ಯುಗ ಯುಗಗಳೇ ಕಳೆದರೂ ಅಪ್ಪು ನೆನಪು ಮಾತ್ರ ಶಾಶ್ವತ. ಕೋಟ್ಯಂತರ ಅಭಿಮಾನಿಗಳ ಉಸಿರಲ್ಲಿ ಹಚ್ಚ ಹಸಿರಾಗಿ ಬೆರತಿರುವ ದೇವತಾ ಮನುಷ್ಯ ಪುನೀತ್ ರಾಜ್ಕುಮಾರ್. ಇವ್ರ ಕೊನೆಯ ಸಿನಿಮಾ ಜೇಮ್ಸ್ ನೋಡಿ ಅತ್ತು ಅತ್ತು ಕಣ್ಣೀರಾಕಿದ್ದ ಅಭಿಮಾನಿಗಳು, ಸಿಲ್ವರ್ ಸ್ಕ್ರೀನ್ ಮೇಲೆ ಕೊನೆಯ ಬಾರಿ ದೇವರನ್ನ ಕಣ್ತುಂಬಿಕೊಂಡಿದ್ರು. ಇದೀಗ ಅಪ್ಪು ಅಭಿನಯದ ಮತ್ತೊಂದು ಸಿನಿಮಾ ಗಂಧದಗುಡಿ ರಿಲೀಸ್ಗೆ ಸಜ್ಜಾಗಿದೆ.
ನವೆಂಬರ್ನಲ್ಲಿ ಗಂಧದಗುಡಿಯಿಂದ ರಾಜರತ್ನ ಆಗಮನ
ಅಪ್ಪು ಡ್ರೀಮ್ ಪ್ರಾಜೆಕ್ಟ್ನಲ್ಲಿ ವನಸಿರಿ ಮತ್ತು ಪ್ರಾಣಿ ಸಂಕುಲ
ಕೋಟಿ ಕೋಟಿ ಹೃದಯಗಳನ್ನು ಕಲಕಿದ ಅಧಮ್ಯ ಚೇತನ ಅಪ್ಪು. ಅಭಿಮಾನಿಗಳ ಪಾಲಿಗೆ ಸಾಕ್ಷಾತ್ ದೇವರಾಗಿರುವ ಪುನೀತ್ರನ್ನ ಕಂಡ್ರೆ, ಪುಟಾಣಿ ಮಕ್ಕಳಿಗೂ ಜೀವ. ಕೇವಲ ಸಿನಿಮಾ ಮಾತ್ರವಲ್ಲ, ತಮ್ಮ ಸಾಮಾಜಿಕ ಸೇವೆಯ ಮೂಲಕವೂ ಧ್ರುವತಾರೆಯಾಗಿ ಹೊಳೆದ ಅಪ್ರತಿಮ ಕಲಾವಿದ. ಅಪ್ಪು ಇನ್ನಿಲ್ಲ ಅನ್ನೋ ಪದವೇ ಕಣ್ಣಂಚಲ್ಲಿ ನೀರು ತರಿಸಿಬಿಡುತ್ತೆ. ಅವರೆಂದೂ ಜೀವಂತ. ಇದೀಗ ಅಪ್ಪು ಕನಸಿನ ಪ್ರಾಜೆಕ್ಟ್ ಗಂಧದಗುಡಿ ಸಿನಿಮಾ ತೆರೆಗೆ ಬರೋಕೆ ಸಜ್ಜಾಗಿದೆ.
