ಅಖಾಡಕ್ಕಿಳಿದ ಸೈರಾ ನರಸಿಂಹ ರೆಡ್ಡಿ – ಹೇಗಿದೆ ಗೊತ್ತಾ ಸುದೀಪ್​​ ಖದರ್?

ಸೈರಾ ನರಸಿಂಹ ರೆಡ್ಡಿ ಅಖಾಡಕ್ಕೆ ಇಳಿದಾಗಿದೆ.. ಪಂಚ ಭಾಷೆಗಳಲ್ಲಿ ಸೈರಾ ನರಸಿಂಹ ರೆಡ್ಡಿ ಗೆಟಪ್​ನಲ್ಲಿ ಟಾಲಿವುಡ್ ಮೆಗಾಸ್ಟಾರ್ ಚಿರಂಜೀವಿ ಅಬ್ಬರಿಸುತ್ತಿದ್ದಾರೆ. ಅಷ್ಟೇ ಅಲ್ಲದೆ ಕನ್ನಡಿಗ, ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್​ ಅವುಕು ರಾಜ ಅವತಾರದಲ್ಲಿ ಸಿನಿರಸಿಕರ ಮನ ಗೆದ್ದಿದ್ದಾರೆ.
2017ರಲ್ಲಿ ರಿಲೀಸ್ ಆದ ‘ಖೈದಿ ನಂ150’ ಸಿನಿಮಾ ಬಳಿಕ ಚಿರಂಜೀವಿ ಅಭಿನಯದ ಒಂದೇ ಒಂದು ಸಿನಿಮಾ ಬಂದಿರ್ಲಿಲ್ಲ. 2 ವರ್ಷದ ಬಳಿಕ ಚಿರು ತೆಲುಗು ಜೊತೆ ಜೊತೆಗೆ ಕನ್ನಡ, ಹಿಂದಿ, ತಮಿಳು, ತೆಲುಗು, ಮಲೆಯಾಳಂ ಭಾಷೆಗಳಲ್ಲಿ ‘ಸೈರಾ’ ಹಬ್ಬದೂಟ ಉಣಬಡಿಸುತ್ತಿದ್ದಾರೆ. ವಿಶ್ವದಾದ್ಯಂತ ಸುಮಾರು 3,500 ಥಿಯೇಟರ್​ಗಳಲ್ಲಿ ಸೈರಾ ದರ್ಬಾರು ಶುರುವಾಗಿದೆ. ಬಾಕ್ಸ್​ ಆಫೀಸಲ್ಲಿ ದಾಖಲೆಯ ಕಲೆಕ್ಷನ್ ಮಾಡುವತ್ತಾ ಸೈರಾ ಮುಂದಡಿ ಇಟ್ಟಿದ್ದಾನೆ.
ಸುದೀಪ್ ಅಭಿಮಾನಿಗಳಿಗಂತೂ ಊರ ಹಬ್ಬವೋ ಹಬ್ಬ.. ಈಗಾಗಲೇ ಕಿಚ್ಚನ ಪೈಲ್ವಾನ್​ ವಿಶ್ವ ವ್ಯಾಪಿ ಸೌಂಡು ಮಾಡ್ತಿದೆ. ಈ ನಡುವೆ ಇಂದು ಸೈರಾ ನರಸಿಂಹ ರೆಡ್ಡಿ ರಿಲೀಸ್ ಆಗಿದೆ. ಅವುಕು ರಾಜ ಅನ್ನುವ ಪ್ರಮುಖ ಪಾತ್ರದಲ್ಲಿ, ಡಿಫ್ರೆಂಟ್​ ಲುಕ್, ಖದರ್​ನಲ್ಲಿ ಬಾದ್​ ಷಾ ಸುದೀಪ್ ಮಿಂಚಿದ್ದಾರೆ. ಹೀಗಾಗಿ ಕನ್ನಡಿಗರೂ ಸೈರಾ ಹತ್ತಿರವಾಗಿದ್ದಾನೆ.
