ದಿ ವೆಯ್ಟ್ ಈಸ್ ಓವರ್. ಅಪ್ಪು ವಿಷ್ಣುವಿನ ಅವತಾರದಲ್ಲಿ ಧರೆಗಿಳಿದಿದ್ದಾರೆ. ಕೋಟ್ಯಂತರ ಅಭಿಮಾನಿಗಳ ಅಮರ ಪ್ರೇಮದ ನಾಯಕ, ಸನ್ ಆಫ್ ಬಂಗಾರದ ಮನುಷ್ಯ ಲಕ್ಕಿಮ್ಯಾನ್ ಮೂಲಕ ತೆರೆಯ ಮೇಲೆ ಮಿಂಚಿದ್ದಾರೆ. ಪ್ರೇಕ್ಷಕರು ಅಪ್ಪುನ ಕಂಡು ಕಣ್ಣೀರಾಕಿದ್ದಾರೆ. ಜನಮಾನಸದ ಜನಾರ್ಧನ ಅಪ್ಪು ಹಾಗೂ ಡಾರ್ಲಿಂಗ್ ಕೃಷ್ಣ ಅಭಿನಯದ ಲಕ್ಕಿಮ್ಯಾನ್ ಚಿತ್ರಕ್ಕೆ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿದೆ. ಹೇಗಿತ್ತು ಅಪ್ಪು ಎಂಟ್ರಿ..?ಸಿನಿಮಾದ ಕಥೆ ಏನು..? ಪಾಸಿಟಿವ್, ನೆಗೆಟಿವ್ ಅಂಶಗಳೇನು..? ಕಂಪ್ಲೀಟ್ ರಿಪೋರ್ಟ್ ನಿಮಗಾಗಿ ಕಾಯ್ತಿದೆ. ನೀವೇ ಓದಿ.
- ಲಕ್ಕಿಮ್ಯಾನ್ ಥಿಯೇಟರ್ಸ್ನಲ್ಲಿ ಮುಗಿಲು ಮುಟ್ಟಿದ ಸಂಭ್ರಮ
ಭಕ್ರ ಪ್ರಹ್ಲಾದ ಸಿನಿಮಾದಲ್ಲಿ ಹರಿಭಕ್ತನಾಗಿ ಎಲ್ಲರ ಕಣ್ಮನ ಸೂರೆ ಮಾಡಿದ್ದ ಪುಟಾಣಿ ಅಪ್ಪು ಇಂದು ತೆರೆಯ ಮೇಲೆ ತಾವೇ ಹರಿಯಾಗಿದ್ದಾರೆ. ವಿಷ್ಣುವಿನ ಅವತಾರದಲ್ಲಿ ಲಕ್ಕಿಮ್ಯಾನ್ ಚಿತ್ರದ ಮೂಲಕ ಎಲ್ಲರಿಗೂ ಜೀವನ ಪಾಠ ಹೇಳುವ ಯುವರತ್ನನನ್ನು ಕಂಡು ಪ್ರೇಕ್ಷಕರಂತು ಭಾವುಕರಾಗಿದ್ರು. ಅವರ ಮಾತು, ನುಡಿ, ಮುಖದ ಮೇಲಿನ ಮುದ್ದು ನಗು ಚಿತ್ರಪ್ರೇಮಿಗಳ ಹೃದಯ ಕಲಕುತ್ತಿತ್ತು. ಲಕ್ಕಿಮ್ಯಾನ್ ಸಿನಿಮಾ ಅಪ್ಪು ಅಭಿಮಾನಿಗಳ ಪಾಲಿಗೆ ಲಕ್ಕಿಯೆಸ್ಟ್ ಸಿನಿಮವಾಗಿದೆ.
