ಬೆಂಗಳೂರು : ದಸರಾ ಬಾಕ್ಸ್ ಆಫೀಸ್ ದಂಗಲ್ನಲ್ಲಿ ಭಾಗಿಯಾದ ನಾಲ್ಕು ಪ್ಯಾನ್ ಇಂಡಿಯಾ ಮೂವಿಗಳಲ್ಲಿ ಎರಡು ನೆಲಕಚ್ಚಿವೆ. ಇನ್ನೆರಡು ಅಬ್ಬರಿಸಿ, ಆರ್ಭಟಿಸುತ್ತಿವೆ. ಬಾಲಯ್ಯ, ಶಿವಣ್ಣ, ವಿಜಯ್ ಹಾಗೂ ರವಿತೇಜಾರಲ್ಲಿ ಸಿಹಿ ಯಾರಿಗೆ? ಕಹಿ ಯಾರಿಗೆ ಗೊತ್ತಾ?
- ಠುಸ್ ಆದ ಲಿಯೋ, ಭಗವಂತ್.. ಸಿಡಿದ ಘೋಸ್ಟ್ & ಟೈಗರ್
- ಮೊದಲ ಬಾರಿ ಎಡವಿದ ಕನಕರಾಜ್, ಬಾಲಯ್ಯ ಕೂಡ ನಿಧಾನ
- ಡಾ. ಶಿವಣ್ಣನ ಗ್ಯಾಂಗ್ಸ್ಟರ್ ಪವರ್.. ಟೈಗರ್ ರೆಟ್ರೋ ಖದರ್
- ದಸರಾ ಬಾಕ್ಸ್ ಆಫೀಸ್ ದಂಗಲ್ನಲ್ಲಿ ಬಿಗ್ ಸ್ಟಾರ್ಸ್ ಕಾದಾಟ
ದಸರಾ ಹಬ್ಬ ಬಂದರೆ ಸಾಲು ಸೂಪರ್ ಸ್ಟಾರ್ ಸಿನಿಮಾಗಳು ಬೆಳ್ಳಿತೆರೆಗೆ ಅಪ್ಪಳಿಸುತ್ತವೆ. ಈ ಬಾರಿಯ ದಸರಾಗೂ ನಾಲ್ಕು ಬಿಗ್ ಬಜೆಟ್ ಚಿತ್ರಗಳು ತೆರೆಗಪ್ಪಳಿಸಿವೆ. ಘೋಸ್ಟ್, ಭಗವಂತ್ ಕೇಸರಿ, ಟೈಗರ್ ನಾಗೇಶ್ವರ ರಾವ್ ಹಾಗೂ ಲಿಯೋ ಸಿನಿಮಾ ಸಿನಿ ಪ್ರೇಕ್ಷಕರ ಉತ್ಸಾಹವನ್ನು ಡಬಲ್ ಮಾಡಿವೆ.
ಶಿವರಾಜ್ಕುಮಾರ್ ಅವರ ಘೋಸ್ಟ್ ಸಿನಿಮಾ ತೆಲುಗು ಹೊರತುಪಡಿಸಿ ವಿಶ್ವದಾದ್ಯಂತ ಕನ್ನಡ, ತೆಲುಗು, ತಮಿಳು ಹಾಗೂ ಮಲಯಾಳಂನಲ್ಲಿ ತೆರೆಗೆ ಬಂದಿದೆ. ಶ್ರೀನಿ ನಿರ್ದೇಶನದಲ್ಲಿ ಶಿವಣ್ಣ ಮೂರು ವೆರೈಟಿ ಶೇಡ್ಸ್ನಲ್ಲಿ ಒರಿಜಿನಲ್ ಗ್ಯಾಂಗ್ಸ್ಟರ್ ಪವರ್ ತೋರಿದ್ದು, ವಿಂಟೇಜ್ ಲುಕ್ಸ್ಗೆ ಶಿಳ್ಳೆ, ಚಪ್ಪಾಳೆ ಗಿಟ್ಟಿಸಿದ್ದಾರೆ. ಬಾಕ್ಸ್ ಆಫೀಸ್ ನಲ್ಲಿ ಕೋಟಿ ಕೋಟಿ ಲೂಟಿ ಮಾಡ್ತಿರೋ ಘೋಸ್ಟ್, ಪರಭಾಷಾ ಚಿತ್ರಗಳಿಗೆ ಸೆಡ್ಡು ಹೊಡೆದು ಗಟ್ಟಿಯಾಗಿ ನೆಲೆ ನಿಂತಿದೆ.
