ಸತತ ಮೂರು ಮ್ಯಾಚ್ ಗಳನ್ನು ಗೆದ್ದು ಸೆಮಿಪೈನಲ್ಗೆ ಲಗ್ಗೆ ಇಟ್ಟಿರೋ ಹರ್ಮನ್ ಪ್ರೀತ್ ಕೌರ್ ನಾಯಕತ್ವದ ಟೀಮ್ಇಂಡಿಯಾ ಇಂದು ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಸೆಣಸಲಿದೆ. ಗುಂಪು ಹಂತದ ಕೊನೆಯ ಮ್ಯಾಚ್ ಇದಾಗಿದೆ. ಗಯಾನಾದ ಪ್ರಾವಿಡೆನ್ಸ್ ಅಂಗಳದಲ್ಲಿ ನಡೆಯುವ ಈ ಮ್ಯಾಚ್ ಔಪಚಾರಿಕವಾಗಿದ್ದು, ಆಸ್ಟ್ರೇಲಿಯಾ ಗುಂಪು ಹಂತದ ಮೂರೂ ಪಂದ್ಯಗಳಲ್ಲಿ ಜಯ ಸಾಧಿಸಿ ಸೆಮೀಸ್ಗೆ ಅರ್ಹತೆ ಗಿಟ್ಟಿಸಿಕೊಂಡಿದೆ. ಆದರೆ, ಬಲಿಷ್ಟ ಆಸೀಸ್ ವಿರುದ್ಧದ ಹೋರಾಟ ಕೌರ್ ಬಳಗಕ್ಕೆ ಮುಂದಿನ ಹಂತದ ಸಿದ್ಧತೆಗೆ ಉತ್ತಮ ಅವಕಾಶವಾಗಿದೆ.
ಟೂರ್ನಿಯ ಮೊದಲ ಮ್ಯಾಚ್ ನಲ್ಲಿ ಹರ್ಮನ್ಪ್ರೀತ್ ಕೌರ್ ತಮ್ಮ ಶಕತದ ಮೂಲಕ ಬಲ ತುಂಬಿದ್ರು. ನಂತರದ 2 ಮ್ಯಾಚ್ ಗಳಲ್ಲಿಯೂ ಅನುಭವಿ ಆಟಗಾರ್ತಿ ಮಿಥಾಲಿ ರಾಜ್ ತಾಳ್ಮೆಯ ಅರ್ಧಶತಕ ಸಿಡಿಸಿ ಬೌಲರ್ಗಳನ್ನು ಕಾಡಿದ್ದರು. ಹ್ಯಾಟ್ರಿಕ್ ಗೆಲುವಿನ ಹಿಂದೆ ಟೀಮ್ಇಂಡಿಯಾ ಬೌಲರ್ಗಳ ಶ್ರಮ ಕೂಡ ಮಹತ್ವದ್ದು. ವಿಶೇಷವಾಗಿ ದೀಪ್ತಿ ಶರ್ಮಾ, ರಾಧಾ ಯಾದವ್ ಮತ್ತು ಪೂನಮ್ ಯಾದವ್ ತಮ್ಮ ಸ್ಪಿನ್ ಕೈಚಳಕದಿಂದ ಮೋಡಿ ಮಾಡಿದ್ದಾರೆ. ಯುವ ಪ್ರತಿಭೆ ದಯಾಳನ್ ಹೇಮಲತಾ ಕೂಡ ಬ್ಯಾಟ್ಸ್ಮನ್ಗಳನ್ನ ಕಾಡಿದ್ದಾರೆ. ಇದೆ ವಿಶ್ವಾಸದೊಂದಿಗೆ ಟೀಮ್ಇಂಡಿಯಾ ಇಂದು ಕಣಕ್ಕಿಳಿಯಲಿದೆ.
ಕಳೆದ ಮೂರು ಪಂದ್ಯಗಳಲ್ಲಿ ಆಸ್ಟ್ರೇಲಿಯಾ ತಂಡವೂ ಶ್ರೇಷ್ಠ ಪ್ರದರ್ಶನ ನೀಡಿದೆ. ಮೊದಲ ಪಂದ್ಯದಲ್ಲಿ ಪಾಕಿಸ್ತಾನವನ್ನು 52 ರನ್ಗಳಿಂದ ಸೋಲಿಸಿದ್ದ ಮೆಗ್ ಲ್ಯಾನಿಂಗ್ ಪಡೆ, ನಂತರದ 2 ಹಣಾಹಣಿಯಲ್ಲಿ ಐರ್ಲೆಂಡ್ ವಿರುದ್ಧ 9 ವಿಕೆಟ್ ಹಾಗೂ ನ್ಯೂಜಿಲೆಂಡ್ ವಿರುದ್ಧ 33 ರನ್ಗಳ ಅಂತರದ ಜಯ ಸಾಧಿಸಿದೆ.
ಈ ಟೂರ್ನಿಯಲ್ಲಿ ಆಸ್ಟ್ರೇಲಿಯಾ ಪರ ಅತಿ ಹೆಚ್ಚು ರನ್ ಸಿಡಿಸಿದ ಆಟಗಾರ್ತಿಯಾಗಿರುವ ವಿಕೆಟ್ಕೀಪರ್ ಬ್ಯಾಟ್ಸ್ಮನ್ ಅಲೀಸಾ ಹೀಲಿ, ಬೆತ್ ಮೂನಿ, ಆಲ್ರೌಂಡರ್ ಎಲಿಸಿ ಪೆರ್ರಿ ಆಸೀಸ್ನ ಬ್ಯಾಟಿಂಗ್ ಶಕ್ತಿಯಾಗಿದ್ದಾರೆ. ಮೆಗನ್ ಸ್ಕಟ್, ಎಲ್ಲೀಸ್ ವಿಲಾನಿ, ಸೋಫಿ ಮೊಲಿನೆಕ್ಸ್ ತಂಡದ ಬೌಲಿಂಗ್ ಬಲವಾಗಿದ್ದಾರೆ.
ಒಟ್ಟಿನಲ್ಲಿ, ಟಿ-20 ವಿಶ್ವಕಪ್ನಲ್ಲಿ 3 ಬಾರಿಯ ಚಾಂಪಿಯನ್ ವಿರುದ್ಧ 8 ವರ್ಷಗಳ ಬಳಿಕ ಸೆಮಿಫೈನಲ್ ಪ್ರವೇಶಿಸಿರೋ ಟೀಮ್ಇಂಡಿಯಾದ ಹೋರಾಟ ಹೇಗಿರುತ್ತೆ ಅನ್ನೋದು ಎಲ್ಲರ ಕುತೂಹಲಕ್ಕೆ ಕಾರಣವಾಗಿದೆ. ಈಗಾಗಲೇ ಹ್ಯಾಟ್ರಿಕ್ ಜಯ ಸಾಧಿಸಿ ವಿಶ್ವಕಪ್ ಎತ್ತಿ ಹಿಡಿಯೋ ಕನಸು ಕಂಡಿರೋ ಟೀಮ್ಇಂಡಿಯಾ ವನಿತೆಯರಿಗೆ ಆಲ್ ದ ಬೆಸ್ಟ್..
-ವಸಂತ್ ಮಳವತ್ತಿ. ಸ್ಪೋರ್ಟ್ಸ್ ಬ್ಯೂರೋ, ಪವರ್ ಟಿವಿ
