ಇವತ್ತು ಜಗತ್ತು ಸಾಕಷ್ಟು ವೇಗವಾಗಿ ಬೆಳೆಯೋದಕ್ಕೆ ಶುರು ಮಾಡಿದೆ. ಕಳೆದ ಎರಡು ವರ್ಷಗಳಿಂದ ಜಗತ್ತಿನಾದ್ಯಂತ ಸ್ವಲ್ಪ ಕುಂಟಿತವಾಗಿದ್ದ ಅಭಿವೃದ್ಧಿ ಕಾರ್ಯಗಳು ಈಗ ಸ್ವಲ್ಪ ಬಲಿಷ್ಟವಾಗ್ತಾ ಇದೆ. ಆದ್ರೆ ಈಗ ಮತ್ತೆ ಒಮೈಕ್ರಾನ್ ಹಾವಾಳಿ ಶುರುವಾಗಿರೊದ್ರಿಂದ ಮತ್ತೆ ಲಾಕ್ಡೌನ್ ಭೀತಿ ಕೂಡ ಜನರನ್ನ ಹೆಚ್ಚು ಕಾಡೋದಕ್ಕೆ ಶುರುವಾಗಿದೆ. ಆದ್ರೆ ಕಳೆದ ವರ್ಷ ಇಷ್ಟೆಲ್ಲದರ ಮಧ್ಯೆಯೂ ಕೂಡ ಹೆಚ್ಚಾಗಿ ಸಧೃಢವಾಗಿದ್ದು ಅಂದ್ರೆ ಅದು ಕೇವಲ ಟೆಲಿಕಾಮ್ ಕ್ಷೇತ್ರ ಮಾತ್ರ. ಕಳೆದ ಒಂದು ವರ್ಷದಿಂದ ಟೆಲಿಕಾಮ್ ಕ್ಷೇತ್ರ ಸ್ವಲ್ಪ ಹೆಚ್ಚಾಗೇ ಯಶಸ್ಸು ಸಾಧಿಸಿಕೊಂಡು ಬರ್ತಾ ಇದೆ. ಅದರಲ್ಲೂ 5 ಜಿ ತಂತ್ರಜ್ಞಾನದ ವಿಚಾರದಲ್ಲಂತು, ಸಾಕಷ್ಟು ಬೆಳವಣಿಗೆಗಳು ಹಲವು ದೇಶಗಳ ಟೆಲಿಕಾಮ್ ಕ್ಷೇತ್ರದಲ್ಲಿ ಹೆಚ್ಚಾಗಿ ನಡೆಯೋದಕ್ಕೆ ಶುರುವಾಗಿದೆ.
ಈಗಾಗಲೆ ಅಮೆರಿಕ ಸೇರಿದ ಹಾಗೆ ಕೆಲವು ರಾಷ್ಟ್ರಗಳ ಪ್ರಮುಖ ನಗರಗಳಲ್ಲಿ 5G ತಂತ್ರಜ್ಞಾನಗಳನ್ನ ಅಳವಡಿಸಲಾಗಿದ್ದು, ಭಾರತ ಸೇರಿದ ಹಾಗೆ ಇನ್ನಷ್ಟು ರಾಷ್ಟ್ರದ ಪ್ರಮುಖ ನಗರಗಳು 5G ಸೇವೆಯನ್ನ ಪಡೆಯೋದಕ್ಕೆ ಸಿದ್ಧತೆಯನ್ನ ನಡೆಸುತ್ತಿದೆ. ಆದ್ರೆ ಈ ಬಗ್ಗೆ ಈ ಹಿಂದಿನಿಂದಲೂ ಪಕ್ಷಿ ಪ್ರಿಯರು ಸೇರಿದ ಹಾಗೆ ಹಲವು ಪ್ರಾಣಿಪ್ರಿಯರು ಈ 5G ಯೋಜನೆಗೆ ವಿರೋಧ ವ್ಯಕ್ತ ಪಡಿಸುತ್ತಿದ್ದು, ಇದು ಮಾನವನ ಆರೋಗ್ಯದ ಮೇಲು ಪರಿಣಾಮ ಬೀರುತ್ತದೆ. ಹಾಗಾಗಿ 5G ತರೋದು ಬೇಡ ಅಂತ ಸಾಕಷ್ಟು ಜನ ಒತ್ತಾಯವನ್ನ ಮಾಡುತ್ತಲೇ ಇದ್ದಾರೆ. ಇದೀಗ ಈ ಬಗ್ಗೆ ಕೆಲ ವಿಮಾನ ಸಂಸ್ಥೆಯ ಸಿಇಓಗಳು ಅಮೆರಿಕದಲ್ಲಿ ಧ್ವನಿ ಎತ್ತಿದ್ದಾರೆ.
