ರೆಟ್ರೋ ಲುಕ್, ಜಾವಾ ಬೈಕ್ನಲ್ಲಿರೋ ಉಪ್ಪಿಯ ರಗಡ್ಸ್ಟೈಲ್ ಸಿನಿರಸಿಕರಿಗೆ ಸಖತ್ ಕಿಕ್ ಕೊಟ್ಟಿದೆ. ಅಮಿತಾಭ್ ಬಚ್ಚನ್ ಶೋಲೆ ಸಿನಿಮಾದಲ್ಲಿ ಬಳಸಿದ ಪಿಸ್ತೂಲ್ ನೋಡಿ ಥ್ರಿಲ್ ಆಗಿರೋ ಪ್ರೇಕ್ಷಕರು ಐ ಕಾಂಟ್ ವೆಯ್ಟ್ ಅಂತಿದ್ದಾರೆ. ಯೆಸ್.. ನಾವು ಹೇಳ್ತಾ ಇರೋದು ಕಬ್ಜ ಚಿತ್ರದ ಬಗ್ಗೆ. ಸ್ಯಾಂಡಲ್ವುಡ್ ಬಾದ್ಷಾ ಕಿಚ್ಚ, ರಿಯಲ್ ಸ್ಟಾರ್ಉಪ್ಪಿ ಕಾಂಬೋದಲ್ಲಿ ಮೂಡಿಬರ್ತಿರೋ ಅದ್ಧೂರಿ ಸಿನಿಮಾದ ಎಕ್ಸ್ಕ್ಲೂಸಿವ್ ಅಪ್ಡೇಟ್ ನಿಮಗಾಗಿ.
- ಸಪ್ತ ಭಾಷೆಗೆ ಉಪ್ಪಿ- ಕಿಚ್ಚನ ಕಬ್ಜ ಡಬ್ಬಿಂಗ್ ಶುಭಾರಂಭ
- ಮೊದಲ ಬಾರಿಗೆ ಏಕಕಾಲಕ್ಕೆ 7 ಭಾಷೆಗಳಲ್ಲಿ ಡಬ್ಬಿಂಗ್
- ‘ಕಬ್ಜ’ ಟೀಸರ್ ರಿಲೀಸ್ ಮಾಡುವಂತೆ ಫ್ಯಾನ್ಸ್ ಒತ್ತಾಯ
- ಅಭಿಮಾನಿಗಳಿಗೆ ಕಾದಿದೆ ಸರ್ಪ್ರೈಸಿಂಗ್ ಗುಡ್ ನ್ಯೂಸ್
ಸೂಪರ್ ಸ್ಟಾರ್ ಉಪೇಂದ್ರ, ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಕಾಂಬಿನೇಷನ್ನಲ್ಲಿ ಮೂಡಿಬರ್ತಿರೋ ಅದ್ಧೂರಿ ಸಿನಿಮಾ ಕಬ್ಜ. ರೆಟ್ರೋ ಅಂಡರ್ವರ್ಲ್ಡ್ ಕಥೆಯನ್ನು, ಮೈನವಿರೇಳಿಸೋ ಹಾಗೆ ತೋರಿಸೋಕೆ ನಿರ್ದೇಶಕ ಆರ್. ಚಂದ್ರು ಹೊರಟಿದ್ದಾರೆ. ಈಗಾಗ್ಲೇ ಸಿನಿಮಾದ ಮೇಕಿಂಗ್ ಇನ್ನಿಲ್ಲದ ಕ್ಯೂರಿಯಾಸಿಟಿ ಹುಟ್ಟಿಸಿದೆ. ಕಬ್ಜ ಮೇಕಿಂಗ್ ತುಣುಕುಗಳನ್ನು ನೋಡಿದವ್ರು ಸ್ಟನ್ ಆಗಿದ್ದಾರೆ.
