ಬೆಂಗಳೂರು : ಬೆಸ್ಕಾಂ, ಕ್ರೆಡಿಟ್ ಕಾರ್ಡ್, ಬ್ಯಾಂಕ್ ವ್ಯವಹಾರ ಎಲ್ಲದರಲ್ಲೂ ಆನ್ಲೈನ್ ವಂಚಕರು ಮೂಗು ತೂರಿಸಿ ಸಾಕಷ್ಟು ವಂಚನೆ ಮಾಡುತ್ತಿದ್ದಾರೆ. ಈಗ ಫುಡ್ ಡಿಲಿವರಿ ವ್ಯವಸ್ಥೆಗೂ ಕಾಲಿಟ್ಟಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಆಹಾರ ವ್ಯಾಪಾರದ ಜಾಹೀರಾತು ಬಿಡುತ್ತಾರೆ. ಅದನ್ನು ಕ್ಲಿಕ್ ಮಾಡಿ ಅಲ್ಲಿ ನೀಡಿದ ಇನ್ಸ್ಟ್ರಕ್ಷನ್ನಂತೆ ನಡೆದರೆ ಸಾಕು, ನಿಮ್ಮ ಖಾತೆಯಿಂದ ಲಕ್ಷಗಟ್ಟಲೆ ಹಣ ಇದ್ದಕ್ಕಿದ್ದಂತೆ ಮಂಗಮಾಯ ಆಗುತ್ತದೆ. ಹೀಗೆ ಹಲವು ಮಂದಿ ಆಹಾರದ ಹೆಸರಿನಲ್ಲಿ ಲಕ್ಷ ಲಕ್ಷ ಲೂಟಿಗೊಳಗಾಗಿದ್ದಾರೆ. ಖಾಂಧಾನಿ ರಾಜಧಾನಿ ಫುಡ್, ರುಚಿ ಸಾಗರ್ ಹೆಸರಿನಲ್ಲಿ ನಕಲಿ ಆ್ಯಪ್ಗಳು ಕಾರ್ಯ ಪ್ರವೃತ್ತವಾಗಿವೆ. ಆ್ಯಪ್ ಡೌನ್ಲೋಡ್ ಮಾಡಿ ಫುಡ್ ಆರ್ಡರ್ ಮಾಡಲು ಇವು ಆಮಿಷ ಒಡ್ಡುತ್ತವೆ. ಝೊಮಾಟೋ, ಸ್ವಿಗ್ಗಿಯಂತೆ ಕಾರ್ಯನಿರ್ವಹಿಸುವ ಆ್ಯಪ್ ಎಂದು ತಿಳಿದು ಡೌನ್ಲೋಡ್ ಮಾಡಿಕೊಂಡರೋ ಮುಗಿತು, ನಂತರ ಲಿಂಕ್ ಕ್ಲಿಕ್ ಮಾಡಿ ಕ್ರೆಡಿಟ್ ಕಾರ್ಡ್, ಡೆಬಿಟ್ ಕಾರ್ಡ್ ಮಾಹಿತಿಗಳನ್ನು ತುಂಬಲು ಸೂಚನೆ ಬರುತ್ತದೆ.
ಕಾರ್ಡ್ ನಂಬರ್ ಅವರಿಗೆ ಸಿಕ್ಕಿದರೆ ಸಾಕು ಹಂತ ಹಂತವಾಗಿ ಹಣ ಮಾಯವಾಗುತ್ತದೆ. ಹೀಗೆ ಇಮ್ರಾನ್ ಉಲ್ಲಾ ಖಾನ್ ಎಂಬುವರು 2 ಲಕ್ಷದ 23 ಸಾವಿರ ಹಣ ಕಳೆದುಕೊಂಡಿದ್ದಾರೆ. ದೀಪಿಕಾ ಎಂಬುವವರೂ ಹಣ ಕಳೆದುಕೊಂಡಿದ್ದು, ಈ ಸಂಬಂಧ ಬೆಂಗಳೂರಿನ ಪೊಲೀಸ್ ಠಾಣೆಯೊಂದರಲ್ಲಿ ದೂರು ದಾಖಲಾಗಿದೆ.
