ಬೆಂಗಳೂರು : ದೇವಸ್ಥಾನದ ಗೋಡೆ ಡೆಮಾಲಿಷನ್ ವಿಚಾರ ಸಂಬಂಧ ಸ್ಥಳಕ್ಕೆ ಶಾಸಕ ಉದಯ ಗರುಡಚಾರ್ ಆಗಮಿಸಿ ಪರಿಶೀಲನೆ ನಡೆಸಿದ್ದಾರೆ.
ಈ ಬಗ್ಗೆ ಮಾತನಾಡಿದ ಅವರು, ನನಗೆ ನಮ್ಮ ಕಾರ್ಯಕರ್ತರು ಕಾಲ್ ಮಾಡಿ ವಿಷಯ ತಿಳಿಸಿದರು. ಇದು ತುಂಬಾ ವರ್ಷಗಳಿಂದ ಇದ್ದ ದೇವಸ್ಥಾನ. ಈ ತರ ಮಾಡೋದು ದೊಡ್ಡ ತಪ್ಪು ಎಂದು ಹೇಳಿದ್ದಾರೆ.
ಏನೇ ಮಾಡ್ಬೇಕು ಅಂದ್ರೂ ಅದಕ್ಕೊಂದು ಪದ್ಧತಿ ಇದೆ. ಇದು ಇಲ್ಲಿಗೆ ಮುಗಿಬೇಕು. ಅಧಿಕೃತವಾಗಿ ಈ ಕಾರ್ಯ ನಡೆದಿಲ್ಲ. ಕರ್ನಾಟಕ ಒಂದು ಶಾಂತಿಯ ತೋಟ. ನನ್ನ ಕ್ಷೇತ್ರದಲ್ಲಿ ಈ ತರ ಆದ್ರೆ ನಾನು ಸುಮ್ನೆ ಇರೋದಿಲ್ಲ. ಯಾರೇ ಆಗಿರ್ಲಿ, ನಾನು ಎಫ್ಐಆರ್ (FIR) ಹಾಕಲು ಹೇಳಿ ಅವರ ಮೇಲೆ ಕ್ರಮ ತೆಗೆದುಕೊಳ್ಳುವಂತೆ ಹೇಳ್ತೀನಿ ಎಂದು ತಿಳಿಸಿದ್ದಾರೆ.
ದೇವಸ್ಥಾನ ಕೆಡವಿದ ಬಿಬಿಎಂಪಿ
ನೂರಾರು ವರ್ಷಗಳ ಇತಿಹಾಸವಿರೋ ಬೆಂಗಳೂರಿನ ಐತಿಹಾಸಿಕ ದೇವಾಲಯಕ್ಕೆ ಹಾನಿ ಮಾಡಿ ಬಿಬಿಎಂಪಿ (BBMP) ಅಧಿಕಾರಿಗಳು ಮಹಾ ಎಡವಟ್ಟು ಮಾಡಿದ್ದಾರೆ. ಎಸ್.ಪಿ. ರಸ್ತೆಯಲ್ಲಿರುವ ಐತಿಹಾಸಿಕ ಗಂಗಾಧರೇಶ್ವರ ದೇವಸ್ಥಾನವನ್ನು ಬಿಬಿಎಂಪಿ ಅಧಿಕಾರಿಗಳು ಕೆಡವಿದ್ದಾರೆ.
ಫುಟ್ಪಾತ್ ತೆರವು ನೆಪದಲ್ಲಿ ದೇವಾಲಯವನ್ನು ಧ್ವಂಸ ಮಾಡಿದ್ದಾರೆ. ಕೆಂಪೇಗೌಡರ ಕಾಲದ ಐತಿಹಾಸಿಕ ದೇಗುಲವನ್ನು ಅಧಿಕಾರಿಗಳು ಕೆಡವಿದ್ದಾರೆ. ಅಧಿಕಾರಿಗಳು, ಜೆಸಿಬಿ ಸಿಬ್ಬಂದಿಯ ನಡೆಗೆ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ. ರಸ್ತೆ ಅಭಿವೃದ್ಧಿ ಹೆಸರಲ್ಲಿ ದೇವಾಲಯ ಕೆಡವಿದ್ದಾರೆ.