ಕರುನಾಡಿನ 140ಕ್ಕೂ ಅಧಿಕ ಚಿತ್ರಮಂದಿರಗಳಲ್ಲಿ ಲಕ್ಕಿಮ್ಯಾನ್ ದರ್ಬಾರ್ ಶುರುವಾಗಿದೆ. ಅಪ್ಪು ಕಟೌಟ್ಗಳು ಮುಗಿಲ ಚುಂಬಿಸುತ್ತಿವೆ. ಪ್ರೀತಿಸುವ ಭಕ್ತರಿಗೆ ವಿಷ್ಣುವಾಗಿ, ಆಲಿಂಗಿಸುವ ಪ್ರೇಮಿಗಳಿಗೆ ಏಸುವಾಗಿ, ಅರಿಯುವ ಜನತೆಗೆ ಅಲ್ಲಾ ಆಗಿ, ಶಾಂತಿ ಬಯಸುವವರಿಗೆ ಬುದ್ಧನಾಗಿ ನೀತಿ ಪಾಠ ಮಾಡಿದ್ದಾರೆ ಅಪ್ಪು. ಸಿನಿಮಾ ಆರಂಭದಿಂದ ಕೊನೆಯವರೆಗೂ ಅಪ್ಪು ಝೇಂಕಾರದ ಕಹಳೆ ಮೊಳಗಿದೆ. ಯೆಸ್.. ಎಲ್ಲಾ ಥಿಯೇಟರ್ಗಳಲ್ಲೂ ಒಂದೇ ನಾದ ನಿನಾದ. ಅಪ್ಪು..ಅಪ್ಪು..ಅಪ್ಪು..ಅಪ್ಪು..
ನಗರದ ನರ್ತಿಕಿ ಥಿಯೇಟರ್ನಲ್ಲಿ ಫ್ಯಾನ್ಸ್ ಸಂಭ್ರಮ ಮುಗಿಲು ಮುಟ್ಟಿತ್ತು. ನಾಟ್ಯಲೋಕ ಡ್ಯಾನ್ಸ್ ಮಕ್ಕಳಿಂದ ಅಪ್ಪುಗೆ ನೃತ್ಯಾರ್ಪಣೆ ಮಾಡಲಾಯ್ತು. ಅಪ್ಪು ಎಂಟ್ರಿಗೆ ಪ್ರೇಕ್ಷಕರೆಲ್ಲಾ ಎದ್ದು ನಿಂತು ಭಕ್ತಿಯಿಂದ ಕೈ ಮುಗಿದ್ರು. ಅಂತೂ ಲಕ್ಕಿಮ್ಯಾನ್ ಚಿತ್ರಕ್ಕೆ ರಾಜ್ಯಾದ್ಯಂತ ಗ್ರ್ಯಾಂಡ್ ವೆಲ್ಕಮ್ ಸಿಕ್ತು.
ಚಿತ್ರ: ಲಕ್ಕಿಮ್ಯಾನ್
ನಿರ್ದೇಶನ: ಎಸ್. ನಾಗೇಂದ್ರ ಪ್ರಸಾದ್
ನಿರ್ಮಾಣ: ಸುಂದರ ಕಾಮರಾಜ್
ಸಂಗೀತ: ವಿಜಯ್ ವಿಕ್ಕಿ
ಸಿನಿಮಾಟೋಗ್ರಫಿ: ಜೀವ ಶಂಕರ್
ತಾರಾಗಣ: ಡಾರ್ಲಿಂಗ್ ಕೃಷ್ಣ, ಸಂಗೀತ ಶೃಂಗೇರಿ, ರೋಶಿನಿ ಪ್ರಕಾಶ್, ನಾಗಭೂಷಣ್, ಸುಂದರ್ ರಾಜ್, ಸಾಧು ಕೋಕಿಲ, ರಂಗಾಯಣ ರಘು, ಯೋಗರಾಜ್ ಭಟ್, ಸುಧಾ ಬೆಳವಾಡಿ, ಮಾಳ್ವಿಕಾ ಅವಿನಾಶ್ ಮುಂತಾದವರು.
