ರಾಜ್ಯದಲ್ಲೀಗ ಬೈ ಎಲೆಕ್ಷನದ್ದೇ ಸೌಂಡು. ದಿನದಿಂದ ದಿನಕ್ಕೆ ಎಲೆಕ್ಷನ್ ಗ್ರೌಂಡ್ ರಂಗೇರುತ್ತಿದೆ. ರಾಜ್ಯ ರಾಜಕಾರಣದಲ್ಲಿ ದಿಢೀರ್ ಬೆಳವಣಿಗೆಗಳು ನಡೀತಾ ಇವೆ. ಹಾಗೆಯೇ ಈ ನ್ಯೂಸ್ ಕೂಡ ರಾಜ್ಯ ರಾಜಕಾರಣದ ಸ್ಫೋಟಕ ಸುದ್ದಿ! ನಂಬಲು ಕಷ್ಟ ಅನಿಸಿದ್ರೂ ನಂಬಲೇ ಬೇಕಾದ ಸತ್ಯವಿದು. ಈ ಒಂದು ದಿಢೀರ್ ಬೆಳವಣಿಗೆ ಉಪ ಚುನಾವಣೆಗೆ ಟ್ವಿಸ್ಟ್ ಕೊಡೋದಂತು ಪಕ್ಕಾ!
ಹೌದು, ಅನರ್ಹ ಶಾಸಕ ರೋಷನ್ ಬೇಗ್ ದಿಢೀರನೆ ತನ್ನ ಹಳೆಯ ಗೂಡಿಗೆ ಸೇರ್ತಿದ್ದಾರೆ ಎಂದು ಹೇಳಲಾಗುತ್ತಿದ್ದು, ಮಾಜಿ ಸಚಿವ ಹೆಚ್ ಡಿ ರೇವಣ್ಣ ನೀಡಿರುವ ಹೇಳಿಕೆ ಸುದ್ದಿ ಪಕ್ಕಾ ಎನ್ನುತ್ತಿದೆ. ಬಿಜೆಪಿಯಿಂದ ಶಿವಾಜಿನಗರ ಕ್ಷೇತ್ರದ ಟಿಕೆಟ್ ಸಿಗುತ್ತೆ ಅನ್ನೋ ನಿರೀಕ್ಷೆಯಲ್ಲಿದ್ದ ರೋಷನ್ ಬೇಗ್ಗೆ ನಿರಾಶೆಯಾಗಿದೆ. ಬಿಜೆಪಿ ರೋಷನ್ ಬೇಗ್ ಬದಲಿಗೆ ಎಂ ಶರವಣಗೆ ಟಿಕೆಟ್ ನೀಡಿದೆ. ಬಿಜೆಪಿ ಟಿಕೆಟ್ ಕೈತಪ್ಪಿದ್ದರಿಂದ ಬೇಸರಗೊಂಡಿರೋ ರೋಷನ್ ಬೇಗ್ ತನ್ನ ಹಳೆಯ ಗೂಡು ಜೆಡಿಎಸ್ಗೆ ಮರಳಲಿದ್ದಾರೆ ಎಂದು ಹೇಳಲಾಗುತ್ತಿದೆ.
ಹೊಳೆನರಸೀಪುರದಲ್ಲಿ ರೋಷನ್ ಬೇಗ್ ಮಾಜಿ ಸಚಿವ ಹೆಚ್.ಡಿ ರೇವಣ್ಣ ಅವ್ರನ್ನ ಭೇಟಿ ಮಾಡಿ, ಮಾತುಕತೆ ನಡೆಸಿದ್ದಾರೆ ಎನ್ನಲಾಗಿದೆ. ಇಬ್ಬರು ಜ್ಯೋತಿಷಿಗಳೊಂದಿಗೆ ತೆರಳಿ ಬೇಗ್ ರೇವಣ್ಣ ಜೊತೆ ಚರ್ಚಿಸಿದ್ದು, ಶಿವಾಜಿನಗರ ಬಿಜೆಪಿ ಟಿಕೆಟ್ ತಪ್ಪಿದ್ದಕ್ಕೆ ಜೆಡಿಎಸ್ನಿಂದ ಕಣಕ್ಕಿಳಿಯುತ್ತಾರೆ ಎಂಬ ಚರ್ಚೆ ರಾಜಕೀಯ ಪಡಸಾಲೆಯಲ್ಲಿ ಕೇಳಿಬರ್ತಿದೆ.
ರೇವಣ್ಣ ಸ್ವಾಗತ : ಇನ್ನು ಹೆಚ್ ಡಿ ರೇವಣ್ಣ ರೋಷನ್ ಬೇಗ್ ಗುಣಗಾನ ಮಾಡಿದ್ದಾರೆ. ಹೊಳೆನರಸೀಪುರದಲ್ಲಿ ಮಾತನಾಡಿದ ಅವರು, ರೋಷನ್ ಬೇಗ್ ಬಗ್ಗೆ ನಂಗೆ ಅಪಾರ ಗೌರವ ಇದೆ. ದೇವೇಗೌಡರು ಸಿಎಂ ಆಗಿದ್ದಾಗ ಬೇಗ್ ನಮ್ಮ ಜೊತೆಯಲ್ಲೇ ಇದ್ದರು. ಅನಿವಾರ್ಯ ಕಾರಣಗಳಿಂದ ಕಾಂಗ್ರೆಸ್ಗೆ ಹೋದ್ರು. ಕಾಂಗ್ರೆಸ್ನವರು ಅವರನ್ನು ಸರಿಯಾಗಿ ನಡೆಸಿಕೊಳ್ಳಲಿಲ್ಲ ಎಂದಿದ್ದಾರೆ.
ಅಷ್ಟೇ ಅಲ್ಲದೆ ಅವರು ಉಪ ಚುನಾವಣೆಗೆ ನಿಂತು ಗೆದ್ದರೆ ಸಂತೋಷ. ಜೆಡಿಎಸ್ ಬಿಟ್ಟು ಹೋದ್ಮೇಲೆ ಅವರು HDD, HDK ಬಗ್ಗೆ ಏನು ಮಾತಾಡಿಲ್ಲ. ಜೆಡಿಎಸ್ಗೆ ಬಂದರೆ ಸ್ವಾಗತ. ಸರ್ಕಾರ ಬೀಳಿಸಲು ಷಡ್ಯಂತ್ರ ನಡೆಯುತ್ತಿದೆ ಎಂದು ಹೇಳಿದವರೇ ಬೇಗ್ . ಪ್ರಾಮಾಣಿಕವಾಗಿ ನಮ್ಮ ಮನೆಗೇ ಬಂದು ಹೇಳಿದ್ರು ಎಂದು ತಿಳಿಸಿದ್ದಾರೆ. ರೇವಣ್ಣ ಹೇಳಿಕೆ ಬೇಗ್ ತೆನೆ ಹೊರಲು ರೆಡಿಯಾಗಿದ್ದಾರೆ ಅನ್ನೋದನ್ನು ಬಲಪಡಿಸುವಂತಿದ್ದು, ಏನೆಲ್ಲಾ ಆಗುತ್ತೆ ಕಾದುನೋಡ್ಬೇಕಿದೆ.
