ಎಲ್ಲೆಲ್ಲಿ ನೋಡಲಿ ನಿನ್ನನ್ನೆ ಕಾಣುವೆ. ಈ ಹಾಡು ಸದ್ಯ ಕಾಂತಾರ ಸಿನಿಮಾಗೆ ಸೂಕ್ತ ಅನಿಸುತ್ತೆ. ಯೆಸ್.. ದೊಡ್ಡ ದೊಡ್ಡ ಘಟಾನುಘಟಿಗಳ ಜೈಕಾರದಲ್ಲಿ ಅಬ್ಬರಿಸಿ ಬೊಬ್ಬಿರಿಯುತ್ತಿರೋ ಕಾಂತಾರ ಚಿತ್ರಕ್ಕೆ ಎಲ್ಲಾ ಕಡೆಗಳಲ್ಲೂ ಮೆಚ್ಚುಗೆಯ ಮಹಾಪೂರವೇ ಹರಿದಿದೆ. ಇದೀಗ ಆರ್ಟ್ ಆಫ್ ಲಿವಿಂಗ್ ಸರದಿ. ಕಾಂತಾರ ಆಧ್ಯಾತ್ಮಿಕ ರಂಗದಲ್ಲೂ ಕಮಾಲ್ ಮಾಡ್ತಿದೆ. ಏನ್ ಈ ಸರ್ಪರೈಸಿಂಗ್ ಸುದ್ದಿ ಅಂತೀರಾ..? ನೀವೇ ಓದಿ.
- ರಿಷಬ್ ಆ್ಯಕ್ಟಿಂಗ್ ಮೆಚ್ಚಿದ ಗುರು ರವಿಶಂಕರ್ ಗುರೂಜಿ..!
ದಶದಿಕ್ಕುಗಳಲ್ಲೂ ಕಾಂತಾರ ಕಂಪು ಸೂಸಿದೆ. ಎಲ್ಲಿ ನೋಡಿದ್ರೂ ಕಾಂತಾರ ಚಿತ್ರದ ಬಗ್ಗೆಯೇ ಟಾಕು. ದೇಶ ವಿದೇಶಗಳಲ್ಲೂ ರಿಷಬ್ ಪ್ರಾಜೆಕ್ಟ್ಗೆ ಫುಲ್ ಮಾರ್ಕ್ಸ್ ಸಿಕ್ಕಿದೆ. ಇತ್ತೀಚೆಗೆ ಆಧ್ಯಾತ್ಮಿಕ ಗುರು ಸದ್ಗುರು ಆಶ್ರಮ ಇಶಾ ಫೌಂಡೇಷನ್ನಲ್ಲಿ ಕಾಂತಾರ ಸ್ಟ್ರೀಮ್ ಆಗಿತ್ತು. ಆಶ್ರಮದ ಶಿಷ್ಯರೆಲ್ಲಾ ಸಿನಿಮಾ ನೋಡಿ ಮಂತ್ರಮುಗ್ಧವಾಗಿದ್ದರು. ಇದೀಗ ಆ ಸಾಲಿಗೆ ಮತ್ತೊಬ್ಬ ಗುರುಗಳು ಸೇರಿಕೊಂಡಿದ್ದಾರೆ.
ಬೆಂಗಳೂರಿನ ಆರ್ಟ್ ಆಫ್ ಲಿವಿಂಗ್ನ ಆಶ್ರಮದಲ್ಲಿ ಕಾಂತಾರ ಚಿತ್ರವನ್ನು ಪ್ರದರ್ಶಿಸಲಾಗಿದೆ. ಆಧ್ಯಾತ್ಮಿಕ ಚಿಂತಕ, ಭಕ್ತಾಧಿಗಳ ನೆಚ್ಚಿನ ಆರಾಧ್ಯ ಧೈವ ರವಿಶಂಕರ್ ಗುರೂಜಿ ಸಿನಿಮಾ ನೋಡಿ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. ಈ ಮೂಲಕ ಮತ್ತೊಮ್ಮೆ ರಿಷಬ್ ನಿರ್ದೇಶನದ ಕಾಂತಾರ ಚಿತ್ರಕ್ಕೆ ನೂರಾನೆ ಬಲ ಬಂದಿದೆ. ಸ್ವಾಮೀಜಿಗಳು, ಸನ್ಯಾಸಿಗಳ ಪ್ರಶಂಸೆಯಲ್ಲಿ ಕಾಂತಾರ ಚಿತ್ರಕ್ಕೆ ಕಿಕ್ಸ್ಟಾರ್ಟ್ ಸಿಕ್ಕಿದೆ.
ರಿಷಬ್ ಆ್ಯಕ್ಟಿಂಗ್ ಅದ್ಭುತವಾಗಿದೆ. ಈ ಮೂಲಕ ಕರ್ನಾಟಕಕ್ಕೆ ಕಾಂತಾರ ಹೆಮ್ಮೆ ತಂದಿದೆ. ಕಥೆ ಹೇಳುವ ರೀತಿ ತುಂಬಾ ಚೆನ್ನಾಗಿದೆ. ಕರಾವಳಿ ಸಂಸ್ಕೃತಿ ಸುಂದರವಾಗಿದೆ ಎಂದಿದ್ದಾರೆ. ಈ ಕುರಿತಾದ ವೀಡಿಯೋವನ್ನು ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದು ಸಖತ್ ಸೆನ್ಸೇಷನ್ ಕ್ರಿಯೇಟ್ ಮಾಡ್ತಿದೆ.
ಸೆಪ್ಟೆಂಬರ್ 30 ರಂದು ತೆರೆ ಕಂಡ ಕಾಂತಾರ ಎಗ್ಗಿಲ್ಲದೆ ಮುನ್ನುಗ್ತಿದೆ. ಹಲವು ವಿವಾದಗಳ ನಡುವೆಯೂ ಜನಮನ್ನಣೆ ಪಡೆದು ಅಬ್ಬರಿಸ್ತಿದೆ. ರಿಲೀಸ್ ಆದ ಎಲ್ಲಾ ಥಿಯೇಟರ್ಗಳಲ್ಲೂ ಹೌಸ್ಫುಲ್ ಪ್ರದರ್ಶನ ಕಾಣ್ತಿರೋ ಕಾಂತಾರ ಪರಭಾಷೆಗಳಿಗೂ ಡಬ್ ಆಗಿ ಧೂಳೆಬ್ಬಿಸ್ತಿದೆ. ಬರೋಬ್ಬರಿ 250 ಕೋಟಿಗೂ ಅಧಿಕ ಕಲೆಕ್ಷನ್ ಬಾಚಿಕೊಂಡಿರೋ ಕಾಂತಾರ ಚಿತ್ರಕ್ಕೆ ರವಿಶಂಕರ್ ಮಾತುಗಳು ಶಕ್ತಿ ತುಂಬಿವೆ.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯೂರೋ, ಪವರ್ ಟಿವಿ