ವಿಮಾನಗಳ ದುರಂತಕ್ಕೆ 5ಜಿ ನೆಟ್ವರ್ಕ್ ಕೂಡ ಕಾರಣವಾಗಬಹುದು ಅಂತ ಅಮೆರಿಕ ಏರ್ಲೈನ್ಸ್ ಕಂಪನಿ ಸಿಇಒಗಳು ಎಚ್ಚರಿಕೆ ನೀಡಿದ್ದಾರೆ. ಈ ಬಗ್ಗೆ ನೂತನ ವೈರ್‌ಲೆಸ್ 5ಜಿ ಸೇವೆ ಹಲವು ಆಪತ್ತುಗಳನ್ನ ತರಲಿದ್ದು ಅವುಗಳಲ್ಲಿ ಪ್ರಮುಖವಾಗಿ, ವಾಯುಯಾನ ಬಿಕ್ಕಟ್ಟಿಗೆ ಕಾರಣವಾಗಬಹುದು ಅಂತ ಯುಎಸ್ ಕಾರ್ಗೋ ಮತ್ತು ಪ್ಯಾಸೆಂಜರ್ ಏರ್‌ಕ್ರಾಫ್ಟ್ ಆಪರೇಟರ್‌ಗಳ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳು ಎಚ್ಚರಿಕೆ ನೀಡಿದ್ದಾರೆ. ಅಮೆರಿಕದ ಪ್ರಮುಖ ಏರ್ಲೈನ್ಸ್ ಕಂಪನಿಗಳ ಪ್ರಕಾರ, ಹೊಸ ಸೇವೆಯು ಹೆಚ್ಚಿನ ಸಂಖ್ಯೆಯ ವೈಡ್ ಬಾಡಿ ಪ್ಲೇನ್‌ಗಳನ್ನು ನಿಷ್ಪ್ರಯೋಜಕವಾಗಿಸಬಹುದು ಅನ್ನೋ ಆಘಾತಕಾರಿ ಹಳಿಕೆಯನ್ನ ನೀಡಿದ್ದಾರೆ.
ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ ಹೇಳುವ ಪ್ರಕಾರ, 5G ತರಂಗ ಪ್ರಮುಖವಾಗಿ ಅಲ್ಟಿಮೀಟರ್ ಹಾಗು ಕಡಿಮೆ ಗೋಚರತೆಯ ಕಾರ್ಯಾಚರಣೆಗಳಂತಹ ಸಂದರ್ಭದಲ್ಲಿ ಹೆಚ್ಚು ಅಪಾಯ ಸಂಭವಿಸಲಿದೆ. ಅಂತಹ ಸ್ಥಿತಿಯಲ್ಲಿ ವಿಮಾನವನ್ನು ನಿರ್ವಹಿಸುವುದು ಅತ್ಯಂತ ಅಪಾಯಕಾರಿ ಅಂತ ಹೇಳಿಕೆಯನ್ನ ನೀಡಿದೆ. ಸದ್ಯಕ್ಕೆ ಇದೀಗ ಅಮೆರಿಕನ್ ಕಂಪನಿ AT&T ಮತ್ತು ವೆರಿಝೋನ್ ಕಳೆದ ವರ್ಷ ಹರಾಜಿನಲ್ಲಿ $80 ಬಿಲಿಯನ್ ಬಿಡ್ಡಿಂಗ್ ಮಾಡಿತ್ತು. ಈ ಬಿಡ್ಡಿಂಗ್ 5Gಗೆ ಸಂಬಂಧಿಸಿದ್ದಾಗಿತ್ತು. ಈ ಮೂಲಕ C-ಬ್ಯಾಂಡ್ ಸ್ಪೆಕ್ಟ್ರಮ್ ಬಿಡ್ ಅನ್ನು