ಮನರಂಜನಾ ಲೋಕದ ಬಾಲಿವುಡ್ ತಾರೆ. ಅರವತ್ತು, ಎಪ್ಪತ್ತರ ದಶಕದಲ್ಲಿ ಹಿಂದಿ ಚಿತ್ರರಂಗದಲ್ಲಿ ಮಿಂಚಿದ ಮೋಹಕ ನಟಿ ಆಶಾ ಪಾರೇಖ್. ಸಿನಿಮಾ ಲೋಕಕ್ಕೆ ನೀಡಿದ ಅಪಾರ ಕೊಡುಗೆಯನ್ನು ಪರಿಗಣಿಸಿ ಇದೀಗ ಇವ್ರಿಗೆ ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿ ಮುಡಿಗೇರಿದೆ. ಬಾಲಿವುಡ್ ಕ್ವೀನ್ ಆಶಾ ಪಾರೇಖ್ಗೂ ಬೆಂಗಳೂರಿಗೂ ನಂಟಿದೆ. ಯೆಸ್. ನಿಮಗೂ ಗೊತ್ತಿಲ್ಲದ ಇಂಟ್ರೆಸ್ಟಿಂಗ್ ಕಹಾನಿ ತಿಳಿಸ್ತೀವಿ ನೀವೇ ಓದಿ.
ಹಿಟ್ ಗರ್ಲ್.. ಬಾಲಿವುಡ್ ಜುಬಿಲಿ ಗರ್ಲ್ ಬಿರುದಿನ ಅಪ್ಸರೆ
ಬಾಲಿವುಡ್ನಲ್ಲಿ ಹಿಟ್ ಗರ್ಲ್ ಎಂದೇ ಖ್ಯಾತಿ ಬ್ಯುಟಿಫುಲ್ ನಟಿ ಆಶಾ ಪಾರೇಖ್. ಅರವತ್ತು ಎಪ್ಪತ್ತರ ದಶಕದಲ್ಲಿ ಹಿಂದಿ ಚಿತ್ರರಂಗದಲ್ಲಿ ಸೂಪರ್ ಹಿಟ್ ಸಿನಿಮಾಗಳ ಮೂಲಕ ಪ್ರಖ್ಯಾತಿ ಪಡೆದ ಸಹಜ ಸುಂದ್ರಿ. ಇವ್ರ ಎಲ್ಲಾ ಸಿನಿಮಾಗಳು ಏನಿಲ್ಲಾ ಅಂದ್ರೂ 50 ದಿನಗಳ ಕಾಲ ತಪ್ಪದೇ ಓಡುತ್ತಿದ್ದವು. ಹಾಗಾಗಿಯೇ ಇವ್ರಿಗೆ ಮುಲಾಜಿಲ್ಲದೆ ಸಿಕ್ಕ ಬಿರುದು ಹಿಟ್ ಗರ್ಲ್.
ಅಸಲಿಗೆ ವಿಷ್ಯ ಇದಲ್ಲ. ಭಾರತೀಯ ಚಿತ್ರರಂಗದ ಪ್ರತಿಷ್ಟಿತ 52ನೇ ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿ ಆಶಾ ಪಾರೇಖ್ ಪಾಲಾಗಿದೆ. ಯೆಸ್.. ದೇವಿಕಾ ರಾಣಿ ಅನಾದಿಯಾಗಿ ರಾಜ್ ಕಪೂರ್, ಅಮಿತಾಬ್ ಭಚ್ಚನ್, ರಜಿನಿಕಾಂತ್ ಅಂತಹ ಘಟಾನುಘಟಿಗಳಿಗೆ ಒಲಿದು ಬಂದಿರೋ ಗೌರವಾನ್ವಿತ ಪ್ರಶಸ್ತಿ ಈ ಬಾರಿ ಆಶಾಗೆ ಒಲಿದಿರೋದು ಹೆಮ್ಮೆಯ ವಿಚಾರ. ಜತೆಗೆ ಸಿಲ್ವರ್ ಜೂಬಿಲಿ, ಗೋಲ್ಡನ್ ಜೂಬಿಲಿ ಖ್ಯಾತಿಯ ಆಶಾಗೆ ಬೆಂಗಳೂರು ಕಾಟನ್ಪೇಟೆ ನಂಟಿತ್ತು ಅನ್ನೋದು ಸರ್ಪರೈಸಿಂಗ್ ಸುದ್ದಿ.
