ಕನ್ನಡಿಗ ರಾಹುಲ್​ ದ್ರಾವಿಡ್​​ ಬದಲು ಇಬ್ಬರು ಕೋಚ್​ಗಳ ನೇಮಕ..!

ಟೀಮ್ ಇಂಡಿಯಾದ ಮಾಜಿ ನಾಯಕ, ರಾಷ್ಟ್ರೀಯ ಕ್ರಿಕೆಟ್​ ಅಕಾಡೆಮಿ (ಎನ್​ಸಿಎ) ಮುಖ್ಯಸ್ಥರಾಗಿರುವ ಕನ್ನಡಿಗ ರಾಹುಲ್ ದ್ರಾವಿಡ್ ಅವರನ್ನು ಕೋಚ್​ ಹುದ್ದೆಯಿಂದ ಬದಲಿಸಿ ಅವರ ಸ್ಥಾನಕ್ಕೆ ನೂತನ ಕೋಚ್​​ಗಳನ್ನು ಬಿಸಿಸಿಐ ನೇಮಿಸಿದೆ.
ರಾಹುಲ್ ದ್ರಾವಿಡ್ ಅವರು ಇಂಡಿಯಾ ‘ಎ’ ಮತ್ತು ಅಂಡರ್ 19 ಕೋಚ್ ಆಗಿ 2015ರಿಂದ ಕಾರ್ಯ ನಿರ್ವಹಿಸುತ್ತಿದ್ದರು. ಈ ವರ್ಷದ ಆರಂಭದಲ್ಲಿ ಎನ್​ಸಿಎ ಮುಖ್ಯಸ್ಥರನ್ನಾಗಿ ನೇಮಿಸಲಾಗಿದೆ. ಹೀಗಾಗಿ ದಿ ವಾಲ್ ಅವರಿಂದ ಕೋಚ್​ ಹುದ್ದೆಯನ್ನು ಹಿಂಪಡೆಯಲಾಗಿದೆ.
ದ್ರಾವಿಡ್ ಬದಲಿಗೆ ಭಾರತ ಎ ತಂಡಕ್ಕೆ ಹಾಗೂ ಅಂಡರ್ 19ಗೆ ಪತ್ಯೇಕ ಕೋಚ್​ಗಳನ್ನು ನೇಮಿಸಲಾಗಿದೆ. ‘ಎ’ ತಂಡದ ಕೋಚ್​ ಆಗಿ ಸೌರಾಷ್ಟ್ರಾದ ಮಾಜಿ ಬ್ಯಾಟ್ಸ್​ಮನ್ ಸೀತಾಂಶು ಕೋಟಕ್​ ಅವರನ್ನು, ಅಂಡರ್ 19 ತಂಡದ ಕೋಚ್​ ಆಗಿ ಮಾಜಿ ವೇಗಿ ಪರಾಸ್​ ಮಾಂಬ್ರೆ ಅವರನ್ನು ಆಯ್ಕೆ ಮಾಡಲಾಗಿದೆ.
ಸೀತಾಂಶು ಕೋಟಕ್​​ ಅವರು 130 ಪ್ರಥಮ ದರ್ಜೆ ಮ್ಯಾಚ್​ಗಳನ್ನಾಡಿದ್ದು, ಈ ಹಿಂದೆ ವೆಸ್ಟ್​​​ ಇಂಡೀಸ್ ಪ್ರವಾಸದ ವೇಳೆ ಟೀಮ್ ಇಂಡಿಯಾ ‘ಎ’ ಬ್ಯಾಟಿಂಗ್ ಕೋಚ್​ ಆಗಿ ಕಾರ್ಯ ನಿರ್ವಹಿಸಿದ್ದರು.
ಇನ್ನು ಪರಾಸ್​ ಮಾಂಬ್ರೆ ಟೀಂ ಇಂಡಿಯಾದ ಪರ 2 ಟೆಸ್ಟ್​ ಮತ್ತು 3 ಒಡಿಐ ಆಡಿದ್ದರು. ಜೊತೆಗೆ ದ್ರಾವಿಡ್​ ಸಹಾಯಕರಾಗಿ ಕಳೆದ ಮೂರು ವರ್ಷಗಳಿಂದ ಇಂಡಿಯಾ ‘ಎ’ ಮತ್ತು ಅಂಡರ್ 19 ತಂಡದ ಬೌಲಿಂಗ್ ಕೋಚ್​ ಆಗಿ ಕಾರ್ಯ ನಿರ್ವಹಿಸಿದ್ದರು.
ಇನ್ನುಳಿದಂತೆ ಎ ತಂಡಕ್ಕೆ ರಮೇಶ್ ಕುಮಾರ್ ಬೌಲಿಂಗ್ ಕೋಚ್ ಆಗಿ, ಟಿ. ದಿಲೀಪ್​ ಫೀಲ್ಡಿಂಗ್ ಕೋಚ್ ಆಗಿ ಕಾರ್ಯ ನಿರ್ವಹಿಸಲಿದ್ದಾರೆ. ಹೃಷಿಕೇಶ್ ಕಾನಿಟ್ಕರ್​ ಅಂಡರ್ 19 ತಂಡದ ಬ್ಯಾಟಿಂಗ್ ಕೋಚ್ ಆಗಿ ನೇಮಕವಾಗಿದ್ದಾರೆ.