ಘೋಸ್ಟ್ ಜೊತೆ ಟಾಲಿವುಡ್ನ ಟೈಗರ್ ನಾಗೇಶ್ವರರಾವ್ ಕೂಡ ದಸರಾ ವಿಶೇಷ ಪ್ಯಾನ್ ಇಂಡಿಯಾ ಸಿನಿಮಾ ಆಗಿ ರಾರಾಜಿಸ್ತಿದೆ. ರವಿತೇಜಾ ನಟನೆಯ ಟೈಗರ್, ಸ್ಟುವರ್ಟ್ಪುರಂನ ದರೋಡೆಕೋರನ ಕಥೆಯಾಗಿದ್ದು, 70ರ ದಶಕದ ಮೋಸ್ಟ್ ವಾಂಟೆಟ್ ಕ್ರಿಮಿನಲ್ನ ಕಥೆ ಎಕ್ಸ್ಪ್ಲೋರ್ ಮಾಡಿದೆ. ಮಾಸ್ ಮಹಾರಾಜನ ಗತ್ತು, ಗಮ್ಮತ್ತಿಗೆ ಬಾಕ್ಸ್ ಆಫೀಸ್ ಶೇಕ್ ಆಗ್ತಿದ್ದು, ದೇಶಾದ್ಯಂತ ಜನ ಒಳ್ಳೆಯ ಪ್ರಶಂಸೆ ಹಾಗೂ ಪ್ರತಿಕ್ರಿಯೆಗಳಿಂದ ಸಿನಿಮಾನ ಹಾಡಿ, ಹೊಗಳುತ್ತಿದ್ದಾರೆ.
ಭಗವಂತ್ ಕೇಸರಿ ಹಾಗೂ ಲಿಯೋ ಡಲ್
ಲಿಯೋ.. ದಳಪತಿ ವಿಜಯ್ ನಟನೆಯ ಈ ಸಿನಿಮಾ ಲೋಕೇಶ್ ಕನಕರಾಜ್ ಸಿನಿಮ್ಯಾಟಿಕ್ ಯೂನಿವರ್ಸ್ ಚಿತ್ರವಾಗಿದ್ದು, ನಿರೀಕ್ಷಿತ ಮಟ್ಟ ತಲುಪುವಲ್ಲಿ ವಿಫಲವಾಗಿದೆ. ತಮಿಳುನಾಡಿನ ವಿಜಯ್ ಫ್ಯಾನ್ಸ್ ನಿರೀಕ್ಷೆ ಹುಸಿ ಆಗಿಸಿದ್ದಾರೆ ಡೈರೆಕ್ಟರ್ ಲೋಕೇಶ್. ಸಾಲು ಸಾಲು ಸಕ್ಸಸ್ಫುಲ್ ಸಿನಿಮಾಗಳ ಸರದಾರ ಅನಿಸಿಕೊಂಡಿದ್ದ ಲೋಕೇಶ್ ಕನಕರಾಜ್, ದೊಡ್ಡ ಮಟ್ಟದಲ್ಲಿ ಎಡವಿದ್ದಾರೆ. ವಿಜಯ್ ಜೊತೆ ಸಂಜಯ್ ದತ್, ತ್ರಿಶಾ, ಅರ್ಜುನ್ ಸರ್ಜಾ ಅಂತಹ ಘಟಾನುಘಟಿ ಸ್ಟಾರ್ಸ್ ಇದ್ದರೂ ಸಕ್ಸಸ್ ಕಾಣದೇ ಇರೋದು ದುರಂತ.
ಘೋಸ್ಟ್ ಮತ್ತು ಟೈಗರ್ಗೆ ಪ್ಲಸ್
ಇನ್ನು ಸೋಲಿಲ್ಲದ ಲಿವಿಂಗ್ ಲೆಜೆಂಡ್ ಆಗಿ ಮಾಸ್ ಪ್ರಿಯರಿಗೆ ಥ್ರಿಲ್ ನೀಡ್ತಾ ಬರ್ತಿದ್ದಂತಹ ನಂದಮೂರಿ ಬಾಲಕೃಷ್ಣ ನಟನೆಯ ಭಗವಂತ್ ಕೇಸರಿ ಕೂಡ ಠುಸ್ ಆಗಿದೆ. ಸ್ಯಾಂಪಲ್ಸ್ನಲ್ಲಿ ಅಬ್ಬರಿಸಿ, ಬೊಬ್ಬರಿದ ಈ ಸಿನಿಮಾ ರಿಲೀಸ್ ಬಳಿಕ ಯಾಕೋ ಭರವಸೆಯನ್ನ ಚಿಕ್ಕದಾಗಿಸಿದೆ. ನೋಡುಗರಿಗೆ ಸಿನಿಮಾ ಅಷ್ಟಾಗಿ ರುಚಿಸದೇ ಹೋಗ್ತಿದೆ. ಒಟ್ಟಾರೆ ಭಗವಂತ್ ಕೇಸರಿ ಹಾಗೂ ಲಿಯೋ ಡಲ್ ಹೊಡೀತಿರೋದು ಘೋಸ್ಟ್ ಮತ್ತು ಟೈಗರ್ಗೆ ಪ್ಲಸ್ ಆಗ್ತಿದೆ.
- ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಪವರ್ ಟಿವಿ
