ಬೀದರ್ : ಮೂರು ತಿಂಗಳ ಹಿಂದೆ ಟೊಮೊಟೋ ಬೆಳೆ ಅಂದರೆ ಬಂಗಾರದ ಬೆಳೆ ಎಂಬಂತಾಗಿತ್ತು. ಒಂದು ಎಕರೆಯಲ್ಲಿ ಟೊಮೊಟೋ ಬೆಳೆ ಇದ್ದರೆ ಸಾಕು ಅಬ್ಬಬ್ಬಾ ಲಕ್ಷಾಧಿಪತಿ ಎನ್ನುತ್ತಿದ್ದರು. ಆದರೆ ಈಗ ಟೊಮೊಟೋ ದರದಲ್ಲಿ ಧಿಡೀರ್ ಕುಸಿತದಿಂದ ಬೀದರ್ ರೈತ ಸಂಕಷ್ಟಕ್ಕೆ ಸಿಲುಕಿದ್ದಾರೆ.
ರೈತರ ಪರಿಸ್ಥಿತಿ ಒಂದು ರೀತಿ ಲಾಟರಿ ಖರೀದಿಸಿದ ಹಾಗೆ ಆಗಿದೆ. ಲಾಟರಿ ಹತ್ತಿದರೇ ಲಕ್ಷಾಧಿಪತಿ, ಕೋಟ್ಯಾಧಿಪತಿ ಆಗಬಹುದು, ಲಾಟರಿ ಬರಲಿಲ್ಲ ಅಂದ್ರೆ ರೋಡಲ್ಲಿ ಮಲಗುವ ಸ್ಥಿತಿ. ಬೀದರ್ನ ಬಡ ಕುಟುಂಬದ ರೈತನ ಪರಿಸ್ಥಿತಿ ಅದೇ ಆಗಿದೆ.
ಬಡ್ಡಿಯಿಂದ 5 ಲಕ್ಷದವೆಗೂ ಸಾಲ ತಂದು 3 ಎಕರೆ ಜಮೀನನಲ್ಲಿ ಟೊಮೊಟೋ ಹಾಕಿದ್ದೇವೆ. ಮಾರುಕಟ್ಟೆಯಲ್ಲಿ ಸೂಕ್ತ ಬೆಲೆ ಸಿಗುತ್ತಿಲ್ಲ. ನಾವು ಈಗ ಏನೂ ಮಾಡಬೇಕೊ ದಿಕ್ಕು ತೋಚದಂತಾಗಿದೆ ಎಂದು ಬೀದರ್ನ ಭಾಲ್ಕಿ ತಾಲೂಕಿನ ಹಾಲಹಿಪ್ಪರ್ಗಾ ಗ್ರಾಮದ ರೈತ ವೈಜಿನಾಥ್ ಗೋಳು.
5 ಲಕ್ಷಕ್ಕೂ ಅಧಿಕ ಖರ್ಚು
ಟೊಮೊಟೋ ಬೆಳೆಗೆ ಭರ್ಜರಿ ಬೆಲೆ ಸಿಗುತ್ತಿದೆ ಎಂದು 3 ತಿಂಗಳ ಹಿಂದೆ 5 ಲಕ್ಷಕ್ಕೂ ಅಧಿಕ ಹಣ ಖರ್ಚು ಮಾಡಿ 3 ಎಕರೆ ಭೂಮಿಯಲ್ಲಿ ಟೊಮೊಟೋ ಬೆಳೆದ ರೈತ ಸಂಕಷ್ಟಕ್ಕೆ ಸಿಲುಕಿದ್ದಾನೆ. ಟೊಮೊಟೋ ಕಟಾವು ಮಾಡಿ ಮಾರುಕಟ್ಟೆಗೆ ತೆಗೆದುಕೊಂಡು ಹೋದರು ಕಟಾವಿನ ಕೂಲಿ ಹಣ ಸಿಗದಂತ ಪರಿಸ್ಥಿತಿ ನಿರ್ಮಾಣಗೊಂಡಿದೆ.
ಕೇವಲ 5 ರೂ.ಗೆ ಖರೀದಿ
3 ತಿಂಗಳ ಹಿಂದೆ ಕಿಲೋಗೆ 120 ರಿಂದ 150 ರೂ. ಇದ್ದ ಟೊಮೊಟೋ ಈಗ ಕೇವಲ 20 ರಿಂದ 25 ರೂ. ಇದೆ. ಅಂದು ಒಂದು ಕ್ಯಾರೆಟ್ಗೆ 2 ಸಾವಿರ ಇತ್ತು. ಇವತ್ತು ಒಂದು ಕ್ಯಾರೆಟ್ ಟೊಮೊಟೋಗೆ 200 ರಿಂದ 300 ಕೊಡುತ್ತಿದ್ದಾರೆ. ಅಂದ್ರೆ ರೈತರಿಂದ ಡಿಲರ್ಗಳು ಕೇವಲ 5 ರೂ.ನಂತೆ ಖರೀಸುತ್ತಿದ್ದಾರೆ. ಅಂದಿನ ದರ ನೋಡಿ ಸಾಲ ಮಾಡಿ ಟೊಮೊಟೋ ಬೆಳೆದ ರೈತನ ಕುಟುಂಬದಲ್ಲಿಗ ವಿಘ್ನ ಶುರುವಾಗಿದೆ.
ರೈತನಿಗೆ ಒಮ್ಮೆ ಅತಿವೃಷ್ಠಿ, ಮತ್ತೊಮ್ಮೆ ಅನಾವೃಷ್ಠಿ ಸ್ಥಿತಿ ದೆವ್ವ-ಭೂತಗಳಂತೆ ಕಾಡುತ್ತಿರುತ್ತವೆ. ಎಲ್ಲಾ ಸರಿಯಾಗಿ ಬಂದರೂ ಬೆಂಬಲ ಬೆಲೆ ಸಿಗದೇ ಬೆಳೆದ ಬೆಳೆ ರಸ್ತೆಯಲ್ಲಿ ಬಿಸಾಕುವಂತ ಸ್ಥಿತಿ ನಿರ್ಮಾಣವಾಗುತ್ತದೆ. ಅಂತದೆ ಪರಿಸ್ಥಿತಿ ರೈತ ವೈಜಿನಾಥ್ಗೂ ಬಂದಿದೆ. ಈ ರೈತನ ಕಣ್ಣೋರಿಸುವ ಕೆಲಸ ಸರ್ಕಾರ ಮಾಡಬೇಕಾಗಿದೆ.