ಬೆಂಗಳೂರಿನ ವಿವಿಧ ಥಿಯೇಟರ್​ಗಲ್ಲಿ ಸೈರಾ ರಿಲೀಸ್ ಆಗಿದೆ. ಊರ್ವಶಿ ಥಿಯೇಟರ್​ನಲ್ಲಿ ಮಿಡ್​ನೈಟ್ ಶೋನೇ ಹೌಸ್​ಫುಲ್ ಆಗಿತ್ತು. ಎಂಜಿ ರಸ್ತೆಯಲ್ಲಿರೋ ಶಂಕರ್​ನಾಗ್ ಥಿಯೇಟರ್​ಗೆ ಬೆಳಗಿನ ಜಾವ 3.30ಕ್ಕೇ ಸೈರಾ ನರಸಿಂಹ ರೆಡ್ಡಿ ಎಂಟ್ರಿ ಕೊಟ್ಟಿದ್ದು, ಇಲ್ಲಿ ಹೊಸ ಡಿಜಿಟಲ್​ ತಂತ್ರಜ್ಞಾನದ ಥಿಯೇಟರ್​ ಆಗಿರೋದ್ರಿಂದ ಆರಂಭದ ಶೋಗಳಿಗೆ ಟಿಕೆಟ್​ ಬೆಲೆ 1200 ರೂ ಫಿಕ್ಸ್​ ಮಾಡಲಾಗಿತ್ತು. ನಂತರದ ಶೋಗಳ ಟಿಕೆಟ್​ಗೆ 350 ರೂ ನಿಗದಿಪಡಿಸಲಾಗಿದೆ.
ಸುರೇಂದ್ರ ರೆಡ್ಡಿ ಆ್ಯಕ್ಷನ್ ಕಟ್​ ಹೇಳಿರುವ ಸೈರಾ ನರಸಿಂಹ ರೆಡ್ಡಿಗೆ ಬಂಡವಾಳ ಹಾಕಿರೋದು ರಾಮ್​ಚರಣ್. ಸ್ವಾಂತಂತ್ರ್ಯ ಪೂರ್ವದಲ್ಲಿ ಅಧಿಕ ಸುಂಕವನ್ನು ವಿರೋಧಿಸಿ ಬ್ರಿಟಿಷರನ್ನು ಇನ್ನಿಲ್ಲದಂತೆ ಸಿಂಹಸ್ವಪ್ನವಾಗಿ ಕಾಡಿದ್ದ ರಾಯಲ ಸೀಮೆಯ ನಾಯಕ ಸೈರಾ ನರಸಿಂಹ ರೆಡ್ಡಿಯ ಕಥೆಯೇ ಈ ಸಿನಿಮಾ.
 ಚಿರಂಜೀವಿ, ಸುದೀಪ್ ಮಾತ್ರವಲ್ಲದೆ ಬಾಲಿವುಡ್​ ಬಿಗ್ ಬಿ ಅಮಿತಾಬ್ ಬಚ್ಚನ್, ವಿಜಯ್ ಸೇತುಪತಿ, ಅನುಷ್ಕಾ ಶೆಟ್ಟಿ, ತಮನ್ನಾ ಭಾಟಿಯಾ, ನಿಹಾರಿಕಾ, ತ್ರಿವೇಣಿ ಸೇರಿದಂತೆ ಬಹು ದೊಡ್ಡ ತಾರಾಗಣ ಇದ್ದು, ಅಮಿತ್​ ತ್ರಿವೇದಿ ಸಂಗೀತ, ಆರ್​.ರತ್ನವೇಲು ಸಿನಿಮಾಟೋಗ್ರಫಿ ಸೈರಾ ನರಸಿಂಹ ರೆಡ್ಡಿಗೆ ಬಲ ತುಂಬಿದೆ ಅನ್ನೋದ್ರಲ್ಲಿ ಅನುಮಾನವೇ ಇಲ್ಲ. ಪಂಚ ಭಾಷಾ ನೇಟಿವಿಟಿಗೆ ತಕ್ಕಂತೆ ಚಿತ್ರ ಮೂಡಿಬಂದಿದ್ದು, ಚಿತ್ರ ನೋಡಿದವರು ಫುಲ್ ಮಾರ್ಕ್ಸ್ ಕೊಡ್ತಿದ್ದಾರೆ.