ಲಕ್ಕಿಮ್ಯಾನ್ ಸ್ಟೋರಿಲೈನ್
ಕಷ್ಟ ಆದ್ರೂ ಪರವಾಗಿಲ್ಲ ಇಷ್ಟ ಇಲ್ಲದ ಕೆಲಸ ಮಾಡಬಾರದು ಅನ್ನೋದು ಲೋಕಾರೂಡಿ. ಶ್ಯಾಮ ಸುಂದರ ಕೃಷ್ಣ ಕೂಡ ಅರ್ಜುನನಿಗೆ ಅದನ್ನೇ ಗೀತೋಪದೇಶ ಮಾಡಿ ಸಂದಿಗ್ಧ ಪರಿಸ್ಥಿತಿಯಲ್ಲಿ ಕಣ್ಣು ತೆರೆಸಿದ್ದರು. ಲಕ್ಕಿಮ್ಯಾನ್ ಚಿತ್ರದಲ್ಲಿ ಪೇಚಿಗೆ ಸಿಕ್ಕು ಒದ್ದಾಡುವ ನಾಯಕ ಅರ್ಜುನನಿಗೆ, ಕೃಷ್ಣನಾಗಿ ಅಪ್ಪು ಅವತರಿಸಿದ್ದಾರೆ. ಬದುಕಿಗೆ ಹೊಸ ಅರ್ಥ ಕಲ್ಪಿಸಿದ್ದಾರೆ. ಜೀವನದಲ್ಲಿ ಯಾರೂ ಕೂಡ ಕನ್ಫ್ಯೂಶನ್ನಲ್ಲಿ ನಿರ್ಧಾರ ತಗೋಬಾರ್ದು. ಪಾಪ ನಮ್ ಹೀರೋ ಬೆಸ್ಟ್ ಫ್ರೆಂಡ್ ಮದ್ವೆ ಆಗ್ತಿಯಾ ಅಂತ ಕೇಳಿದ್ರೆ, ನೋ ಅನ್ನಲ್ಲ. ಥಟ್ ಅಂತ ಕುಡಿದ ಅಮಲಿನಲ್ಲಿ ಯೆಸ್ ಅಂದ್ಬಿಡ್ತಾನೆ. ಕೈಯಲ್ಲಿ ಕೆಲಸ ಇಲ್ಲ, ಜೇಬಲ್ಲಿ ದುಡ್ಡಿಲ್ಲ. ಮಾವ ಕೆಲಸ ಕೊಟ್ಟು, ಮಗಳನ್ನು ಕೊಡೋವಷ್ಟು ಉದಾರಿ. ಕಲ್ಯಾಣ ಭಾಗ್ಯವೂ ಲೀಲಾಜಾಲವಾಗಿ ನಡೆದು ಹೋಗುತ್ತೆ. ಕಾಲರ್ ಹಿಡಿದು ಕಿತ್ತಾಡಿದ ಗೆಳತಿ ಜತೆ ಕೈ ಹಿಡಿದು ಮುದ್ದಾಡು ಅಂದ್ರೆ ನಾಯಕನ ಪಾಡು ಹೇಳತೀರದು. ಇದೇ ಕಥೆಗೆ ಸ್ಟಾರ್ಟಪ್.
ಸೋಡಾ ಸ್ಪಿರಿಟ್ ತರಹ ಮದ್ವೆ 10 ದಿನದಲ್ಲಿ ಠುಸ್ ಪಟಾಕಿ. ಮಾವನ ಟಾಯ್ಲೆಟ್ ಸೆರಾಮಿಕ್ ಅಂಗಡಿಯೂ ಅರ್ಜುನ್ಗೆ ಬೋರ್ ಹೊಡೆಸುತ್ತೆ. ಕೊನೆಗೆ ಹಳೆ ಗೆಳತಿ, ಹೊಸ ಪ್ರೇಮದ ಚಿಗುರು. ಹೆಂಡತಿ ಅನುಗೆ ಈ ಹೊಸ ಅನುರಾಗ ಕಂಡು ಅಸೂಯೆ. ಅಂತೂ ಫ್ಯಾಮಿಲಿ ವ್ಯಾಜ್ಯ ಫ್ಯಾಮಿಲಿ ಕೋರ್ಟ್ ಅಂಗಳಕ್ಕೆ ಬಂದು ನಿಲ್ಲುತ್ತೆ. ಸಮಸ್ಯೆಗಳನ್ನು ಸೃಷ್ಟಿ ಮಾಡೋದು ಭಗವಂತನಾದ್ರೆ, ಆ ಸಮಸ್ಯೆಗೆ ಪರಿಹಾರ ಕೊಡೋನೂ ಸಹ ಅವನೇ ಅಲ್ಲವೇ. ಯೆಸ್.. ಮಾಡಿದ ತಪ್ಪನ್ನು ತಿದ್ದಿಕೊಳ್ಳೋಕೆ ದೇವರಾಗಿ ಸೆಕೆಂಡ್ ಚಾನ್ಸ್ ಕೊಡ್ತಾರೆ ರಾಜರತ್ನ ಅಪ್ಪು. ಇನ್ಮುಂದೆ ನಡೆಯೋದೆಲ್ಲಾ ಭಗವಂತನ ಲೀಲೆ. ಕಂಪ್ಲೀಟ್ ಕೃಷ್ಣನ ಲೀಲೆಯನ್ನು ನೀವು ಭಗವಂತನ ಸನ್ನಿಧಿಯಲ್ಲೇ ನೋಡ್ಬೇಕು. ಯೆಸ್.. ಉಳಿದಿದ್ದನ್ನ ನೀವು ಮಿಸ್ ಮಾಡದೇ ಥಿಯೇಟರ್ಗೆ ಹೋಗಿ ತಿಳಿಬೇಕು.
