ವಿಜಯಪುರ: ಸಿಗರೇಟ್ ಹೊಗೆ ಬಿಡಬೇಡಿ ಎಂದು ಹೇಳಿದ್ದಕ್ಕೆ ರಾಡ್ನಿಂದ ಮಾರಣಾಂತಿಕ ಹಲ್ಲೆಗೈದ ಘಟನೆ ಜಿಲ್ಲೆಯ ಕನ್ನೂರು ಗ್ರಾಮದಲ್ಲಿ ನಡೆದಿದ್ದು ತಡವಾಗಿ ಬೆಳಕಿಗೆ ಬಂದಿದೆ.
ಮಲ್ಲಪ್ಪ ಬೆಳ್ಳುಂಡಗಿ ಎಂಬುವವನಿಗೆ ಆರೋಪಿ ಅಕ್ಷಯ ಹಲ್ಲೆಗೈದಿದ್ದಾನೆ ಎಂದು ತಿಳಿದು ಬಂದಿದ್ದು, ಹಲ್ಲೆಯ ವಿಡಿಯೋ ಸಿಸಿ ಟಿವಿಯಲ್ಲಿ ಸೆರೆಯಾಗಿದೆ.
ಅಕ್ಷಯ ಸಿಗರೇಟ್ ಸೇದಿ ಹೊಗೆ ಬಿಡುತ್ತಿದ್ದ ಈ ವೇಳೆ ಮಲ್ಲಪ್ಪ ಪ್ರಶ್ನಿಸಿದ್ದ, ಈ ವೇಳೆ ಇಬ್ಬರ ನಡುವೆ ವಾಗ್ವಾದ ನಡೆದಿದೆ. ಈ ವಾಗ್ವಾದ ವಿಕೋಪಕ್ಕೆ ಹೋಗಿ ಮಲ್ಲಪ್ಪನಿಗೆ ಅಕ್ಷಯ ಹಿಗ್ಗಾಮುಗ್ಗಾ ಹಲ್ಲೆ ಮಾಡಿದ್ದಾನೆ.
ಮಲ್ಲಪ್ಪನಿಗೆ ಆಗ ಅಕ್ಷಯ ನಿನ್ನನ್ನು ನೋಡಿ ಕೊಳ್ಳುವೆ ಎಂದು ಬೆದರಿಕೆ ಹಾಕಿದ್ದ. ಬಳಿಕ ಮಾರನೇ ದಿ‌ನ ಅಗಸ್ಟ 3 ರಂದು ಬೆಳ್ಳಂ ಬೆಳಿಗ್ಗೆ ಪಾನ್ ಶಾಪ್ ಒಂದರ ಮುಂದೆ ನಿಂತಾಗ ಬಂದು ಹಲ್ಲೆ ಮಾಡಿದ್ದಾನೆ. ಒಮ್ಮಿಂದೊಮ್ಮಲೆ ಹಲ್ಲೆ ಮಾಡುವದನ್ನು ಕಂಡು ಅಲ್ಲಿನ ಜನರು ಮೂಕ ವಿಸ್ಮಿತರಾಗಿ ನಿಂತಿದ್ದರು.
ಹಲ್ಲೆಗೈದು ಬಳಿಕ ಆರೋಪಿಗಳಾದ ಅಕ್ಷಯ, ಸುನೀಲ್‌, ಪ್ರಕಾಶ ಬೈಕ್ ಮೇಲೆ ಪರಾರಿಯಾಗಿದ್ದಾರೆ. ಈ ಬಗ್ಗೆ ಈಗ ಮೂವರ ವಿರುದ್ದ ವಿಜಯಪುರ ಗ್ರಾಮೀಣ ಠಾಣೆಯಲ್ಲಿ ದೂರು ದಾಖಲಾಗಿದೆ.