ಪಡೆದಿದ್ದವು. ಈ ಹಿನ್ನೆಲೆಯಲ್ಲಿ ಇದೀಗ ಅಮೆರಿಕದ ಏರ್ಪೋರ್ಟ್ ರನ್‌ವೇ ಸುತ್ತಲೂ 5ಜಿ ನೆಟ್ವರ್ಕ್ ನಿರ್ಮಾಣಕ್ಕೆ ಸಿದ್ಧತೆಯನ್ನ ನಡೆಸಲಾಗ್ತಾ ಇದೆ. ಒಂದು ವೇಳೆ ಇದರ ತರಂಗದ ತೀವ್ರತೆ ಹೆಚ್ಚಾಗಿದ್ರೆ. ತಾಂತ್ರಿಕವಾಗಿ ದೊಡ್ಡ ವಿಮಾನಗಳಿಗೆ ತೊಂದರೆಯಾಗಲಿದೆ. ಹೀಗಾಗಿ ವಿಮಾನ ನಿಲ್ದಾಣದ ರನ್‌ವೇಯ ಸುಮಾರು 3.2 ಕಿಲೋ ಮೀಟರ್ಗಳಿಂದ 5G ಟವರ್ಗಳನ್ನು ಮುಕ್ತಗೊಳಿಸಬೇಕು ಅಂತ ಪ್ರಮುಖ ವಿಮಾನಯಾನ ಕಂಪನಿಗಳು ಅಮೆರಿಕನ್ ಸರ್ಕಾರಕ್ಕೆ ಕೇಳಿಕೊಂಡಿದೆ.
ಈ ಬಗ್ಗೆ ಕಳೆದ ನವೆಂಬರ್ ಆರಂಭದಲ್ಲಿ FAA ವಿಮಾನಗಳ ಮೇಲೆ 5G ಪರಿಣಾಮದ ಬಗ್ಗೆ ಕೆಲ ತಜ್ಞರು ಎಚ್ಚರಿಕೆಯನ್ನ ನೀಡಿದ್ದರು. ಇದರ ನಂತರ, ಅಮೆರಿಕನ್ ಸರ್ಕಾರದ ಹಸ್ತಕ್ಷೇಪದಿಂದ C-ಬ್ಯಾಂಡ್ ಸ್ಪೆಕ್ಟ್ರಮ್ ಬಳಕೆಯನ್ನು ಜನವರಿ 5ರ ವರೆಗೆ ಮುಂದೂಡಲಾಗಿತ್ತು. ಇದೀಗ ಈ ಯೋಜನೆಯನ್ನ ಜನವರಿ 19ರ ವರೆಗೆ ವಿಸ್ತರಿಸಲಾಗಿದೆ. 50 ವಿಮಾನ ನಿಲ್ದಾಣಗಳಿಗೆ ತಾತ್ಕಾಲಿಕ ಬಫರ್ ವಲಯಗಳನ್ನು ರಚಿಸಲು ಸಹ ಒಪ್ಪಿಗೆ ನೀಡಲಾಗಿದೆ. ಈಗ ಒಪ್ಪಂದದ ಪ್ರಕಾರ, AT&T ಮತ್ತು ವೆರಿಝೋನ್ ಬುಧವಾರದಿಂದ ಸೇವೆಯನ್ನು ಪ್ರಾರಂಭಿಸಲಿವೆ. ಆದ್ದರಿಂದ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ ಮತ್ತೆ ತಾಂತ್ರಿಕ ತೊಂದರೆಗಳು ಹಾಗು ಕೆಲ ಅಪಾಯಗಳ ಬಗ್ಗೆ ಹೇಳಿಕೆ ನೀಡಿದ್ದು, ಇದೀಗ ಅಮೆರಿಕನ್ ಸರ್ಕಾರವನ್ನ ಮತ್ತೆಸ ಇಕ್ಕಟ್ಟಿಗೆ ಸಿಲುಕಿಸಿದೆ.
