ಚಂದನವನದಲ್ಲಿ ಒಂದ್ ಕಡೆ ಸ್ಟಾರ್ ನಟರ ಸಿನಿಮಾಗಳು ವಿಶ್ವಮಟ್ಟದಲ್ಲಿ ಸದ್ದು ಮಾಡ್ತಾ ಇದ್ರೆ, ಇನ್ನೊಂದೆಡೆ ಹೊಸಬರು ಹವಾಳಿ ಇಡುತ್ತಿದ್ದಾರೆ. ಇದೀಗ ಮತ್ತೊಂದು ಹೊಸ ಟೀಮ್ ಚಿತ್ರರಸಿಕರ ಮನಗೆಲ್ಲಲು ಬರ್ತಿದೆ. 6-5 = 2 ಖ್ಯಾತಿಯ ಡೈರೆಕ್ಟರ್ ಆ ಸಿನಿಮಾಕ್ಕೆ ಆ್ಯಕ್ಷನ್ ಕಟ್ ಹೇಳ್ತಿದ್ದಾರೆ.
2013ರಲ್ಲಿ ತೆರೆಕಂಡಿದ್ದ 6-5=2 ಸಿನಿಮಾ ಖ್ಯಾತಿಯ ಡೈರೆಕ್ಟರ್ ಅಶೋಕ್ ಕೆ.ಎಸ್ ‘ದಿಯಾ’ ಎಂಬ ಸಸ್ಪೆನ್ಸ್ ಥ್ರಿಲ್ಲರ್ ಸಿನಿಮಾ ಮೂಲಕ ಕಮ್ಬ್ಯಾಕ್ ಆಗ್ತಿದ್ದಾರೆ. ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದ್ದು ನಿರೀಕ್ಷೆಯನ್ನು ಹುಟ್ಟುಹಾಕಿದೆ. ಪ್ರೊಡ್ಯೂಸರ್ ಕೃಷ್ಣ ಚೈತನ್ಯ ನಿರ್ಮಾಣದ ‘ದಿಯಾ’ ಮೂಲಕ ಹೊಸಬರು ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡ್ತಿದ್ದಾರೆ.
ದೀಕ್ಷಿತ್ ಮತ್ತು ಪೃಥ್ವಿ ಅಂಬಾರ್ ‘ದಿಯಾ’ ನಾಯಕರು. ಖುಷಿ ಈ ಚಿತ್ರದ ನಾಯಕಿ. ದೀಕ್ಷಿತ್ ಪ್ರೀತಿ ಎಂದರೇನು, ಸಾಕ್ಷಿ ಧಾರವಾಹಿ ಮೂಲಕ ಕಿರುತೆರೆಯಲ್ಲಿ ಗುರುತಿಸಿಕೊಂಡಿದ್ದು, ಸದ್ಯ ನಾಗಿಣಿ ಸೀರಿಯಲ್ನಿಂದ ಬಹು ದೊಡ್ಡ ಜನಪ್ರಿಯತೆಗಳಿಸಿದ್ದಾರೆ. ಕಿರಿತೆರೆಯ ಸ್ಟಾರ್ ದೀಕ್ಷಿತ್ ದಿಯಾ ಮೂಲಕ ಸ್ಯಾಂಡಲ್ವುಡ್ಗೆ ಎಂಟ್ರಿಕೊಡ್ತಿದ್ದಾರೆ.
ಇನ್ನೊಬ್ಬ ನಾಯಕ ನಟ ಪೃಥ್ವಿ ಅಂಬಾರ್ ಮೂಲತಃ ಆರ್ಜೆ. ತುಳು ಚಿತ್ರರಂಗದಲ್ಲಿ ಛಾಪು ಮೂಡಿಸಿರುವ ಇವರು ರಾಧಾ ಕಲ್ಯಾಣ, ಲವಲವಿಕೆ, ಸಾಗರ ಸಂಭ್ರಮ ಧಾರವಾಹಿಗಳಿಂದ ಕನ್ನಡ ಕಿರುತೆರೆಯಲ್ಲಿ ಗುರುತಿಸಿಕೊಂಡಿದ್ದಾರೆ. ಈ ಹಿಂದೆ ಕನ್ನಡದಲ್ಲಿ ರಾಜರು ಮತ್ತು ಡಿ.ಕೆ ಬಾಸ್ ಸಿನಿಮಾದಲ್ಲಿ ನಟಿಸಿದ್ದರು. ದಿಯಾದಿಂದ ಒಂದೊಳ್ಳೆ ಬ್ರೇಕ್ ಸಿಗುವ ನಿರೀಕ್ಷೆಯಲ್ಲಿದ್ದಾರೆ.
ಇನ್ನು ಉಗ್ರಂ ಖ್ಯಾತಿಯ ತಿಲಕ್‌ ಶೇಖರ್‌ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ದಿಯಾಗೆ ವಿಶಾಲ್ ವಿಠಲ್, ಸೌರಭ್ ವಾಘ್ ಮರೆ ಅವರ ಛಾಯಗ್ರಹಣವಿದೆ. ಅಜನೀಶ್ ಲೋಕನಾಥ್ ಹಿನ್ನೆಲೆ ಸಂಗೀತ ನೀಡಿದ್ದು, ಸಿನಿಮಾ ನವೆಂಬರ್ 8ರಂದು ರಿಲೀಸ್ ಆಗಲಿದ್ದು, ದಿಯಾ ಕಮಾಲ್ ಮಾಡುತ್ತಾ ಕಾದು ನೋಡೋಣ.
