ಬೆಂಗಳೂರು : ಈ ಲೇಡಿ ಹೆಲ್ಮೆಟ್ ಹಾಕಲ್ಲ. ಸಿಗ್ನಲ್ನಲ್ಲಿ ನಿಲ್ಲಲ್ಲ. ಒನ್ ವೇ ಲೆಕ್ಕಕ್ಕೇ ಇಲ್ಲ. ಹೀಗೆ, ಒಂದಲ್ಲ, ಎರಡಲ್ಲ ಬರೋಬ್ಬರಿ 270 ಬಾರಿ ಟ್ರಾಫಿಕ್ ರೂಲ್ಸ್ ಬ್ರೇಕ್ ಮಾಡಿದ್ದಾಳೆ ಕಿಲಾಡಿ ಲೇಡಿ!
ಬೆಂಗಳೂರಿನಲ್ಲಿ ಮಹಿಳೆಯೊಬ್ಬರು ಸಂಚಾರಿ ನಿಯಮಗಳನ್ನು ಗಾಳಿಗೆ ತೂರಿ ನಗರದಲ್ಲಿ ಜಾಲಿಯಾಗಿ ಸುತ್ತಾಡಿದ್ದಾರೆ. ಮಹಿಳೆಯ ಕಿಲಾಡಿತನ ಸಂಚಾರಿ ಪೊಲೀಸರ ಕಣ್ಣಿಗೆ ಬಿದ್ದಿದೆ. ಮಾಡಿದ ತಪ್ಪಿಗೆ ಮಹಿಳೆಯಿಂದ 1.36 ಲಕ್ಷ ದಂಡ ಕಕ್ಕಿಸಿದ್ದಾರೆ ಪೊಲೀಸರು.
KA03 JE5705 ನಂಬರ್ನ ಆ್ಯಕ್ಟೀವಾ ಬೈಕ್ ಮೇಲೆ ಈ ಮಹಿಳೆ ಸುತ್ತಾಡಿದ್ದಾರೆ. ಹೆಲ್ಮೆಟ್ ಹಾಕದೆ, ಮೊಬೈಲ್ನಲ್ಲಿ ಮಾತನಾಡುತ್ತಾ ಓಡಾಡಿದ್ದಾರೆ. ಅಲ್ಲದೆ, ಟ್ರಾಫಿಕ್ ಪೊಲೀಸರಿಗೆ ಯಾಮಾರಿಸಲು ಈ ಲೇಡಿ ನಂಬರ್ ಪ್ಲೇಟ್ ಮರೆಮಾಚಿ ಸುತ್ತಾಡಿದ್ದಾರೆ.
ಪ್ರಕರಣ ಬೆಳಕಿಗೆ ಬಂದಿದ್ದು ಹೇಗೆ?
ಬೆಂಗಳೂರಿನ ಸುಧಾಮನಗರದಲ್ಲಿ ಸಂಚಾರ ನಿಮಯ ಬ್ರೇಕ್ ಮಾಡಿದ್ದನ್ನು ಸಾರ್ವಜನಿಕರು ಫೋಟೋ ತೆಗೆದು ಎಕ್ಸ್ ಖಾತೆಯಲ್ಲಿ ಫೋಸ್ಟ್ ಮಾಡಿದ್ದರು. ಸಂಚಾರಿ ಪೊಲೀಸರಿಗೆ ಟ್ಯಾಗ್ ಮಾಡಿ, ದಂಡ ವಸೂಲಿ ಮಾಡುವಂತೆ ಮನವಿ ಮಾಡಿದ್ದರು.
ಕ್ಯಾಮೆರಾದಲ್ಲಿ ಲೇಡಿ ನಿಜಬಣ್ಣ ಬಯಲು
ಈ ಪೋಸ್ಟ್ ಕಂಡ ಪೊಲೀಸರು ಸಿಗ್ನಲ್ಗಳಲ್ಲಿ ಅಳವಡಿಸಿದ್ದ ಕ್ಯಾಮೆರಾ ಪರಿಶೀಲನೆ ಮಾಡಿದ್ದಾರೆ. ಆಗ ಈ ಚಾಲಾಕಿ ಲೇಡಿಯ ನಿಜಬಣ್ಣ ಬಯಲಾಗಿದೆ. ಸಂಚರಿಸುವ ಈ ಮಹಿಳೆ 270 ಬಾರಿ ಸಂಚಾರಿ ನಿಯಮ ಬ್ರೇಕ್ ಮಾಡಿರುವುದು ಖಾಕಿ ಕಣ್ಣಿಗೆ ಬಿದ್ದಿದೆ. ಈ ರೀತಿ 270 ಬಾರಿ ಸಂಚಾರಿ ನಿಯಮ ಉಲ್ಲಂಘನೆ ಮಾಡಿದ ಮಹಿಳೆಗೆ ಪೊಲೀಸರು 1,36,000 ಸಾವಿರ ದಂಡ ವಿಧಿಸಿದ್ದಾರೆ.
