ವಿಕ್ರಾಂತ್ ರೋಣ ರಿಲೀಸ್ ಆದ ಮೂರೇ ದಿನದಲ್ಲಿ 150 ಕೋಟಿಗೂ ಅಧಿಕ ಬಾಕ್ಸ್ ಆಫೀಸ್ ಕೆಲೆಕ್ಷನ್ ಗಳಿಸಿ ವರ್ಲ್ಡ್ ವೈಡ್ ಕಮಾಲ್ ಮಾಡ್ತಿದ್ದಾನೆ. ಬಾಲಿವುಡ್ ಸಿನಿಮಾಗಳನ್ನ ಹಿಂದಿಕ್ಕಿ ಅಬ್ಬರಿಸ್ತಿರೋ ರೋಣನ ಆರ್ಭಟಕ್ಕೆ ಜಪಾನ್ ಕೂಡ ಫಿದಾ ಆಗಿದೆ. ಯೆಸ್. ಸೂರ್ಯ ಮುಳುಗದ ನಾಡಲ್ಲೂ ರಾರಾ ರಕ್ಕಮ್ಮ ಸದ್ದು ಮಾಡ್ತಿದ್ರೆ, ಇತ್ತ ನಟ ಚೇತನ್ ಮತ್ತೆ ಕಿಚ್ಚನ ಮೇಲೆ ಕಾಲ್ಕೆರೆದು ತಕರಾರು ತೆಗೆದಿದ್ದಾರೆ. ರೋಣನ ಕಾಂಟ್ರವರ್ಸಿ, ಕಾಂಪ್ಲಿಮೆಂಟ್ ಎರಡೂ ಕಥೆ ಹೇಳ್ತೀವಿ. ನೀವೇ ಓದಿ.
- ವಿಕ್ರಾಂತ್ ರೋಣನ ಮೇಲೆ ನಟ ಚೇತನ್ ಮತ್ತೆ ತಕರಾರು..!
ವಿಶ್ವದಾದ್ಯಂತ ಕಿಚ್ಚನ ಅಬ್ಬರ ಆರ್ಭಟ ಮುಂದುವರೆದಿದೆ. ವಿಕ್ರಾಂತ್ ರೋಣ ಬಾಕ್ಸ್ ಆಫೀಸ್ ಲೆಕ್ಕಾಚಾರಗಳನ್ನು ತಲೆ ಕೆಳಗೆ ಮಾಡಿ ಗೆಲುವಿನ ನಾಗಾಲೋಟದಲ್ಲಿ ಮುನ್ನುಗ್ತಿದ್ದಾನೆ. ಚಿತ್ರಪ್ರೇಮಿಗಳ ಮಿಶ್ರ ಪ್ರತಿಕ್ರಿಯೆಯ ನಡುವೆಯೂ ಸಿನಿಮಾ ಗೆಲುವಿನ ಸಿಂಚನ ಮೂಡಿಸಿದೆ. ಸಿನಿಮಾಂತ್ರಿಕ ರಾಜಮೌಳಿ ಮೆಚ್ಚುಗೆಯ ಮಾತುಗಳು ರೋಣನಿಗೆ ಆನೆಬಲ ಬಂದಂತಾಗಿದೆ. ಸಿನಿಮಾ ಮೇಕಿಂಗ್ ಸ್ಟೈಲ್ಗೆ ಸ್ಟಾರ್ ನಿರ್ದೇಶಕರೆಲ್ಲಾ ಗುಣಗಾನ ಮಾಡಿದ್ದಾರೆ.