ಲಕ್ಕಿಮ್ಯಾನ್ ಆರ್ಟಿಸ್ಟ್ ಪರ್ಫಾಮೆನ್ಸ್
ಫ್ಯಾಮಿಲಿ ಕೋರ್ಟ್ನಿಂದ ಲವ್ ಕೋರ್ಟ್ವರೆಗೂ ಸಿನಿಮಾ ಟೇಕ್ ಆಫ್. ಡಾರ್ಲಿಂಗ್ ಕೃಷ್ಣ ಸಿನಿಮಾದಲ್ಲಿ ಪಾರ್ಥ ಸಾರಥಿಯಾಗಿ 100% ಪರ್ಫಾಮೆನ್ಸ್. ಸಂಗೀತ ಶೃಂಗೇರಿ, ರೋಶಿನಿ ಪ್ರಕಾಶ್ ಇಬ್ಬರೂ ನಟಿಯರು ನಟನೆಯಲ್ಲಿ ಒಬ್ಬರಿಗಿಂತ ಮೇಲೋಬ್ಬರು. ಡಾರ್ಲಿಂಗ್ ಕೃಷ್ಣ ಕೆಲವು ಸೀನ್ಗಳಲ್ಲಿ ಪರಕಾಯ ಪ್ರವೇಶ ಮಾಡಿದ್ದಾರೆ.
ಅಪ್ಪು ಎಂಟ್ರಿಗೆ ಫ್ಯಾನ್ಸ್ ಫುಲ್ ಸ್ಟನ್ ಆಗಿ ಹೋಗ್ತಾರೆ. ಅಪ್ಪು ನಗುಮುಖದ ತೇರು ಇಲ್ಲಿ ಕೂಡ ಮುಂದುವರೆದಿದೆ. ಸಾಧು, ರಂಗಾಯಣ ರಘು ನಗುವಿನ ಟಾನಿಕ್ ಮಸ್ತ್ ಆಗಿದೆ. ಭಟ್ರ ಅನಿರೀಕ್ಷಿತ ಎಂಟ್ರಿ ಸಖತ್ ಆಗಿದೆ. ನಾಗಭೂಷಣ್ ಫಸ್ಟ್ ಆಫ್ ಪವರ್ ಪ್ಲೇನಲ್ಲೇ ಕಾಮಿಡಿಯ ಸಿಕ್ಸರ್ಗಳನ್ನು ಬಾರಿಸಿದ್ದಾರೆ.
ಲಕ್ಕಿಮ್ಯಾನ್ ಪ್ಲಸ್ ಪಾಯಿಂಟ್ಸ್
ನಗುವಿನ ಹೈಡೋಸ್ ಗುಳಿಗೆ
ಅಪ್ಪು ನೀತಿ ಪಾಠ ದಿವ್ಯೌಷಧಿ
ನಾಗಭೂಷಣ್ ಸೀದಾ ಸಾದಾ ಸಖತ್ ಫನ್
ಅಪ್ಪು- ಪ್ರಭುದೇವ ಡ್ಯಾನ್ಸ್ ಧಮಾಕ
ನಾಗೇಂದ್ರ ಪ್ರಸಾದ್ ನಿರ್ದೇಶನ, ನಿರೂಪಣೆ
ಡಾರ್ಲಿಂಗ್ ಕಷ್ಣ ಎಕ್ಸಲೆಂಟ್ ಆ್ಯಕ್ಟಿಂಗ್
ಲಕ್ಕಿಮ್ಯಾನ್ ಮೈನಸ್ ಪಾಯಿಂಟ್ಸ್
ಅಪ್ಪು ಅಬ್ಬರದಲ್ಲಿ ಮೊದಲಾರ್ಧ ಬಿಗ್ಹಿಟ್ ಆಗಿದೆ. ಸೆಕೆಂಡ್ ಹಾಫ್ನಲ್ಲಿ ಅಪ್ಪು ಪ್ರೆಸೆನ್ಸ್ ಕಡಿಮೆ ಸಮಯವಾಗಿರೋದ್ರಿಂದ ಸ್ವಲ್ಪ ನೀರಸ ಎನಿಸಬಹುದು. ದ್ವಿತಿಯಾರ್ಧದ ಕಿಕ್ ಎಫೆಕ್ಟ್ ಕೂಡ ಸಾಧಾರಣವಾಗಿದೆ. ಸಿನಿಮಾದುದ್ದಕ್ಕೂ ನಮ್ಮಲ್ಲಿರೋ ನೆಗೆಟಿವಿಟಿ ತೆಗೆದು ಹಾಕೋ ಸಿನಿಮಾ ಇದು. ಜತೆಗೆ ಅಪ್ಪು ಗೀತೋಪದೇಶ ಪ್ರೇಕ್ಷಕರನ್ನು ಪದೇ ಪದೇ ಎಚ್ಚರಿಸುತ್ತದೆ. ಹಾಗಾಗಿ ಸಿನಿಮಾದಲ್ಲಿ ನೆಗೆಟಿವ್ ಅಂಶಗಳಿಗೆ ಜಾಗ ಕಮ್ಮಿ.
- ಲಕ್ಕಿಮ್ಯಾನ್ಗೆ ಪವರ್ ಟಿವಿ ರೇಟಿಂಗ್: 4/5
- ಲಕ್ಕಿಮ್ಯಾನ್ ಫೈನಲ್ ಸ್ಟೇಟ್ಮೆಂಟ್ :
ಮೊದಲ ಪ್ರಯತ್ನದಲ್ಲೇ ನಿರ್ದೇಶಕ ನಾಗೇಂದ್ರ ಪ್ರಸಾದ್ ಪರ್ಫೆಕ್ಟ್ ಎನಿಸಿದ್ದಾರೆ. ಎಲ್ಲೂ ಬೋರ್ ಹೊಡೆಸದೆ, ಪ್ರತಿ ಫ್ರೇಮಿನಲ್ಲೂ, ಪ್ರತಿ ಸೀನ್ನಲ್ಲೂ ಪ್ರೇಕ್ಷಕರನ್ನು ಹಿಡಿದು ಕೂರಿಸಿದ್ದಾರೆ. ಅಪ್ಪು ನಟನೆಯ ಸಿನಿಮಾ ಎನ್ನುವುದಕ್ಕಿಂತ, ಒಂದೊಳ್ಳೆ ಸಿನಿಮಾ ಎಂದು ಎಂಜಾಯ್ ಮಾಡಬಹುದು. ಮೀನಾಕ್ಷಿ ಸುಂದರಂ, ಸುಂದರ ಕಾಮರಾಜ್ ಬಂಡವಾಳಕ್ಕೆ ನಿರ್ದೇಶಕರು ನ್ಯಾಯ ಒದಗಿಸಿದ್ದಾರೆ. ವಿಜಯ್ ವಿಕ್ಕಿ ಮ್ಯೂಸಿಕ್ ಕೂಡ ಹಿತವಾಗಿದೆ. ಅಪ್ಪು ಅಭಿನಯವನ್ನು ಮಿಸ್ ಮಾಡ್ಕೊಂಡವ್ರು, ಒಳ್ಳೆ ಫ್ಯಾಮಿಲಿ ಸಿನಿಮಾ ನೋಡಬೇಕು ಅಂದುಕೊಂಡವ್ರು, ಜತೆಗೆ ಲವರ್ಸ್, ಬೆಸ್ಟ್ ಫ್ರೆಂಡ್ಸ್, ಕಪಲ್ಸ್ ಕಡ್ಡಾಯ ನೋಡಲೇಬೇಕಾದ ಸಿನಿಮಾ ಲಕ್ಕಿಮ್ಯಾನ್. ಕೊನೆಯಲ್ಲಿ, ಸಿನಿಮಾ ನೋಡೋಕೆ ಸೆಕೆಂಡ್ ಚಾನ್ಸ್ ತಗೋಬೇಡಿ. ಬೇಗ ಥಿಯೇಟರ್ಗೆ ಹೋಗಿಬಿಡಿ.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯೂರೋ, ಪವರ್ ಟಿವಿ