ಶೂಟಿಂಗ್ ಕಂಪ್ಲೀಟ್ ಅಗಿದ್ದು, ಡಬ್ಬಿಂಗ್ ಹಾಗೂ ಪೋಸ್ಟ್ ಪ್ರೊಡಕ್ಷನ್ ಕಾರ್ಯಗಳಲ್ಲಿ ಬ್ಯುಸಿ ಇದೆ ಟೀಂ. ಕೆಜಿಎಫ್ ನಂತ್ರ ಇಡೀ ವಿಶ್ವದಲ್ಲೇ ವಿನೂತನ ಪ್ರಯೋಗದೊಂದಿಗೆ ಸಿನಿಮಾ ತಯಾರಾಗ್ತಿದೆ. ಮಲ್ಟಿ ಸ್ಟಾರರ್ ಮೂವಿ ಕಬ್ಜ ಬರೋಬ್ಬರಿ ಏಳು ಭಾಷೆಗಳಲ್ಲಿ ಡಬ್ಬಿಂಗ್ ಆಗ್ತಿದೆ. ಚಿತ್ರರಂಗದಲ್ಲೇ ಹೊಸ ಇತಿಹಾಸ ಬರೆದಿರುವ ಕಬ್ಜ ಸಿನಿಮಾ, ಚಿತ್ರರಸಿಕರ ಎದೆಯಲ್ಲಿ ಹೊಸ ಸಂಚಲನ ಮೂಡಿಸಿದೆ. ಎರಡನೇ ಬಾರಿ ಕಿಚ್ಚ-ಉಪ್ಪಿ ಕಾಂಬಿನೇಷನ್ ಧೂಳೆಬ್ಬಿಸೋಕೆ ಸಜ್ಜಾಗಿದೆ.
ನಿರ್ದೇಶಕ ಆರ್.ಚಂದ್ರು ಕೆಜಿಎಫ್ ಚಿತ್ರದ ನಂತ್ರ ಯಾರೂ ಊಹಿಸಿರದ ರೀತಿಯಲ್ಲಿ ಕಬ್ಜ ಸಿನಿಮಾ ಮೇಕಿಂಗ್ ಮಾಡೋ ಪಣ ತೊಟ್ಟಿದ್ರು. ಅದೇ ರೀತಿಯಲ್ಲಿ ಕಂಡು ಕೇಳರಿಯದ ಹಾಗೆ ಕೋಟಿ ಕೋಟಿ ವೆಚ್ಚದಲ್ಲಿ ಬೃಹತ್ ಸೆಟ್ ಹಾಕಿ, ಅದ್ಧೂರಿ ಲೊಕೆಷನ್ಸ್ಗಳಲ್ಲಿ ಚಿತ್ರೀಕರಣ ಮಾಡಿದ್ದಾರೆ. ಹಿಂದಿಯ ಶೋಲೆ, ಕನ್ನಡದ ಗಂಧದ ಗುಡಿ ಸಿನಿಮಾಗಳಲ್ಲಿ ಉಪಯೋಗಿಸಿದ್ದ ಪಿಸ್ತೂಲ್ ಬಳಸಲಾಗಿದೆ. ಇದಕ್ಕಾಗಿ ಗನ್ ಸಂಸ್ಥೆಯೊಂದಿಗೆ ಒಪ್ಪಂದ ಕೂಡ ಮಾಡಿಕೊಂಡಿತ್ತು ಟೀಂ.
