ಬೆಂಗಳೂರು : ಬಿಹಾರದಿಂದ ನಗರಕ್ಕೆ ಅಕ್ರಮವಾಗಿ ಪಿಸ್ತೂಲ್ ತಂದು ಮಾರಾಟಕ್ಕೆ ಯತ್ನಿಸಿದ ಇಬ್ಬರು ಆರೋಪಿಗಳನ್ನು ಪೋಲಿಸರು ಬಂಧಿಸಿದ್ದು. ಬಂಧಿತರಿಂದ 2 ಪಿಸ್ತೂಲುಗಳು ಮತ್ತು 4 ಜೀವಂತ ಗುಂಡುಗಳನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಮಾಹಿತಿ ದೊರೆತಿದೆ.
ಬಿಹಾರ ಮೂಲದ ಇಬ್ಬರು ಅಣ್ಣ ತಮ್ಮಂದಿರು ಹಾರೋಹಳ್ಳಿಯಲ್ಲಿ ಟೈಲ್ಸ್ ಕೆಲಸ ಮಾಡಿಕೊಂಡು ಮನೆಯೊಂದರಲ್ಲಿ ವಾಸವಿದ್ದರು. ಇತ್ತೀಚೆಗೆ ಬಿಹಾರಕ್ಕೆ ಹೋಗಿದ್ದ ತಮ್ಮ ವಿಧ್ಯಾನಂದ ಬಿಹಾರದಿಂದ ರೈಲಿನಲ್ಲಿ ಎರಡು ಕಂಟ್ರೀ ಮೇಡ್ ಪಿಸ್ತೂಲುಗಳನ್ನು ತಂದಿದ್ದನು. ಮೆಜಸ್ಟಿಕ್ ರೈಲು ನಿಲ್ದಾಣಕ್ಕೆ ಬಂದಿದ್ದ ತಮ್ಮನನ್ನು ಪಿಕ್ ಮಾಡಲು ಬಂದಿದ್ದ ಅಣ್ಣ ಪ್ರೇಮಾನಂದ ತಮ್ಮನನ್ನು ಕರೆದುಕೊಂಡು ವಾಪಾಸಾಗಿದ್ದರು.
ವಾಪಾಸ್ ಹೋಗುವ ಈ ವೇಳೆ ಕೊಪ್ಪ-ಬೇಗೂರು ರಸ್ತೆಯ ನೈಸ್ ರೋಡ್ ನಲ್ಲಿ ಹುಳಿಮಾವು ಪೊಲೀಸರು ವಾಹನಗಳ ಪರಿಶೀಲನೆ ಮಾಡುವ ವೇಳೆ ಇವರನ್ನು ತಡೆದು ನಿಲ್ಲಿಸಿದ್ದು. ಬೈಕ್ ದಾಖಲೆಗಳನ್ನು ಕೇಳಿದ್ದಾರೆ. ಆದರೆ ಪೋಲಿಸರನ್ನು ನೋಡುತ್ತಿದ್ದಂತೆ ಆರೋಪಿಗಳು ಬೈಕ್ ನಿಲ್ಲಿಸಿ ಓಡಿ ಹೋಗಲು ಯತ್ನಿಸಿದ್ದು. ಪೋಲಿಸರು ಆರೋಪಿಗಳನ್ನು ತಡೆದು ನಿಲ್ಲಿಸಿ ಬ್ಯಾಗ್ ಚೆಕ್ ಮಾಡಿದ್ದಾರೆ.
ಮೊದಲಿಗೆ ಗಾಂಜಾ ಇರಬಹುದು ಎಂಬ ಅನುಮಾನದಿಂದ ಬ್ಯಾಗ್ ಹುಡುಕಿದ ಪೋಲಿಸರಿಗೆ ಶಾಕ್ ಎದುರಾಗಿದ್ದು. ಆ ಬ್ಯಾಗ್ನಲ್ಲಿ ಎರಡು ಪಿಸ್ತೂಲುಗಳು ಮತ್ತು ನಾಲ್ಕು ಜೀವಂತಬ ಗುಂಡುಗಳು ಪತ್ತೆಯಾಗಿವೆ. ತಕ್ಷಣವೆ ಆರೋಪಿಗಳನ್ನು ಬಂಧಿಸಿದ್ದು ಆರೋಪಿಗಳು ವಿಚಾರಣೆ ವೇಳೆ ಅನೇಕ ವಿಚಾರಗಳನ್ನು ಬಾಯಿ ಬಿಟ್ಟಿದ್ದಾರೆ. ಈಗಾಗಲೇ ವಿದ್ಯಾನಂದನ ಮೇಲೆ ಆರ್ಮ್ಸ್ ಆಕ್ಟ್ ಅಡಿಯಲ್ಲಿ ಪ್ರಕರಣವಿದ್ದು, ಬಿಹಾರದ ಪರಿಚಿತ ವ್ಯಕ್ತಿಯೊಬ್ಬನಿಂದ ಗನ್ ಪಡೆದು ತಂದಿದ್ದೇವೆ ಎಂದು ಒಪ್ಪಿಕೊಂಡಿದ್ದಾರೆ. ಇದರ ಕುರಿತಾಗಿ ಪೋಲಿಸರು ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ ಎಂದು ಮಾಹಿತಿ ದೊರೆತಿದೆ.
