ದ್ವಾರಕೀಶ್ .. ಸ್ಯಾಂಡಲ್ವುಡ್ನ ‘ಪ್ರಚಂಡ ಕುಳ್ಳ’ ಕನ್ನಡಿಗರ ಪ್ರೀತಿಯ ನಟ, ನಿರ್ದೇಶಕ, ನಿರ್ಮಾಪಕ. ಚಂದನವನಕ್ಕೆ ಇವರು ನೀಡಿದ ಕೊಡುಗೆ ಅಪಾರ. ದ್ವಾರಕೀಶ್ ಸಿನಿ ಜರ್ನಿಗೀಗ 50ನೇ ವರ್ಷದ ಸಂಭ್ರಮ. ದ್ವಾರಕೀಶ್ ಚೊಚ್ಚಲ ಸಿನಿಮಾ ನಿರ್ಮಿಸಿ ಈ ವರ್ಷಕ್ಕೆ ಬರೋಬ್ಬರಿ 50 ವರ್ಷ. ಈ ಸುದೀರ್ಘ ಜರ್ನಿಯ ಬಗ್ಗೆ ದ್ವಾರಕೀಶ್ ಕೂಡ ತುಂಬಾ ಖುಷಿಯಾಗಿದ್ದಾರೆ.
ಹೌದು.. ಅದು 1969 ಮೇಯರ್ ಮುತ್ತಣ್ಣ ಸಿನಿಮಾ ರಿಲೀಸ್ ಆಗಿ ಸಖತ್ ಸದ್ದು ಮಾಡಿತ್ತು. ಡಾ.ರಾಜ್ಕುಮಾರ್ ಅಭಿನಯದ ಮೇಯರ್ ಮುತ್ತಣ್ಣ ಎವರ್ ಗ್ರೀನ್ ಮೂವಿ. ಇವತ್ತು ಮತ್ತೆ ರೀ ರಿಲಿಸ್ ಆದ್ರೂ ಪಕ್ಕಾ 100 ಡೇಟ್ ಓಡುತ್ತೆ..! ಈ ಸೂಪರ್ ಹಿಟ್ ಮೂವಿಯನ್ನು ನಿರ್ಮಿಸಿದ್ದು ಕನ್ನಡಿಗರ ಪ್ರೀತಿಯ ಕುಳ್ಳ ದ್ವಾರಕೀಶ್ ಅವರು. ಇದು ದ್ವಾರಕೀಶ್ ನಿರ್ಮಾಣದ ಚೊಚ್ಚಲ ಚಿತ್ರ.
ಮೇಯರ್ ಮುತ್ತಣ್ಣ ತೆರೆಕಂಡು ಈ ವರ್ಷಕ್ಕೆ 50 ವರ್ಷ ಆಗುತ್ತೆ. ಅಂತೆಯೇ ದ್ವಾರಕೀಶ್ ಸಿನಿ ಪಯಣಕ್ಕೂ 50 ವರ್ಷದ ಹಬ್ಬ..! ಈ ಸುದೀರ್ಘ ಪಯಣದಲ್ಲಿ ದ್ವಾರಕೀಶ್ ಅನೇಕ ಏಳು-ಬೀಳುಗಳನ್ನು ಕಂಡಿದ್ದಾರೆ. ಗೆದ್ದಿದ್ದಾರೆ… ಸೋತಿದ್ದಾರೆ.. ಸೋತು ಮತ್ತೆ ಗೆದ್ದಿದ್ದಾರೆ. ಭಾರತದಿಂದಾಚೆಗೆ ಅಂದರೆ ವಿದೇಶದಲ್ಲಿ ಕನ್ನಡ ಸಿನಿಮಾ ಮಾಡಿದ ಮೊಟ್ಟ ಮೊದಲ ಸ್ಯಾಂಡಲ್ವುಡ್ ನಿರ್ಮಾಪಕ ಕೂಡ ನಮ್ಮ ಈ ದ್ವಾರಕೀಶ್ . 1978ರಲ್ಲಿ ಸಿಂಗಾಪುರದಲ್ಲಿ ರಾಜಕುಳ್ಳ ಸಿನಿಮಾವನ್ನು ದ್ವಾರಕೀಶ್ ನಿರ್ಮಿಸಿದ್ದರು. ಆ ಸಿನಿಮಾ ವಿದೇಶದಲ್ಲಿ ಚಿತ್ರೀಕರಣವಾದ ಮೊದಲ ಕನ್ನಡ ಸಿನಿಮಾ.