ಪುನೀತ್ ಅಭಿನಯದ ಜೇಮ್ಸ್ ಅವ್ರ ಕೊನೆಯ ಸಿನಿಮಾ ಅಂತ ಎಲ್ಲರೂ ಅಂದುಕೊಂಡಿದ್ರು. ಆದ್ರೆ, ಪುನೀತ್ ಭಾವನಾತ್ಮಕವಾಗಿ ಬೆರೆತು ಹೋಗಿದ್ದ, ಇಷ್ಟ ಪಟ್ಟು ಮಾಡಿದ್ದ ಡಾಕ್ಯುಮೆಂಟರಿ ಗಂಧದಗುಡಿ. ಕಾಡು, ಮೇಡು, ಪರಿಸರ, ಪ್ರಾಣಿಗಳೊಂದಿಗೆ ಬೆರೆತಿದ್ದ ಅಪ್ಪು ಅವ್ರು, ಈ ಪ್ರಾಜೆಕ್ಟ್ನ ತುಂಬಾ ಇಷ್ಟ ಪಟ್ಟು ಮಾಡಿದ್ರು. ಮೇಕಪ್ ಬೇಡ ಎಂದಿದ್ದ ಅಪ್ಪು ನಗುನಗುತ್ತಾ, ಪ್ರಕೃತಿಯನ್ನು ಆಸ್ವಾದಿಸುತ್ತಾ, ಬೆಟ್ಟ ಗುಡ್ಡ ಹತ್ತಿ ಇಳಿದಿದ್ರು. ಇದೀಗ ಈ ಡಾಕ್ಯುಮೆಂಟರಿ ಸಿನಿಮಾ ಆಗಿ ತೆರೆಗೆ ಬರ್ತಿದೆ.
ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಅಭಿನಯದ ಗಂಧದಗುಡಿ ಸಿನಿಮಾನ ಪಿಆರ್ಕೆ ಸ್ಟುಡಿಯೋಸ್ ನಿರ್ಮಾಣ ಮಾಡ್ತಿದೆ. ಈಗಾಗ್ಲೇ ಗಂಧದಗುಡಿ ಟೀಸರ್ ಮಿಲಿಯನ್ಗಟ್ಟ್ಟಲೆ ವೀವ್ಸ್ ದಾಖಲಿಸಿದೆ. ಸಾಮಾನ್ಯವಾಗಿ ಡಾಕ್ಯುಮೆಂಟ್ ಚಿತ್ರಗಳು ಥಿಯೇಟರ್ನಲ್ಲಿ ರಿಲೀಸ್ ಮಾಡೋದು ಕಡಿಮೆ. ಆದ್ರೆ ಈ ಚಿತ್ರವನ್ನು ಸಿನಿಮಾಗೆ ಒಂದಷ್ಟು ಸಿನಿಮ್ಯಾಟಿಕ್ ಟಚ್ ನೀಡಲಾಗಿದ್ದು, ನೇರವಾಗಿ ಥಿಯೇಟರ್ನಲ್ಲಿ ರಿಲೀಸ್ ಮಾಡಲಾಗ್ತಿದೆ. ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಗಂಧದಗುಡಿ ಸಿನಿಮಾ ನವೆಂಬರ್ಗೆ ರಿಲೀಸ್ ಆಗೋ ಪೋಸ್ಟರ್ ಸಖತ್ ವೈರಲ್ ಆಗಿದೆ.
ಅಮೋಘವರ್ಷ ಅವರ ನಿರ್ದೇಶನದಲ್ಲಿ, ಅಶ್ವಿನಿ ಪುನೀತ್ರಾಜ್ಕುಮಾರ್ ನಿರ್ಮಾಣದಲ್ಲಿ ತೆರೆಗೆ ಬರಲಿದೆ. ಪ್ರತೀಕ್ ಶೆಟ್ಟಿ ಕ್ಯಾಮೆರಾ ಕೈಚಳಕ ಹೊಸ ದೃಶ್ಯವೈಭವ ತೋರಲಿದೆ. ಎನಿವೇ ಈ ಸಿನಿಮಾ ಮೂಲಕ ಮತ್ತೊಮ್ಮೆ ಅಪ್ಪುಅವರನ್ನು ನಾವೆಲ್ಲಾ ಬರಮಾಡಿಕೊಳ್ಳಬಹುದು. ಶಿಳ್ಳೆ, ಚಪ್ಪಾಳೆಯಿಂದ ಅವ್ರಿಗೆ ಬಹುಪರಾಕ್ ಹೇಳಬಹುದು.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯೂರೋ, ಪವರ್ ಟಿವಿ
