ಬೆಂಗಳೂರು : ಆಸ್ಟ್ರೇಲಿಯಾ ಬೌಲರ್ ಮಿಚೆಲ್ ಸ್ಟಾರ್ಕ್ ಐಪಿಎಲ್ (IPL-2024) ಮಿನಿ ಹರಾಜಿನಲ್ಲಿ ಜಾಕ್ಪಾಟ್ ಹೊಡೆದಿದ್ದಾರೆ.
ಕೋಲ್ಕತಾ ನೈಟ್ ರೈಡರ್ಸ್ (Kolkata Knight Riders) ಫ್ರಾಂಚೈಸಿ ಸ್ಟಾರ್ಕ್ ಅವರನ್ನು ಬರೋಬ್ಬರಿ 24.75 ಕೋಟಿ ಕೊಟ್ಟು ಖರೀದಿಸಿದೆ. ಈ ಮೂಲಕ ಸ್ಟಾರ್ಕ್ ಈ ಹಿಂದಿನ ಎಲ್ಲಾ ದಾಖಲೆಗಳನ್ನು ಉಡೀಸ್ ಮಾಡಿದ್ದಾರೆ.
ವಿಶೇಷ ಅಂದ್ರೆ ಐಪಿಎಲ್ ಟೂರ್ನಿಯಲ್ಲಿ ಪ್ರತಿ ತಂಡ 14 ಪಂದ್ಯಗಳನ್ನು ಆಡಬೇಕಿದೆ. ಆ ಲೆಕ್ಕಾಚಾರದ ಪ್ರಕಾರ ಮಿಚೆಲ್ ಸ್ಟಾರ್ಕ್ ಪ್ರತಿ ಪಂದ್ಯಕ್ಕೆ 1.76 ಕೋಟಿ ಪಡೆಯುತ್ತಾರೆ. ಸ್ಟಾರ್ಕ್ ಒಂದು ಪಂದ್ಯದಲ್ಲಿ 4 ಓವರ್ ಮಾತ್ರ ಬೌಲ್ ಮಾಡಬೇಕಾಗಿರುತ್ತದೆ. ಪ್ರತಿ ಓವರ್ ಬೌಲ್ ಮಾಡಲು 44.19 ಲಕ್ಷ ರೂ. ಸಿಗುತ್ತದೆ. ಅಂದರೆ ಸ್ಟಾರ್ಕ್ ಒಂದು ಬಾಲ್ ಎಸೆಯಲು ಸುಮಾರು 7.36 ಲಕ್ಷ ರೂಪಾಯಿ ಜೇಬಿಗೆ ಇಳಿಸುತ್ತಾರೆ.
ಸ್ಟಾರ್ಕ್ಗಾಗಿ ಭಾರಿ ಪೈಪೋಟಿ
ಮಿಚೆಲ್ ಸ್ಟಾರ್ಕ್ 2 ಕೋಟಿ ಮೂಲ ಬೆಲೆಯೊಂದಿಗೆ ಹರಾಜಿನಲ್ಲಿ ಕಾಣಿಸಿಕೊಂಡಿದ್ದರು. ಈ ಮಾರಕ ವೇಗಿಯನ್ನು ಖರೀದಿಗೆ ಡೆಲ್ಲಿ, ಮುಂಬೈ, ಕೆಕೆಆರ್ ಹಾಗೂ ಗುಜರಾತ್ ಮಧ್ಯೆ ಭರ್ಜರಿ ಫೈಟ್ ನಡೆಯಿತು. ಅಂತಿಮವಾಗಿ ಕೆಕೆಆರ್ ತಂಡ ಬರೋಬ್ಬರಿ 24.75 ಕೋಟಿ ನೀಡಿ ಖರೀದಿಸಿತು. ಸದ್ಯ ಐಪಿಎಲ್ ಹರಾಜಿನಲ್ಲಿ ಬಿಕರಿಯಾದ ಸಾರ್ವಕಾಲಿಕ ಗರಿಷ್ಠ ಮೊತ್ತವಾಗಿದೆ. ಆಸ್ಟ್ರೇಲಿಯಾ ನಾಯಕ ಪ್ಯಾಟ್ ಕಮ್ಮಿನ್ಸ್ 20.50 ಕೋಟಿ ಬಿಕರಿಯಾದರು. ಈ ಹಿಂದೆ ಸ್ಯಾಮ್ ಕರ್ರನ್ 18.50 ಕೋಟಿ, ಕ್ಯಾಮರೂನ್ ಗ್ರೀನ್ 17.50 ಕೋಟಿಗೆ ಬಿಕರಿಯಾಗಿದ್ದರು.
Welcome back, record-breaker! 🫡 pic.twitter.com/KwSZui8GBj
— KolkataKnightRiders (@KKRiders) December 19, 2023
