ಮಂಗಳೂರು : ಕೌಟುಂಬಿಕ ಕಲಹ ಹಿನ್ನೆಲೆಯಲ್ಲಿ ಗಂಡನ ಮನೆ ತೊರೆದು ತವರು ಮನೆ ಸೇರಿದ್ದ ಹೆಂಡ್ತಿಯೊಬ್ಬಳು ಪತಿ ವಿರುದ್ಧವೇ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾಳೆ.
ಮಂಗಳೂರು ಜಿಲ್ಲೆಯ ಕದ್ರಿ ಪೊಲೀಸ್ ಠಾಣೆಯಲ್ಲಿ ಈ ವಿಭಿನ್ನ ಪ್ರಕರಣ ದಾಖಲಾಗಿದೆ. ಪತಿಯೇ ಚಿನ್ನಾಭರಣ ಕಳವು ಮಾಡಿದ್ದಾಗಿ ಪತ್ನಿ ಪೊಲೀಸರಿಗೆ ದೂರು ನೀಡಿದ್ದಾಳೆ.
ಕದ್ರಿ ನಿವಾಸಿ ಇಲ್ಯಾಸ್ ಹಾಗೂ ಪತ್ನಿ ಮಧ್ಯೆ ಕಲಹ ಉಂಟಾಗಿತ್ತು. ಈ ದಂಪತಿ ಕದ್ರಿ ಕೆಪಿಟಿ ಬಳಿಯ ಫ್ಲಾಟ್ನಲ್ಲಿ ವಾಸವಿದ್ದರು. ಮದುವೆ ಸಮಯದಲ್ಲಿ ಇಲ್ಯಾಸ್ಗೆ ವರದಕ್ಷಿಣೆ ರೂಪದಲ್ಲಿ ಅರ್ಧ ಕಿಲೋಗೂ ಹೆಚ್ಚು ಚಿನ್ನ ನೀಡಿದ್ದರು. ಆ ಚಿನ್ನವನ್ನು ಇಲ್ಯಾಸ್ ಪತ್ನಿ ಮನೆಯ ಕಪಾಟಿನಲ್ಲಿಟ್ಟಿದ್ದಳು.
ಬ್ಯಾಂಕಿನಲ್ಲಿ 28 ಲಕ್ಷ ರೂ. ಸಾಲ
ಗಂಡ-ಹೆಂಡತಿ ಮಧ್ಯೆ ಜಗಳ ಇಬ್ಬರನ್ನೂ ದೂರ ಮಾಡಿತ್ತು. ಗಂಡನ ಕಿರುಕುಳದಿಂದ ಬೇಸತ್ತ ಪತ್ನಿ ತವರು ಮನೆಯಲ್ಲಿ ವಾಸವಿದ್ದಳು. ವಾರದ ಹಿಂದೆ ಗಂಡನ ಫ್ಲಾಟ್ಗೆ ತೆರಳಿ ನೋಡಿದಾಗ 75 ಪವನ್ ಚಿನ್ನ ಕಾಣೆಯಾಗಿತ್ತು. ಈ ಬಗ್ಗೆ ಗಂಡ ಇಲ್ಯಾಸ್ನನ್ನು ಕೇಳಿದಾಗ, ನಾನೇ ಚಿನ್ನ ಕಳವು ಮಾಡಿಕೊಂಡು ಹೋಗಿದ್ದೇನೆ. ಏನು ಮಾಡ್ತೀಯಾ? ಎಂದು ಧಮ್ಕಿ ಹಾಕಿದ್ದಾನೆ.
ಚಿನ್ನವನ್ನು ಅಡವಿಟ್ಟು ಬ್ಯಾಂಕಿನಲ್ಲಿ 28 ಲಕ್ಷ ರೂಪಾಯಿ ಸಾಲ ಪಡೆದಿರುವುದು ಪತ್ನಿ ಗಮನಕ್ಕೆ ಬಂದಿದೆ. ಅಲ್ಲದೆ, ಬಡ್ಡಿ ಕಟ್ಟಲು ಪ್ರಭಾಕರ್ ಎಂಬಾತನಿಗೆ ಇಲ್ಯಾಸ್ ತಿಳಿಸಿದ್ದನು. ಪ್ರಭಾಕರ್ 12 ಲಕ್ಷದ ಚಿನ್ನವನ್ನು ಪಡೆದು ಮಾರಾಟ ಮಾಡಿದ್ದಾನೆ ಎಂದು ಮಹಿಳೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾಳೆ.