ಸದ್ಯ ಶೂಟಿಂಗ್ ಮುಗಿಸಿರುವ ಚಿತ್ರತಂಡ, ಶುಭ ಮುಹೂರ್ತದೊಂದಿಗೆ ಪೂಜೆ ಸಲ್ಲಿಸಿ ಡಬ್ಬಿಂಗ್ ಕಾರ್ಯ ಶುರು ಮಾಡಿದೆ. ಕನ್ನಡ, ತಮಿಳು, ತೆಲುಗು, ಹಿಂದಿ, ಒರಿಯಾ, ಮರಾಠಿ, ಮಲಯಾಳಂ ಭಾಷೆಗಳಲ್ಲಿ ಏಕಕಾಲಕ್ಕೆ ಡಬ್ಬಿಂಗ್ ಮಾಡಿ ದಾಖಲೆ ಬರೆಯಲು ಮುಂದಾಗಿದೆ. ರಿಲೀಸ್ಗೂ ಮುನ್ನ ಎಲ್ಲರ ಕುತುಹಲ ಕೆರಳಿಸಿರುವ ಕಬ್ಜ ಚಿತ್ರದ ಟೀಸರ್ ಯಾವಾಗ ಅಂತ ಅಭಿಮಾನಿಗಳು ಹಠ ಹಿಡಿದಿದ್ದಾರೆ. ಅದಷ್ಟು ಬೇಗ ಟೀಸರ್ ರಿಲೀಸ್ ಮಾಡಿ ಎಂದು ದುಂಬಾಲು ಬಿದ್ದಿದ್ದಾರೆ.
ಚಿತ್ರದಲ್ಲಿ ಉಪ್ಪಿ, ಕಿಚ್ಚ ಸುದೀಪ್ ಮಾತ್ರವಲ್ಲದೇ ನಟಿ ಶ್ರಿಯಾ ಸರಣ್, ಬಾಲಿವುಡ್ನ ನವಾಬ್ ಶಾ, ತಮಿಳಿನ ಐ ಚಿತ್ರದಲ್ಲಿ ನಟಿಸಿದ್ದ ಬಾಡಿ ಬಿಲ್ಡರ್ ಕಾಮರಾಜನ್, ಟಾಲಿವುಡ್ ಸೂಪರ್ ಸ್ಟಾರ್ ಜಗಪತಿ ಬಾಬು, ಪ್ರಮೋದ್ ಶೆಟ್ಟಿ, ಸುನೀಲ್ ಪುರಾಣಿಕ್ ಸೇರಿದಂತೆ ಬಹುದೊಡ್ಡ ಕಲಾವಿದರ ದಂಡು ಚಿತ್ರದಲ್ಲಿದೆ.
ಬಹುಕೋಟಿ ವೆಚ್ಚದಲ್ಲಿ ಎಮ್ಟಿಬಿ ನಾಗರಾಜ್ ಅರ್ಪಿಸ್ತಿರೋ ಈ ಸಿನಿಮಾನ ನಿರ್ದೇಶನದ ಜೊತೆಗೆ ನಿರ್ಮಾಣಕ್ಕೂ ಕೈ ಹಾಕಿದ್ದಾರೆ ಆರ್ ಚಂದ್ರು. ಕೆಜಿಎಫ್ ಖ್ಯಾತಿಯ ರವಿ ಬಸ್ರೂರು ಮ್ಯೂಸಿಕ್ ಕಂಪೋಸಿಂಗ್ ಚಿತ್ರಕ್ಕೆ ಇನ್ನಷ್ಟು ಮೈಲೇಜ್ ಕೊಡಲಿದೆ. ಎಜೆ ಶೆಟ್ಟಿ ಕ್ಯಾಮೆರಾ ಕಣ್ಣಲ್ಲಿ ಅಂಡರ್ವರ್ಲ್ಡ್ ರೋಚಕ ಜಗತ್ತು ತೆರೆದುಕೊಳ್ಳಲಿದೆ. ಒಟ್ನಲ್ಲಿ, ಡಬ್ಬಿಂಗ್ ಶುರುವಾಗಿರೋದ್ರಿಂದ ಸದ್ಯದಲ್ಲೇ ಟೀಸರ್ನ ಸರ್ಪ್ರೈಸ್ ಗಿಫ್ಟ್ ಆಗಿ ನೀಡೋ ಮನ್ಸೂಚನೆ ನೀಡಿದೆ.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯೂರೋ, ಪವರ್ ಟಿವಿ