ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ನಟನೆಯ ಜೇಮ್ಸ್ ಈ ವರ್ಷದ ಬಹುನಿರೀಕ್ಷಿತ ಸಿನಿಮಾ. ಜೇಮ್ಸ್ ಅಪ್ಪು ನಾಯಕರಾಗಿ ನಟಿಸಿದ ಕೊನೆಯ ಸಿನಿಮಾ. ಹೀಗಾಗಿ ಈ ಸಿನಿಮಾ ಬಗ್ಗೆ ಬಹಳಷ್ಟು ನಿರೀಕ್ಷೆಗಳಿದೆ. ಸದ್ಯ ಚೇತನ್ ಅಪ್ಪು ಹಾಗೂ ಚೇತನ್ ಕುಮಾರ್ ಕಾಂಬಿನೇಶನ್ ಜೇಮ್ಸ್ ತಂಡದಿಂದ ಒಂದು ಗುಡ್ ನ್ಯೂಸ್ ಹೊರಬಿದ್ದಿದೆ.
ಈ ವರ್ಷ ತೆರೆಕಾಣಲಿರುವ ಮೋಸ್ಟ್ ಅವೇಯ್ಟೆಡ್ ಸ್ಯಾಂಡಲ್ವುಡ್ ಸಿನಿಮಾಗಳಲ್ಲಿ ಮುಖ್ಯವಾಗಿ ಕರುನಾಡ ರಾಜರತ್ನ ಪುನೀತ್ ರಾಜ್ಕುಮಾರ್ ನಟನೆಯ ಜೇಮ್ಸ್ ಸಿನಿಮಾ ಕೂಡ ಇದೆ. ಅಪ್ಪು ಅಗಲಿಕೆಯ ನೋವು ಚಿತ್ರರಂಗ ಹಾಗೂ ಅಭಿಮಾನಿಗಳನ್ನು ಇನ್ನೂ ಕಾಡುತ್ತಲೇ ಇದೆ. ಪುನೀತ್ ಅಗಲಿಕೆಯ ನೋವಿನಲ್ಲಿರೋ ಫ್ಯಾನ್ಸ್ ತಮ್ಮ ನೆಚ್ಚಿನ ನಟನ ಜೇಮ್ಸ್ ಚಿತ್ರವನ್ನು ಬಿಗ್ ಸ್ಕ್ರೀನ್ ಮೇಲೆ ನೋಡಲು ಕಾತರದಿಂದ ಕಾದು ಕುಳಿತಿದ್ದಾರೆ.
ಜೇಮ್ಸ್ ಸಿನಿಮಾ ನಿರ್ದೇಶಕ ಚೇತನ್ ಕುಮಾರ್ ಅವರ ಬಹು ವರ್ಷಗಳ ಕನಸು. ಅಪ್ಪು ನಟನೆಯ ಈ ಚಿತ್ರ ಟೈಟಲ್ ಫಿಕ್ಸ್ ಆದ ದಿನದಿಂದ್ಲೂ ಒಂದಲ್ಲಾ ಒಂದು ವಿಶೇಷತೆಗಳಿಂದಾಗಿ ಸದ್ದು ಮಾಡುತ್ತಲೇ ಇದೆ. ಆದ್ರೆ ಟೈಟಲ್ ಅನೌನ್ಸ್ ಅದ ನಂತ್ರ ಕಾರಣಾಂತರಗಳಿಂದ ಸಿನಿಮಾ ಶೂಟಿಂಗ್ ತಡವಾಗುತ್ತಲೇ ಬಂತು. ಹೀಗಾಗಿ ಇತ್ತ ಅಪ್ಪು ಅವ್ರ ಫ್ಯಾನ್ಸ್ ಕೂಡ ಜೇಮ್ಸ್ ಸಿನಿಮಾ ಅದ್ಯಾವಾಗ ಶೂಟಿಂಗ್ ಮುಗಿಸಿ ತೆರೆ ಕಾಣುತ್ತೆ ಅಂತ ಕಾಯುತ್ತಲೇ ಇದ್ರು. ಕಡೆಗೂ ಇದೀಗ ಆ ಅಮೃತ ಘಳಿಗೆ ಸಮೀಪಿಸಿದೆ.
