ಬೆಂಗಳೂರು : ಬಸ್ಗಳಲ್ಲಿ ಪಕ್ಷಿಗಳಿಗೆ ಅವಕಾಶ ಇಲ್ಲ ಎಂದ ಕಂಡಕ್ಟರ್. ಪಕ್ಷಿಗಳಿಲ್ಲದೆ ನಾವು ಊರಿಗೆ ಹೋಗಲ್ಲ ಎಂದು ಪಟ್ಟು ಹಿಡಿದ ಮೊಮ್ಮಗಳು. ಶತಾಯಗತಾಯ ಕೊನೆಗೆ ಲವ್ ಬರ್ಡ್ಸ್ಗೆ ಪೂರ್ಣ ಟಿಕೆಟ್ ನೀಡಿ ಊರಿನತ್ತ ಪ್ರಯಾಣ ಬೆಳೆಸಿದ ಅಜ್ಜಿ ಮತ್ತು ಮೊಮ್ಮಗಳು.
ಬೆಂಗಳೂರಿನಿಂದ ಮೈಸೂರಿಗೆ ಹೊರಟಿದ್ದ ಕೆಎಸ್ಆರ್ಟಿಸಿ ಬಸ್ನಲ್ಲಿ ಈ ಅಪರೂಪದ ಘಟನೆ ನಡೆದಿದೆ. ನಾಲ್ಕು ಲವ್ ಬರ್ಡ್ಸ್ಗಳಿಗೆ ಕಂಡಕ್ಟರ್ ಹರಿದಿದ್ದು ಬರೋಬ್ಬರಿ 444 ರೂ. ಟಿಕೆಟ್!
ಬೆಳಗ್ಗೆ 8.20ರ ಸುಮಾರಿಗೆ ಬೆಂಗಳೂರಿನಿಂದ ಮೈಸೂರು ಹೊರಟ್ಟಿದ್ದ ಕೆಎಸ್ಆರ್ಟಿಸಿ ಬಸ್ನಲ್ಲಿ ಅಜ್ಜಿ ಮೊಮ್ಮಗಳು ಕುಳಿತಿದ್ದರು. ಕಂಡಕ್ಟರ್ ಬಂದೊಡನೆ ಆಧಾರ್ ಕಾರ್ಡ್ ತೋರಿಸಿ, ಇಬ್ಬರೂ ಫ್ರೀ ಟಿಕೆಟ್ ಪಡೆದಿದ್ದರು. ಆದರೆ, ಮೊಮ್ಮಗಳ ಕೈಯಲ್ಲಿದ್ದ ನಾಲ್ಕು ಲವ್ ಬರ್ಡ್ಸ್ ಗಮನಿಸಿದ ಕಂಡಕ್ಟರ್ 444 ರೂ. ಟಿಕೆಟ್ ಹರಿದಿದ್ದಾರೆ.
ಒಂದು ಪಕ್ಷಿಗೆ ತಲಾ 111 ರೂ.
ಟಿಕೆಟ್ ನೋಡಿ ಅಜ್ಜಿ ಒಮ್ಮೆಲೆ ಕಕ್ಕಾಬಿಕ್ಕಿ ಆಗಿದ್ದಾರೆ. ಟಿಕೆಟ್ನಲ್ಲಿ ನಾಲ್ಕು ಮಕ್ಕಳು ಎಂದು ಕಂಡಕ್ಟರ್ ನಮೂದಿಸಿದ್ದಾರೆ. ಹಕ್ಕಿಗಳಿಗೆ ಮಕ್ಕಳೆಂದು ಪರಿಗಣಿಸಿ ಒಂದು ಪಕ್ಷಿಗೆ ತಲಾ 111 ರೂ. ನಂತೆ ಒಟ್ಟು ನಾಲ್ಕು ಹಕ್ಕಿಗಳಿಗೆ 444 ರೂಪಾಯಿ ಬರೆದಿದ್ದಾರೆ. ಕಂಡಕ್ಟರ್ ಕೊಟ್ಟ ಟಿಕೆಟ್ನಂತೆ ದುಡ್ಡು ಕೊಟ್ಟು ಅಜ್ಜಿ ಮತ್ತು ಮೊಮ್ಮಗಳು ಮೈಸೂರಿಗೆ ಪ್ರಯಾಣಿಸಿದ್ದಾರೆ.
ಒಟ್ನಲ್ಲಿ, ರಾಜ್ಯ ಸರ್ಕಾರದ ಶಕ್ತಿ ಯೋಜನೆಯಂತೆ ಅಜ್ಜಿ-ಮೊಮ್ಮಗಳಿಗೆ ಉಚಿತ ಪ್ರಯಾಣ ಸಿಕ್ಕರೆ, ‘ಲವ್ ಬರ್ಡ್ಸ್’ಗಳಿಗೆ ದುಡ್ಡು ಕೊಟ್ಟು ಟಿಕೆಟ್ ಪಡೆಯುವಂತಾಗಿದೆ.
