ಬೆಳಗಾವಿ: ಕಳೆದ ತಿಂಗಳು ಖಾಸಗಿ ಬ್ಯಾಂಕ್ ಒಂದರಲ್ಲಿ 3.500ಗ್ರಾಂ ಚಿನ್ನವನ್ನು ಖತರ್ನಾಕ ಕಳ್ಳರು ಕದ್ದಿದ್ದ ಪ್ರಕರಣ ಬೆಳಕಿಗೆ ಬಂದಿತ್ತು. ಆ ಕಳ್ಳರನ್ನು ಇದೀಗ ಬಂಧಿಸುವಲ್ಲಿ ಬೆಳಗಾವಿ ಜಿಲ್ಲಾ ಪೊಲೀಸ್ ಅಧಿಕಾರಿಗಳು ಸಫಲರಾಗಿದ್ದಾರೆ.
ಇನ್ನೂ ಓರ್ವನ ಹುಡುಕಾಟ ಜಾರಿಯಲ್ಲಿದೆ. ಹುಸೇನ್ ಮಲಿಕಸಾಬ್ ( 40 ), ಸದ್ದಾಂ ಜಮಖಂಡಿ (22 ), ರಿಯಾಜ್ ಪೈಲವಾನ್ ( 23 ),ಹಾಜಿಸಾಬ್ ಶೇಖ ( 36 ) ಬಂಧಿತ ಆರೋಪಿಗಳು.
ಬೆಳಗಾವಿ ಜಿಲ್ಲೆಯ ರಾಯಬಾಗ ತಾಲೂಕಿನ ಹಂದಿಗುಂದ ಗ್ರಾಮದ ಶ್ರೀ ಮಹಾಲಕ್ಷ್ಮಿ ಕೋ ಆಪ್ ಬ್ಯಾಂಕ್ನಲ್ಲಿ ಕಳೆದ ತಿಂಗಳು ದರೋಡೆಯಾಗಿತ್ತು. ದರೋಡೆ ಆದ ನಂತರ ಠೇವಣಿ ಇಟ್ಟ 110 ಗ್ರಾಹಕರು ಆತಂಕದಲ್ಲಿದ್ದರು. ಠೇವಣಿದಾರರಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ರೈತರೇ ಇದ್ದರು. ತನಿಖೆ ಶುರು ಮಾಡಿದ ಬೆಳಗಾವಿ ಜಿಲ್ಲಾ ಪೊಲೀಸ್, 4 ಜನರನ್ನು ಬಂಧಿಸಿ ಸುಮಾರು 2.800 ಗ್ರಾಂ ಚಿನ್ನ ವಾಪಸ್ ವಶಕ್ಕೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.
ಬೆಳಗಾವಿ ಎಸ್ಪಿ ಲಕ್ಷ್ಮಣ ನಿಂಬರಗಿ, ಎಎಸ್ಪಿ ನಂದಗಾವಿ ಹಾಗೂ ಅಥಣಿ ವಲಯದ ಪೋಲಿಸ್ ಅಧಿಕಾರಿಗಳ ನೇತೃತ್ವದಲ್ಲಿ ಈ ಕಾರ್ಯಾಚರಣೆ ನಡೆದಿತ್ತು. ಕಾರ್ಯಾಚರಣೆಯಲ್ಲಿ ಭಾಗಿಯಾಗಿದ್ದ ಎಲ್ಲ ಅಧಿಕಾರಿ ಹಾಗೂ ಸಿಬ್ಬಂದಿ ವರ್ಗಕ್ಕೆ ಬ್ಯಾಂಕಿನ ಆಡಳಿತ ಮಂಡಳಿ ಹಾಗೂ ಸ್ಥಳಿಯರಿಂದ ಸನ್ಮಾನ ಕಾರ್ಯಕ್ರಮ ಕೂಡ ನಡೆಯಿತು.