ರಾರಾ ರಕ್ಕಮ್ಮನ ಹಾಡಿಗೆ ಥಿಯೇಟರ್ನಲ್ಲಂತೂ ಪ್ರೇಕ್ಷಕರು ಹುಚ್ಚೆದ್ದು ಕುಣಿತಿದ್ದಾರೆ. ರಕ್ಕಮ್ಮ ಕೇವಲ ಭಾರತಕ್ಕೆ ಮಾತ್ರ ಸೀಮಿತವಾಗದೇ ಗಡಿ ಮೀರಿ ಸೌಂಡ್ಮಾಡ್ತಿದ್ದಾಳೆ. ಸೂರ್ಯ ಮುಳುಗದ ನಾಡು ಜಪಾನ್ನಲ್ಲೂ ರಕ್ಕಮ್ಮನ ಹಾಡಿಗೆ ಮಸ್ತ್ ಸ್ಟೆಪ್ಸ್ ಹಾಕಿದ್ದಾರೆ. ರೋಣನ ಕರಾಮತ್ತು ವಿಶ್ವ ಮಟ್ಟದಲ್ಲಿ ಛಾಪು ಮೂಡಿಸ್ತಾ ಇದ್ರೆ, ಇತ್ತ ನಟ ಚೇತನ್ ಮತ್ತೆ ಕಿಚ್ಚನ ಮೇಲೆ ಕಾಲ್ಕೆರೆದು ಹೋಗಿದ್ದಾರೆ. ರೋಣ ಚಿತ್ರದ ಮೇಲೆ ಮತ್ತೆ ತಕರಾರು ತೆಗೆದಿದ್ದು ಸಿನಿಮಾ ವಿರುದ್ಧ ಅಪಸ್ವರ ಎತ್ತಿದ್ದಾರೆ.
- ಕೊರೋನಾ ಕಾಲದಲ್ಲೂ ಕಿಚ್ಚನ ಕಾಲೆಳೆದಿದ್ದ ಚೇತನ್
- ಆ ದಿನಗಳು ನಟನ ವಿರುದ್ಧ ಮತ್ತೆ ರೊಚ್ಚಿಗೆದ್ದ ಫ್ಯಾನ್ಸ್..!
ಕಾಂಟ್ರವರ್ಸಿಗಳನ್ನು ಸಾರಾಸಗಟಾಗಿ ಮೈ ಮೇಲೆ ಎಳೆದುಕೊಳ್ಳುವ ನಟ ಚೇತನ್ ಸದಾ ಸುದ್ದಿಯಲ್ಲಿರಲು ಇಷ್ಟ ಪಡುತ್ತಾರೆ. ಅವರ ಎಡಪಂಥೀಯವಾದ ಸಿದ್ಧಾಂತಗಳು ಪದೇ ಪದೇ ಅವರನ್ನು ಪೇಚಿಗೆ ಸಿಲುಕುವಂತೆ ಮಾಡುತ್ತವೆ. ಆದ್ರೆ, ತಮ್ಮದೇ ವಿಭಿನ್ನ ನಿಲುವು, ತತ್ವ ಸಿದ್ಧಾಂತ ಹೊಂದಿರುವ ಚೇತನ್ ಮತ್ತೆ ಸುದೀಪ್ ಚಿತ್ರದ ಮೇಲೆ ತಮ್ಮ ಅಪಸ್ವರ ಎತ್ತಿದ್ದಾರೆ. ವಿಕ್ರಾಂತ್ ರೋಣ ಸಿನಿಮಾ ಟೆಕ್ನಿಕಲಿ ಗುಡ್ ಮೂವಿ. ಆದ್ರೆ, ದಲಿತರನ್ನು ದುಷ್ಟರಂತೆ ತೋರಿಸಿ, ಮುಸ್ಲಿಮರನ್ನು ಸ್ಟಿರಿಯೋಟೈಪ್ ಮಾಡಿದ್ದಾರೆ ಎಂದು ಆರೋಪಿಸಿದ್ದಾರೆ. ಕೇವಲ ದುಡ್ಡಿಗಾಗಿ ಸಿನಿಮಾ ಮಾಡಿದ್ದಾರೆ ಎಂದು ಕಟುವಾಗಿ ಆರೋಪ ಮಾಡಿದ್ದಾರೆ.