ಇದು ಅಮೆರಿಕದ ಕತೆಯಾದ್ರೆ ಭಾರತದಲ್ಲಿ ಭಾರೀ ನಿರೀಕ್ಷೆ ಹೊಂದಿರುವ 5ಜಿ ನೆಟ್ವರ್ಕ್ ಬಗ್ಗೆ ಕೂಡ ಇದೀಗ ಆತಂಕ ಹೆಚ್ಚಾಗಿದೆ. 2022 ಅಂತ್ಯದಲ್ಲಿ 5G ನೆಟ್ವರ್ಕ್ ಸೇವೆ ಲಭ್ಯವಾಗಲಿದ್ದು. ಆರಂಭದಲ್ಲಿ ದೇಶಾದ್ಯಂತ 13 ನಗರಗಳಲ್ಲಿ 5ಜಿ ನೆಟ್ ವರ್ಕ್ ಪ್ರಾರಂಭವಾಗಲಿದೆ ಅಂತ ತಿಳಿದು ಬಂದಿದೆ. ಈ ವರ್ಷದ ಆರಂಭದಲ್ಲಿ ಏರ್‌ಟೆಲ್, ಜಿಯೋ ಹಾಗೂ ವಿಐ ಟೆಲಿಕಾಂ ಕಂಪನಿಗಳು 5ಜಿ ಪ್ರಯೋಗಗಳನ್ನು ನಡೆಸಿದ್ದಾವೆ. ಇದೀಗ 224 ಕೋಟಿ ರೂಪಾಯಿ ವೆಚ್ಚದಲ್ಲಿ ಈ ವರ್ಷದ ಕೊನೆಯಲ್ಲಿ ಯೋಜನೆ ಪೂರ್ಣಗೊಳ್ಳುವ ಸಾಧ್ಯತೆ ಇದೆ. ಆದ್ರೆ ಈ 5G ತರಂಗಳು ಭಾರತೀಯರ ಆರೋಗ್ಯದ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ ಅಂತ ತಜ್ಞರು ಅಭಿಪ್ರಾಯವನ್ನ ವ್ಯಕ್ತ ಪಡಿಸುತ್ತಿದ್ದಾರೆ.
ಒಟ್ಟಾರೆಯಾಗಿ ಇದೀಗ ಅಮೆರಿಕದ ಏರ್ಲೈನ್ಸ್ 5G ಯಿಂದ ವಿಮಾನ ಅಪಘಾತವಾಗುವ ಸಾಧ್ಯತೆಯ ಬಗ್ಗೆ ಎಚ್ಚರಿಕೆ ನೀಡಿದ್ದು. ಇದು ಕೇವಲ ಅಮೆರಿಕಗೆ ಮಾತ್ರ ಸೀಮಿತವಾಗೋದಿಲ್ಲ ಹಾಗಾಗಿ ಭಾರತದಲ್ಲಿ 5G ತರುವಾಗಲು ಕೂಡ ಈ ಬಗ್ಗೆ ನಮ್ಮ ಸರ್ಕಾರ ಎಚ್ಚೆತ್ತುಕೊಳ್ಳ ಬೇಕಾಗಿದೆ. ಹಾಗಾಗಿ ಈ ಬಗ್ಗೆ ನಮ್ಮ ಸರ್ಕಾರ ಯಾವ ರೀತಿ ಕ್ರಮ ತೆಗೆದುಕೊಳ್ಳಲಿದೆ ಅಂತ ಕಾದು ನೋಡಬೇಕಾಗಿದೆ.
ಲಿಖಿತ್ ರೈ, ಪವರ್ ಟಿವಿ