ಯೆಸ್.. ಆಶಾ ಹುಟ್ಟು ಜಾಲಾಡಿದ್ರೆ ಹುಟ್ಟೂರು ಬಾಂಬೆ ಅಂತಾ ತೋರಿಸುತ್ತೆ. ಆದ್ರೆ ಈ ಜನಪ್ರಿಯ ನಟಿ ಹುಟ್ಟಿದ್ದು ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ. ಐಟಿ ಸಿಟಿಯ ಕಾಟನ್ಪೇಟೆಯಲ್ಲಿ ವಾಸವಾಗಿದ್ದ ಮೋಸ್ಟ್ ಗಾರ್ಜಿಯಸ್ ಬ್ಯೂಟಿ ಕಟಿಪತಂಗ್ವರೆಗೂ ಬೆಳೆದದ್ದು ರೋಚಕ. ಶಾಸ್ತ್ರೀಯ ನೃತ್ಯ ಕಲಿತಿದ್ದ ಆಶಾ 1952 ರಲ್ಲಿ ಮಾ ಚಿತ್ರದಲ್ಲಿ ಬಾಲನಟಿಯಾಗಿ ಮಿಂಚಿದ್ರು. ನಂತ್ರ 16 ನೇ ವಯಸ್ಸಿನಲ್ಲಿ ಶಮ್ಮೀ ಕಪೂರ್ ಜತೆಗೆ ದಿಲ್ ದೇಖೆ ದೇಖೋ ಸಿನಿಮಾ ಮೂಲಕ ಸ್ಟಾರ್ ನಟಿಯಾದ್ರೂ. ಆನಂತರ ನಡೆದಿದ್ದು ಇತಿಹಾಸ.
95 ಸಿನಿಮಾಗಳಲ್ಲಿ ಜಗಮಗಿಸಿದ ಆಶಾ ಸಂಸಾರಿಕ ಜೀವನದಿಂದ ದೂರ ಉಳಿದ್ರು. ತೀಸ್ರಿ ಮಂಜಿಲ್, ಮೇರೆ ಸನಮ್, ಮೇರೆ ಗಾಂವ್ ಮೇರಾ ದೇಶ್ ಸೇರಿ ಅನೇಕ ಸಿನಿಮಾಗಳು ಹಿಟ್ ಲಿಸ್ಟ್ ಸೇರಿವೆ. ರಾಜೇಶ್ ಕನ್ನಾ ಜತೆಗಿನ ಕಟಿಪತಂಗ್ ಸೂಪರ್ ಹಿಟ್ ಸಿನಿಮಾವಾಗಿ ದಾಖಲೆ ಬರೆಯಿತು. ಶಮ್ಮಿ, ಶಶಿ, ರಾಜೇಶ್ ಖನ್ನಾ ಜತೆ ಸೊಂಟ ಬಳುಕಿಸಿದ ಅನಭಿಷಿಕ್ತ ರಾಣಿ ಆಶಾ. ಸೀರಿಯಲ್ಗಳ ನಿರ್ಮಾಣ, ನಿರ್ದೇಶನದಲ್ಲಿ ಬ್ಯುಸಿಯಾಗಿದ್ದ ಆಶಾ ಪಾರೇಖ್ಗೆ ಫಿಲ್ಮ್ ಫೇರ್, ಪದ್ಮಶ್ರೀ ಸೇರಿ ಅನೇಕ ಪ್ರಶಸ್ತಿಗಳು ಬಂದಿವೆ.
ಬಣ್ಣದ ಲೋಕದಲ್ಲಿ ಹಾಡು, ನೃತ್ಯದ ಜತಗೆ ಭರ್ಜರಿ ಮನರಂಜನೆಯ ರಸದೌತಣ ನೀಡಿದ ಮೆಚ್ಚಿನ ನಟಿ ಆಶಾ ಪಾರೇಖ್ಗೆ ದಾದಾ ಸಾಹೇಬ್ ಪ್ರಶಸ್ತಿ ನೀಡಿದ್ದು ಸ್ವಾಗತಾರ್ಹ. ಗಾರ್ಡನ್ ಸಿಟಿ ಚೆಲುವೆಯ ಈ ಸಾಧನೆ ಇತರರಿಗೂ ಮಾದರಿಯಾಗಲಿ.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯೂರೋ, ಪವರ್ ಟಿವಿ