ಸಿನಿಮಾದಲ್ಲಿ ಫಕ್ರು ಹೆಸರಿನ ರೋಲ್ ಇದೆ. ಅವನಿಗೆ 11 ಜನ ಮಕ್ಕಳು. ಅವನ ತಮಾಷೆಯ ಡೈಲಾಗ್ಗಳು ಚೇತನ್ಗೆ ಅ ರೀತಿ ಕಾಣಿಸಿರಬಹುದು. ಹಾಗೂ ದಲಿತ ಸಮುದಾಯಕ್ಕೆ ಸಂಬಂಧಿಸಿದ ಕೆಲವು ಸನ್ನಿವೇಶಗಳು ಚೇತನ್ ಮನಸ್ಸಿನಲ್ಲಿ ವಿಭಿನ್ನ ಧೋರಣೆ ಮೂಡಿಸಿರಬಹುದು ಎನ್ನಲಾಗ್ತಿದೆ. ಈ ಮುಂಚೆಯೂ ಕೊರೋನಾ ಕಾಲದಲ್ಲಿ ವೈದ್ಯರಿಗೆ ವಂದನೆ ಸಲ್ಲಿಸಲು ಚಪ್ಪಾಳೆ ತಟ್ಟಲು ಪ್ರಧಾನಿ ಮೋದಿ ಹೇಳಿದ್ದರು. ಇದ್ರ ಪರವಾಗಿ ಕಿಚ್ಚ ಕೂಡ ಟ್ವೀಟ್ ಮಾಡಿ ಮೋದಿ ಪರ ದ್ವನಿ ಎತ್ತಿದ್ದರು. ಆ ಸಮಯದಲ್ಲಿ ಕೂಡ ಕಿಚ್ಚನ ಅವೈಜ್ನಾನಿಕತೆಗೆ ಇದೊಂದು ನಿದರ್ಶನ ಎಂದು ಚೇತನ್ ಟ್ವೀಟ್ ಮಾಡಿ ವಿರೋಧ ವ್ಯಕ್ತಪಡಿಸಿದ್ದರು.
ಚೇತನ್ಕುಮಾರ್ ಹೇಳಿಕೆಗೆ ಸಿಕ್ಕಾಪಟ್ಟೆ ವಿರೋಧ ವ್ಯಕ್ತವಾಗುತ್ತಿವೆ. ಸಿನಿಮಾದಲ್ಲೂ ಜಾತಿ ಹುಡುಕುವ ಕೆಟ್ಟ ಮನಸ್ಥಿತಿ ನಿಮ್ಮದು ಎಂದು ಕಮೆಂಟ್ಸ್ ಮಾಡುತ್ತಿದ್ದಾರೆ. ಮೇಕಿಂಗ್ ಸ್ಟೈಲ್ನಿಂದ್ಲೇ ಎಲ್ಲಾ ಕಡೆ ಸಖತ್ ಸೌಂಡ್ ಮಾಡ್ತಿರೋ ವಿಕ್ರಾಂತ್ ರೋಣ ಚಿತ್ರಕ್ಕೆ ಈ ಘಟನೆಯಿಂದ ಸ್ವಲ್ಪ ಹಿನ್ನೆಡೆಯಾಗಿದೆ. ಪದೇ ಪದೇ ಕಿಚ್ಚನ ಮೇಲೆ ಕಾಲ್ಕೆರೆದು ಬರ್ತಾ ಇರೋ ಚೇತನ್ ವಿರುದ್ಧ ಅಭಿಮಾನಿಗಳು ಕಿಡಿ ಕಾರುತ್ತಿದ್ದಾರೆ. ಏನೇ ಆದ್ರೂ ವಿಕ್ರಾಂತ್ ರೋಣ ಎಲ್ಲಾ ವಿಘ್ನಗಳ ನಡುವೆಯೂ ಸಾವರಿಸಿಕೊಂಡು ಮತ್ತೆ ಫಿನಿಕ್ಸ್ ಹಕ್ಕಿಯಂತೆ ಎದ್ದು ಮುನ್ನುಗ್ತಿದ್ದಾನೆ.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯೂರೋ, ಪವರ್ ಟಿವಿ
