ಬೆಂಗಳೂರು : ಬೆಳ್ಳಿತೆರೆಯಲ್ಲಿ ಕಬ್ಜ ವರ್ಲ್ಡ್ ಅನಾವರಣಗೊಳ್ಳೋಕೆ ಎರಡೇ ದಿನ ಬಾಕಿ ಉಳಿದಿದೆ. ಬರೋಬ್ಬರಿ ನಾಲ್ಕು ಸಾವಿರ ಸ್ಕ್ರೀನ್ಸ್ನಲ್ಲಿ ವರ್ಲ್ಡ್ ಬಾಕ್ಸ್ ಆಫೀಸ್ ಕಬ್ಜಾಗೆ ಇಳಿಯಲಿರೋ ಇಂಡಿಯನ್ ರಿಯಲ್ ಸ್ಟಾರ್ಗೆ ಪ್ರೇಕ್ಷಕಪ್ರಭುಗಳು ಬಕಪಕ್ಷಿಗಳಂತೆ ಕಾಯುತ್ತಿದ್ದಾರೆ. ಆನ್ಲೈನ್ ಟಿಕೆಟ್ ಬುಕಿಂಗ್ ಜೋರಾಗಿದ್ದು, ಸಿನಿಪ್ರೇಮಿಗಳು ಈಗಾಗ್ಲೇ ಟಿಕೆಟ್ಸ್ ಕಬ್ಜ ಮಾಡ್ತಿದ್ದಾರೆ.
ಹೌದು, ಕಬ್ಜ ಕ್ರೇಜ್ ಯಾವ ರೇಂಜ್ಗಿದೆ ಅಂದ್ರೆ, ಸ್ವತಃ ಬಾಲಿವುಡ್ ಮಂದಿಯೇ ಹಿಂದಿಯಲ್ಲಿ ತಯಾರಾದ ಬಿಗ್ಗೆಸ್ಟ್ ಮೂವಿ ಅನ್ನೋ ರೀತಿ ಭಾವಿಸ್ತಿದ್ದಾರೆ. ಕಬ್ಜ ಟೀಸರ್, ಟ್ರೈಲರ್ ಹಾಗೂ ಸಾಂಗ್ಸ್ ಸ್ಯಾಂಪಲ್ಗಳಿಗೆ ಅಕ್ಷರಶಃ ಫಿದಾ ಆಗಿದ್ದಾರೆ. ಬರೀ ಬಾಲಿವುಡ್ ಮಂದಿಯಷ್ಟೇ ಅಲ್ಲ, ಪಕ್ಕದ ತೆಲುಗು, ತಮಿಳು ಹಾಗೂ ಮಲಯಾಳಂನಲ್ಲೂ ಕಬ್ಜ ಕಣ್ತುಂಬಿಕೊಳ್ಳೋಕೆ ಬಹಳ ಕಾತರರಾಗಿದ್ದಾರೆ.
ಚಂದ್ರು ಕನಸಿನ ಕೂಸು ಕಬ್ಜ
ಟ್ರೆಂಡ್ ಸೆಟ್ಟರ್ ಉಪೇಂದ್ರ ಲೀಡ್ನಲ್ಲಿರೋ ಕಬ್ಜದಲ್ಲಿ ಅಭಿನಯ ಚಕ್ರವರ್ತಿ ಸುದೀಪ್ ಹಾಗೂ ಕರುನಾಡ ಚಕ್ರವರ್ತಿ ಶಿವರಾಜ್ಕುಮಾರ್ ಕೂಡ ಇರೋದ್ರಿಂದ ಸಿನಿಮಾ ಮೇಲೆ ಸಹಜವಾಗಿಯೇ ನಿರೀಕ್ಷೆಗಳು ಗರಿಗೆದರಿವೆ. ಅದರಲ್ಲೂ ನಿಬ್ಬೇರಗಾಗೋ ಅಂತಹ ಅಲ್ಟಿಮೇಟ್ ಮೇಕಿಂಗ್ ಚಿತ್ರದ ಅಸಲಿ ಸ್ಟ್ರೆಂಥ್ ಅಂದ್ರೆ ತಪ್ಪಾಗಲ್ಲ. ಪ್ಯಾಷನೇಟ್ ಡೈರೆಕ್ಟರ್ ಆರ್ ಚಂದ್ರು ಸಿನಿಮೋತ್ಸಾಹದ ಕೈಗನ್ನಡಿ, ಕನಸಿನ ಕೂಸು ಈ ಕಬ್ಜ.