ಪುನೀತ್ ನಟನೆಯ ಜೇಮ್ಸ್ ಚಿತ್ರದಿಂದ ಒಂದು ಗುಡ್ ನ್ಯೂಸ್ ಇದೀಗ ರಿವೀಲ್ ಆಗಿದೆ. ಅಪ್ಪು ಅಗಲಿಕೆಯ ನೋವಿನಲ್ಲೂ ಜೇಮ್ಸ್ ಚಿತ್ರತಂಡ ಸಿನಿಮಾ ಚಿತ್ರೀಕರಣ ಕಂಪ್ಲೀಟ್ ಮಾಡಿ ಕುಂಬಳಕಾಯಿ ಹೊಡೆದಿದೆ. ಜೇಮ್ಸ್ ಸಿನಿಮಾ ಶೂಟಿಂಗ್ ಕಂಪ್ಲೀಟ್ ಆಗುವ ಮುನ್ನವೇ ದುರಾದೃಷ್ಟವಶಾತ್ ಪುನೀತ್ ರಾಜ್ಕುಮಾರ್ ನಮ್ಮನ್ನೆಲ್ಲಾ ಅಗಲಿದ್ರು. ಆಗ ಜೇಮ್ಸ್ ಚಿತ್ರದ ಶೂಟಿಂಗ್ ಬಹುತೇಕ ಮುಗಿದು ಕೊನೆಯ ಹಂತದ ಚಿತ್ರೀಕರಣ ಮಾತ್ರ ಉಳಿದಿತ್ತು.
ಜೇಮ್ಸ್ ಚಿತ್ರದಿಂದ ನನಸಾಗಿದೆ ದೊಡ್ಮನೆ ಸಹೋದರರ ಕನಸು :
ಅಪ್ಪು ಇಲ್ಲದೆ ಜೇಮ್ಸ್ ಚಿತ್ರದ ಚಿತ್ರೀಕರಣವನ್ನು ಪೂರೈಸೋದು ಹೇಗೆ ಅಂತ ಚಿತ್ರತಂಡಕ್ಕೆ ದಿಕ್ಕು ತೋಚದಂತಾಗಿತ್ತು. ಆದ್ರೂ ಸಹ ನಿರ್ದೇಶಕ ಚೇತನ್ಕುಮಾರ್ ಹಾಗೂ ಚಿತ್ರತಂಡ ಕಷ್ಟಪಟ್ಟು ಸದ್ಯ ಸಿನಿಮಾ ಶೂಟಿಂಗನ್ನು ಕಂಪ್ಲೀಟ್ ಮಾಡಿದೆ. ವಿಶೇಷ ಅಂದ್ರೆ ಅಪ್ಪು ಅವ್ರ ಜೇಮ್ಸ್ ಸಿನಿಮಾದಲ್ಲಿ ಅವರ ಅಣ್ಣಂದಿರಾದ ಡಾ.ಶಿವರಾಜ್ಕುಮಾರ್ ಹಾಗೂ ರಾಘವೇಂದ್ರ ರಾಜ್ಕುಮಾರ್ ಕೂಡ ಮುಖ್ಯ ಪಾತ್ರಗಳಲ್ಲಿ ಕಾಣಿಸಿಕೊಳ್ತಿದ್ದಾರೆ.
ಒಂದೇ ಸಿನಿಮಾದಲ್ಲಿ ಶಿವಣ್ಣ, ರಾಘಣ್ಣ ಹಾಗೂ ಅಪ್ಪು ಅಣ್ಣಾವ್ರ ಮೂರೂ ಜನ ಮಕ್ಕಳೆಲ್ಲರೂ ನಟಿಸ್ಬೇಕು ಅನ್ನೋದು ದೊಡ್ಮನೆಯ ಈ ಪ್ರೀತಿಯ ಸಹೋದರರ ಕನಸಾಗಿತ್ತು. ಜೊತೆಗೆ ಅದು ಆ ಮೂವರು ಅಭಿಮಾನಿಗಳ ಆಸೆಯೂ ಆಗಿತ್ತು. ಆದ್ರೆ ಆ ಕನಸು ನನಸಾಗುವ ಮೊದಲೇ ಪವರ್ ಸ್ಟಾರ್ ನಮ್ಮನ್ನ ಬಿಟ್ಟು ಬಹುದೂರ ಸಾಗಿಬಿಟ್ರು. ಆದ್ರೆ ಜೇಮ್ಸ್ ಸಿನಿಮಾದಲ್ಲಿ ಶಿವಣ್ಣ, ರಾಘಣ್ಣ ಕೂಡ ಸ್ಪೆಷಲ್ ರೋಲ್ಸ್ನಲ್ಲಿ ನಟಿಸಿದ್ದು ತಮ್ಮ ಪ್ರೀತಿಯ ತಮ್ಮನಿಗೆ ಗೌರವ ಸೂಚಿಸಿದ್ದಾರೆ. ಈ ಮೂಲಕ ದೊಡ್ಮನೆ ಸಹೋದರರ ಕನಸು ನನಸಾಗಿದೆ.
