷೆ ಮೂಡಿಸಿದೆ. ಪ್ರಭಾಸ್, ಬಿಗ್ಬಿ, ಕಮಲ್ ಹಾಸನ್ ಕಾಂಬೋನ ಕಲ್ಕಿ ಸಿನಿಮಾ 600 ಕೋಟಿಯಲ್ಲಿ ತಯಾರಾಗಿದ್ದು, ಆಂಧ್ರ ಎಲೆಕ್ಷನ್ಸ್ ಮುಗೀತಾ ಇದ್ದಂತೆ ರಿಲೀಸ್ ಡೇಟ್ ಅನೌನ್ಸ್ ಮಾಡಲಿದೆ. ರಾಮ್ ಚರಣ್ರ ಗೇಮ್ ಚೇಂಜರ್ ಕೂಡ 400 ಕೋಟಿ ಬೃಹತ್ ಮೊತ್ತದಲ್ಲಿ ತಯಾರಾಗಿದ್ದು, ಪ್ರೇಕ್ಷಕರನ್ನ ಕಾತುರಗೊಳಿಸಿದೆ.
ಇನ್ನು ನಮ್ಮ ಕನ್ನಡದ ಮಾರ್ಟಿನ್ ಸಿನಿಮಾ ಕೂಡ ಟೀಸರ್ನಿಂದ ಪ್ಯಾನ್ ಇಂಡಿಯಾ ಪ್ರೇಕ್ಷಕರ ಗಮನ ಸೆಳೆದಿದೆ. 125 ಕೋಟಿ ವೆಚ್ಚದ ಧ್ರುವ ಸರ್ಜಾ ನಟನೆಯ ಮಾರ್ಟಿನ್ ಬಾಕ್ಸ್ ಆಫೀಸ್ನಲ್ಲಿ ಮ್ಯಾಜಿಕ್ ಮಾಡೋದು ಕನ್ಫರ್ಮ್. ಒಟ್ಟಾರೆ ಸೌತ್ನ ಈ ಎಲ್ಲಾ ಚಿತ್ರಗಳು ಹಿಂದಿ ಚಿತ್ರರಂಗವನ್ನು ಮತ್ತಷ್ಟು ಮಂಕಾಗಿಸಲಿದ್ದು, ಮತ್ತೆ ಪುಟಿದೇಳೋಕೆ ಬಿಟೌನ್ ಮಾಡ್ತಿರೋ ರಿವರ್ಸ್ ಆಪರೇಷನ್ನ ಕಾದು ನೋಡಬೇಕಿದೆ.
ಲಕ್ಷ್ಮೀನಾರಾಯಣ್ ಬಿ.ಎಸ್, ಫಿಲ್ಮ್ ಬ್ಯೂರೋ ಹೆಡ್, ಪವರ್ ಟಿವಿ