ತಾಯಿ-ಮಕ್ಕಳ ಎಮೋಷನಲ್ ಬಾಂಡಿಂಗ್
ರೆಟ್ರೋ ಅಂಡರ್ವರ್ಲ್ಡ್ ಕಥಾನಕವಾಗಿರೋ ಕಬ್ಜದಲ್ಲಿ ಸ್ವತಂತ್ರಪೂರ್ವ ಭಾರತದ ಬ್ಯಾಕ್ಡ್ರಾಪ್ ಕಾಣಸಿಗಲಿದೆ. ದೇಶಪ್ರೇಮದ ಕಿಚ್ಚು ಇದೆ. ತಾಯಿ-ಮಕ್ಕಳ ಎಮೋಷನಲ್ ಬಾಂಡಿಂಗ್ ಇದೆ. ಸಹೋದರರಿಬ್ಬರ ರಕ್ತಸಂಬಂಧದ ಅನುಬಂಧವಿದೆ. ಬ್ರಿಟಿಷ್ ಗವರ್ನರ್, ಪ್ರಧಾನಮಂತ್ರಿಗಳ ಆಡಳಿತದ ಗತವೈಭವವಿದೆ. ಎಲ್ಲಕ್ಕಿಂತ ಮಿಗಿಲಾಗಿ ಹೈ ವೋಲ್ಟೇಜ್ ಌಕ್ಷನ್ ಸೀಕ್ವೆನ್ಸ್, ಮಚ್ಚು- ಲಾಂಗ್ಗಳ ಮೊರೆತ, ಗನ್-ಪಿಸ್ತೂಲ್ಗಳ ಗುಂಡಿನ ಕಾಳಗವಿದೆ. ಭಯಾನಕ ರಕ್ತಸಿಕ್ತ ಅಧ್ಯಾಯದ ಕರಾಳ ಕ್ಷಣಗಳ ಚಿತ್ರಣ ಕಾಣಸಿಗಲಿದೆ.
ಇದನ್ನೂ ಓದಿ : ಯುಗಾದಿಗೆ ಬ್ಯಾಡ್ ಮ್ಯಾನರ್ಸ್ ಸರ್ಪ್ರೈಸ್
ಮಾರ್ಚ್ 17ಕ್ಕೆ ಗ್ರ್ಯಾಂಡ್ ರಿಲೀಸ್
ಕಂಪೋಸರ್ ರವಿ ಬಸ್ರೂರು, ಆರ್ಟ್ ಡೈರೆಕ್ಟರ್ ಶಿವಕುಮಾರ್, ಸಿನಿಮಾಟೋಗ್ರಾಫರ್ ಎ.ಜೆ ಶೆಟ್ಟಿ ಅಂತಹ ಘಟಾನುಘಟಿ ಟೆಕ್ನಿಷಿಯನ್ಗಳ ಕೈಚಳಕವಿರೋ ಕಬ್ಜ ರಿಲೀಸ್ಗೆ ಇನ್ನೆರಡೇ ದಿನ ಬಾಕಿಯಿದೆ. ಮುಂಬೈ, ಚೆನ್ನೈ, ಹೈದ್ರಾಬಾದ್ ಸುತ್ತಿ ಬಂದಿರೋ ಕಬ್ಜ ಟೀಂ, ಎಲ್ಲೆಡೆ ಸಖತ್ ಹವಾ ಇಟ್ಟು, ಹೈಪ್ ಕ್ರಿಯೇಟ್ ಮಾಡಿದೆ. ವಿಶ್ವದಾದ್ಯಂತ ಇದೇ ಮಾರ್ಚ್ 17ಕ್ಕೆ ಕಬ್ಜ ಗ್ರ್ಯಾಂಡ್ ಆಗಿ ತೆರೆಗಪ್ಪಳಿಸಲಿದೆ.
ಆಂಧ್ರ- ತೆಲಂಗಾಣದಲ್ಲಿ ಸುಧಾಕರ್ ರೆಡ್ಡಿ, ಹಿಂದಿಯಲ್ಲಿ ಆನಂದ್ ಪಂಡಿತ್, ತಮಿಳಿನಲ್ಲಿ ಲೈಕಾ ಪ್ರೊಡಕ್ಷನ್ಸ್ ಹೀಗೆ ದೊಡ್ಡ ದೊಡ್ಡ ಡಿಸ್ಟ್ರಿಬ್ಯೂಟರ್ಗಳೇ ಕಬ್ಜ ಸಿನಿಮಾದ ರೈಟ್ಸ್ನ ಕಬ್ಜ ಮಾಡಿರೋದ್ರಿಂದ, ರಿಲೀಸ್ ನೆಕ್ಸ್ಟ್ ಲೆವೆಲ್ಗೆ ಇರಲಿದೆ. ಅಲ್ಲದೆ, ಆನ್ಲೈನ್ ಟಿಕೆಟ್ ಬುಕಿಂಗ್ ಈಗಾಗ್ಲೇ ಶುರುವಾಗಿದ್ದು, ಮೈಸೂರಿನ ಡಿಆರ್ಸಿ ಹಾಗೂ ಬೆಂಗಳೂರಿನ ಪಿವಿಆರ್ ಒರಾಯನ್ನಲ್ಲಿ ಜನ ಮುಗಿಬಿದ್ದು ಟಿಕೆಟ್ಸ್ನ ಕಾಯ್ದಿರಿಸುತ್ತಿದ್ದಾರೆ.
ಒಟ್ಟಾರೆ ಸಾವಿರ ಕೋಟಿ ಬಾಕ್ಸ್ ಆಫೀಸ್ ಲೆಕ್ಕಾಚಾರಗಳು ನಡೆಯುತ್ತಿದ್ದು, ಕೆಜಿಎಫ್, ಕಾಂತಾರ ನಂತ್ರ 500 ಕೋಟಿ, ಸಾವಿರ ಕೋಟಿ ಕ್ಲಬ್ಗೆ ಸೇರುವ ಸೂಚನೆ ಸಿಕ್ಕಿದೆ.
- ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಪವರ್ ಟಿವಿ
