ನಾಲತವಾಡ:ಅಭಿಮಾನಿಗಳಿಗೆ ಇಂದು ಅಪ್ಪು ಹುಟ್ಟುಹಬ್ಬದ ಸಂಭ್ರಮ. ಜೊತೆಗೆ ಜೇಮ್ಸ್ ಬಿಡುಗಡೆಯ ಸಂಭ್ರಮ. ಈ ಸಂಭ್ರಮವನ್ನು ಎಲ್ಲಾ ವಯೋಮಾನದವರೂ ತಮ್ಮ ತಮ್ಮ ಇಷ್ಟಕ್ಕನುಸಾರವಾಗಿ ವಿಭಿನ್ನ ರೀತಿಯಲ್ಲಿ ಆಚರಿಸುತ್ತಿದ್ದಾರೆ. ಗುಬ್ಬಿಯ ಅಜ್ಜಿ ಪುರಿ ಬತ್ತಾಸಿನಲ್ಲಿ ಹಾರ ಮಾಡಿ ತಂದರೆ, ನಾಲತವಾಡದ ಅಭಿಮಾನಿಯೊಬ್ಬ ಅಪ್ಪು ಅಭಿಮಾನಕ್ಕಾಗಿ ಒಂದಿಡೀ ದಿನ ಉಚಿತ ಹೇರ್ಕಟಿಂಗ್ ಮಾಡುತ್ತಿದ್ದಾರೆ.
ಹೌದು, ವಿಜಯಪುರ ಜಿಲ್ಲೆಯ ಮುದ್ದೇಬಿಹಾಳ ತಾಲೂಕಿನ ನಾಲತವಾಡ ಪಟ್ಟಣದ ಅಪ್ಪು ಅಭಿಮಾನಿ, ಅಪ್ಪು ಹೇರ ಸಲೂನ ಮಾಲೀಕ ಪ್ರಕಾಶ ಶಹಾಪೂರ ಅಪ್ಪು ಹುಟ್ಟು ಹಬ್ಬದ ಪ್ರಯುಕ್ತ ಫ್ರೀ ಹೇರ ಕಟಿಂಗ ಕೈಗೊಂಡಿದ್ದಾರೆ. ಈ ವೇಳೆ ಮಾತನಾಡಿದ ಅವರು “ನಾನು ಅಪ್ಪು ಅವರ ಕಟ್ಟಾ ಅಭಿಮಾನಿಯಾಗಿದ್ದೇನೆ. ಅವರನ್ನು ಜೀವಿತ ಅವಧಿಯಲ್ಲಿ ಭೇಟಿ ಮಾಡಬೇಕೆಂಬ ನನ್ನ ಕನಸಾಗಿತ್ತು. ಆದರೆ ಅವರನ್ನು ಭೇಟಿ ಮಾಡಲು ಆಗಿಲ್ಲ. ಆ ನೋವು ನನ್ನ ಜೀವನದುದ್ದಕ್ಕೂ ಇರುತ್ತದೆ” ಎಂದು ಭಾವುಕವಾಗಿ ಹೇಳಿದ್ದಾರೆ. ಉಚಿತ ಹೇರ್ ಕಟಿಂಗ್ ಸೇವೆ ಪಡೆಯಲು ಮಕ್ಕಳು ಹಾಗೂ ಯುವಕರು ಬೆಳಗ್ಗೆಯಿಂದಲೆ ಅಂಗಡಿಯ ಮುಂದೇ ಸರತಿಯಿಂದ ಕುಳಿತ ದೃಶ್ಯ ಕಂಡು ಬಂತು.