ಜೇಮ್ಸ್ ಸಿನಿಮಾ ಶೂಟಿಂಗ್ನ ಕೊನೆಯ ದಿನವೂ ಕೂಡ ಶಿವಣ್ಣ ಹಾಗೂ ರಾಘಣ್ಣ ಶೂಟಿಂಗ್ ಸೆಟ್ಗೆ ಹೋಗಿದ್ರು. ಜೊತೆಗೆ ರಾಘಣ್ಣನ ಪುತ್ರ ಯುವ ರಾಜ್ಕುಮಾರ್, ರಾಮ್ಕುಮಾರ್ ಪುತ್ರ ಧಿರೇನ್ ಹಾಗೂ ರಾಜ್ ಕುಟುಂಬದ ಆಪ್ತರೂ ಕೂಡ ಸಿನಿಮಾ ಸೆಟ್ನಲ್ಲಿ ಇದ್ರು. ಜೇಮ್ಸ್ ಸಿನಿಮಾ ಚಿತ್ರೀಕರಣದ ಅಂತಿಮ ದಿನ ಇಡೀ ಚಿತ್ರತಂಡ ಕುಂಬಳ ಕಾಯಿ ಹೊಡೆದು, ಅಪ್ಪು ಅವ್ರ ಭಾವಚಿತ್ರದ ಮುಂದೆ ಕುಳಿತು ಫೋಟೋ ತೆಗೆಸಿಕೊಂಡು ಅವರಿಗೆ ನಮನ ಸಲ್ಲಿಸಿದ್ದಾರೆ. ಜೇಮ್ಸ್ ಚಿತ್ರತಂಡದ ಈ ಫೋಟೋಗಳು ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿವೆ.
ಅಂದಹಾಗೆ ಅಪ್ಪು ಅಗಲಿಕೆಯ ನಂತ್ರ ಜೇಮ್ಸ್ ಚಿತ್ರದಲ್ಲಿನ ಅವರ ಪಾತ್ರಕ್ಕೆ ಶಿವಣ್ಣ ಡಬ್ಬಿಂಗ್ ಮಾಡಲಿದ್ದಾರೆ ಅನ್ನಲಾಗ್ತಿದೆ. ಇನ್ನೇನು ಕೆಲ ದಿನಗಳಲ್ಲೇ ಇದ್ರ ಬಗ್ಗೆ ಚಿತ್ರತಂಡ ಮಾಹಿತಿ ನೀಡಲಿದೆ. ಈ ಚಿತ್ರದಲ್ಲಿ ನಟಿ ಪ್ರಿಯಾ ಆನಂದ್ ಅಪ್ಪು ಅವ್ರಿಗೆ ನಾಯಕಿಯಾಗಿ ನಟಿಸಿದ್ದಾರೆ. ಕಿಶೋರ್ ಪತಿಕೊಂಡ ಜೇಮ್ಸ್ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ಆದ್ರೆ ಇದೇ ವರ್ಷದ ಮಾರ್ಚ್ 17ರಂದು ಅಂದ್ರೆ ಅಪ್ಪು ಹುಟ್ಟುಹಬ್ಬದ ವಿಶೇಷ ದಿನ ಜೇಮ್ಸ್ ಸಿನಿಮಾ ತೆರೆ ಕಾಣುವ ಸಾಧ್ಯತೆ ಇದೆ. ಒಟ್ಟಾರೆ ಸದ್ಯ ಜೇಮ್ಸ್ ಚಿತ್ರದ ಶೂಟಿಂಗ್ ಕಂಪ್ಲೀಟ್ ಆಗಿದ್ದು, ಈ ವಿಷ್ಯ ಕೇಳಿ ಅಪ್ಪು ಫ್ಯಾನ್ಸ್ ಸಂತಸದಲ್ಲಿದಲ್ಲಿದ್ದಾರೆ.