ಅದೇನೇ ಇರಲಿ. ದ್ವಾರಕೀಶ್ ನಟ, ನಿರ್ದೇಶಕ, ನಿರ್ಮಾಪಕರಾಗಿ ಸಾಕಷ್ಟು ಹೆಸರು, ಜನಪ್ರಿಯತೆಗಳಿಸಿದ್ದಾರೆ. ಚಿತ್ರರಂಗದಲ್ಲಿ 50 ವರ್ಷದ ಸುಂದರ ಪಯಣ ಅವರದ್ದು. 50ನೇ ವರ್ಷದ ಸಡಗರಲ್ಲಿ ದ್ವಾರಕೀಶ್ ಆಯುಷ್ಮಾನ್ ಭವ ಎಂಬ ಸಿನಿಮಾ ನಿರ್ಮಿಸಿದ್ದಾರೆ. ವಿಶೇಷ ಅಂದ್ರೆ ಈ ಸಿನಿಮಾ ನಾಯಕ ಕರುನಾಡ ಚಕ್ರವರ್ತಿ, ಹ್ಯಾಟ್ರಿಕ್ ಹೀರೋ ಶಿವರಾಜ್ಕುಮಾರ್.
ದ್ವಾರಕೀಶ್ ನಿರ್ಮಾಣದ ಮೊದಲ ಮೇಯರ್ ಮುತ್ತಣ್ಣ ಸಿನಿಮಾದ ನಾಯಕ ವರನಟ ಡಾ. ರಾಜ್ಕುಮಾರ್. ಇಂದು 50ನೇ ವರ್ಷದ ಪಯಣದ ಸಂಭ್ರಮದಲ್ಲಿ ನಿರ್ಮಾಣ ಮಾಡಿರುವ ಆಯುಷ್ಮಾನ್ ಭವ ಸಿನಿಮಾ ನಾಯಕ ರಾಜ್ ಅವರ ಪುತ್ರ ಶಿವರಾಜ್ಕುಮಾರ್. ಈ ಬಗ್ಗೆ ಸಂತಸದಿಂದ ಮಾತಾಡಿರೋ ದ್ವಾರಕೇಶ್ ಇದು ಕಾಕತಾಳಿಯ… ರಾಘವೇಂದ್ರ ಸ್ವಾಮಿಯ ಆಶೀರ್ವಾದ. ಹೀಗಾಗಿ 50ವರ್ಷಕ್ಕೆ ಸಿಂಕ್ ಆಗಿದೆ. ನಾನು ಹೀಗೇ ಆಗಬೇಕು ಅಂತ ಶಿವರಾಜ್ಕುಮಾರ್ ಅವರ ಸಿನಿಮಾ ನಿರ್ಮಾಣ ಮಾಡೋ ಪ್ಲಾನ್ ಮಾಡಿಕೊಂಡಿದ್ದಲ್ಲ ಅಂತ ಹೇಳಿದ್ದಾರೆ.
ಆಯುಷ್ ಮನ್ ಭವ ಸಿನಿಮಾ ಪ್ರೆಸ್ ಮೀಟ್ನಲ್ಲಿ ಮಾತನಾಡಿದ ಅವರು, ರಾಜ್ಕುಮಾರ್,. ವಿಷ್ಣುವರ್ಧನ್, ಅಂಬರೀಶ್, ಶಂಕರ್ ನಾಗ್, ರಜನಿಕಾಂತ್ ಅವರೊಡನೆಯ ಸ್ನೇಹವನ್ನು ಸ್ಮರಿಸಿಕೊಂಡ್ರು. ತನ್ನ ಈ ಸುಧೀರ್ಘ ಯಶಸ್ವಿ ಪಯಣ ತನ್ನೊಬ್ಬನ ಸಾಧನೆಯಲ್ಲ ನನ್ನ ಜೊತೆಗಿದ್ದ ಎಲ್ಲರ ಸಹಕರಾದಿಂದ ಇದು ಸಾಧ್ಯವಾಯ್ತು ಅಂತ ಜೊತೆಗಿದ್ದವರಿಗೆಲ್ಲಾ ಧನ್ಯವಾದ ಹೇಳಿದ್ರು.
ಇನ್ನು ಆಯುಷ್ಮಾನ್ ಭವ ಸಿನಿಮಾವನ್ನು ಆ್ಯಕ್ಷನ್ ಕಟ್ ಹೇಳಿರೋದು ಡೈರೆಕ್ಟರ್ ಪಿ.ವಾಸು. ಈ ಸಿನಿಮಾದಲ್ಲಿ ಶಿವಣ್ಣಗೆ ನಾಯಕಿ ರಚಿತಾ ರಾಮ್. ಸದ್ಯ ಸಿನಿಮಾದ ಪೋಸ್ಟ್ ಪ್ರೊಡಕ್ಷನ್ ವರ್ಕ್ಡ್ ನಡೀತಾ ಇದ್ದು, ನವೆಂಬರ್ ಸಿನಿಮಾ ರಿಲೀಸ್ ಆಗೋ ಸಾಧ್ಯತೆ ಇದೆ.