ಬೆಂಗಳೂರು : ಪದೇ ಪದೇ ಸಮಾಜದ ಸಾಮರಸ್ಯ ಹಾಳು‌ಮಾಡಲು ಹೊರಟಿದ್ದಾರೆ ಇದರಿಂದ ನಮ್ಮ ಸಂಸ್ಕೃತಿಗೆ ಅಗೌರವ ತೋರಿಸಿದಂತಾಗುತ್ತಿದೆ ಎಂದು ಮಾಜಿ ಮುಖ್ಯಮಂತ್ರಿ ಹೆಚ್.ಡಿ ಕುಮಾರಸ್ವಾಮಿ ಅವರು ಹಿಂದೂ ಸಂಘಟನೆಗಳ ವಿರುದ್ಧ ಕಿಡಿಕಾರಿದ್ದಾರೆ.
ಆಜಾನ್ ವಿಚಾರಕ್ಕೆ ಸಂಬಂಧಿಸಿದಂತೆ ನಗರದ ಜೆ.ಪಿ ಭವನನದಲ್ಲಿರುವ ಜೆಡಿಎಸ್ ಕಚೇರಿಯಲ್ಲಿಂದು ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ನಿಜಕ್ಕೂ ಅವರು( ಹಿಂದೂ ಸಂಘಟನೆಕಾರರು) ರಾಮನ ಭಕ್ತರಾಗಿದ್ದರೆ, ಹಿಂದೂ ಸಂಸ್ಕ್ರತಿಗೆ ಒತ್ತುಕೊಡಿ ಆಗ ನೀವು ರಾಮನ ಭಕ್ತರಾಗುತ್ತೀರಿ ಎಂದರು.
ಸದ್ಯ ನಾನು ಹೊಳೆನರಸೀಪುರದಲ್ಲಿದ್ದಾಗ ಸಂಜೆ ಭಜನೆ ಮಾಡಿಕೊಂಡು, ದೀಪ ಹಿಡಿದು ನಡೆಯುತ್ತಿದ್ದೇವು. ಬೆಳಗ್ಗೆ 5 ಗಂಟೆಗೆ ದೇವಸ್ಥಾನ ಓಪನ್ ಮಾಡುತ್ತಿದ್ದೆವು. ಗಂಟೆ ನಾದ ಕೇಳಿದರೆ ಕಿವಿ ಅರಳುತ್ತಿತ್ತು. ಇಷ್ಟು ವರ್ಷ ಆಜಾನ್ನಿಂದ, ಘಂಟೆಯ ನಾದದಿಂದ ಶಬ್ದಮಾಲಿನ್ಯ ಆಗುತ್ತಿರಲಿಲ್ಲ ಆದರೆ ಈಗ ಏಕಾಏಕಿ ಶಬ್ದಮಾಲಿನ್ಯ ಆಗುತ್ತಿದೆ ಎಂದು ಹೇಳಲು ಹೊರಟಿದ್ದೀರಿ ಎಂದು ಟಾಂಗ್ ಕೊಟ್ಟಿದ್ದಾರೆ.
ಅದುವಲ್ಲದೇ, ಪ್ರತಿಯೊಂದು ಧರ್ಮದವರಿಗೂ ಅವರದ್ದೇ ಆದ ಸಂಪ್ರದಾಯ ಇರುತ್ತದೆ ಹೀಗೆ ಅವರ ಸಂಪ್ರದಾಯ ನಿಲ್ಲಿಸಿ ಅನ್ನೊದಲ್ಲ. ಹಿಂದೆ ದೇವಸ್ಥಾನದಲ್ಲಿ ದೀಪ ಹಚ್ಚುವಾಗ ಭಕ್ತಿಗೀತೆ ಹಾಕುತ್ತಿದ್ದರು. ಸುಮ್ಮನೇ ನಮ್ಮ ಹಳೆಯ ಸಂಪ್ರದಾಯ ಮುಂದುವರಿಸಲು ಬಿಡಿ ಎಂದು ಹೆಚ್ಡಿ ಕುಮಾರಸ್ವಾಮಿ ಅವರು ಹೇಳಿದರು.
ಇನ್ನು ಇದೆಲ್ಲದರ ಹಿಂದೆ ಪೊಲಿಟಿಕಲ್ ಅಜೆಂಡಾ ಇದೆ ಎಂದು ಅನಿಸುತ್ತಿದೆ. ನರೇಂದ್ರ ಮೋದಿ ಸಂಸತ್ನಲ್ಲಿ ಅಡ್ಡ ಬೀಳ್ತಾರೆ. ವಿಧಾನಸೌಧದ ಮುಂಭಾಗದಲ್ಲಿ ಬೊಮ್ಮಾಯಿ ನಮಸ್ಕಾರ ಮಾಡಿದ್ದು..? ಏನು ಮಾಡ್ತಾ ಇದ್ದೀರಾ ಬೊಮ್ಮಾಯಿಯವರೇ ಇಡೀ ರಾಜ್ಯಕ್ಕೆ ಬೆಂಕಿ ಇಡೋ ಕೆಲಸ ಮಾಡೋದಿಕ್ಕೆ ಅಡ್ಡಬಿದ್ರಾ ನೀವು ? ಇದನ್ನು ಇಟ್ಟುಕೊಂಡಾ ಚುನಾವಣೆ ಮಾಡ್ತಿರಾ..? ಸರ್ಕಾರದಲ್ಲಿರುವ ನೀವು ಮೌನಿ ಬಾಬಾಳಾಗಿದ್ದಿರಲ್ಲ ನಿಮ್ಮಿಂದ ಏನು ಮಾಡಕಾಗುತ್ತಾ ಇಲ್ವಾ ? ಈ ರಾಜ್ಯದಲ್ಲಿ ಸಿಎಂ ಇದ್ದಾರಾ ಇಲ್ವಾ ಅನ್ನೋದೆ ಡೌಟ್ ? ಎಂದು ಮಾಜಿ ಸಿಎಂ ಕುಮಾರಸ್ವಾಮಿ ಬಿಜೆಪಿ ಸರ್ಕಾರ ವಿರುದ್ದ ವಾಗ್ದಾಳಿ ನಡೆಸಿದರು.
