ಕೋಲಾರ: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಕೆಜಿಎಫ್ -2 ಚಿತ್ರದ ಶೂಟಿಂಗ್ಗೆ ನ್ಯಾಯಾಲಯ ತಡೆಯಾಜ್ಞೆ ನೀಡಿದ ಹಿನ್ನೆಲೆ ಕೋಲಾರದ ಕೆಜಿಎಫ್ ನಲ್ಲಿ ಕೂಲಿ ವಂಚಿತ ಸ್ಥಳೀಯ ಕಾರ್ಮಿಕರು ಬೀದಿಗಿಳಿದಿದ್ದಾರೆ.
ಕೋಲಾರದ ಸೈನೆಡ್ ಕೆನೆಡೀಸ್ ಗುಡ್ಡದ ಮೇಲೆ ಕೆಜಿಎಫ್-2 ಸಿನಿಮಾ ಶೂಟಿಂಗ್ ನಡೀತಾ ಇತ್ತು. ಶೂಟಿಂಗ್ಗಾಗಿ ಭಾರಿ ಗಾತ್ರದ ಸೆಟ್ಗಳನ್ನು ಕೂಡ ಹಾಕಲಾಗಿತ್ತು. ಇದ್ರಿಂದಾಗಿ ಪರಿಸರ ನಾಶವಾಗುವ ಜೊತೆಗೆ ಸ್ಥಳೀಯರಿಗೆ ತೊಂದರೆಯಾಗಿದೆ ಎಂದು ಶ್ರೀನಿವಾಸ್ ಎಂಬುವವರು ಕೋರ್ಟ್ ಮೊರೆ ಹೋಗಿದ್ರು. ಅರ್ಜಿಯ ವಿಚಾರಣೆ ನಡೆಸಿದ ಕೋಲಾರದ ಜೆಎಮ್ಎಫ್ಸಿ ಕೋರ್ಟ್ ಚಿತ್ರದ ಶೂಟಿಂಗ್ಗೆ ಮಂಗಳವಾರ ತಡೆಯಾಜ್ಞೆ ನೀಡಿತ್ತು. ಆದರೆ, ಚಿತ್ರೀಕರಣದಿಂದ ನಮಗೆ ಯಾವೂದೇ ರೀತಿಯ ತೊಂದರೆ ಆಗಿರಲಿಲ್ಲ. ಕೆಜಿಎಫ್‍ನಲ್ಲಿ ಚಿನ್ನದ ಗಣಿ ಸ್ಥಗಿತದಿಂದ ನಮಗೆ ಕೆಲಸವೂ ಇರಲಿಲ್ಲ. ಕೆಜಿಎಫ್-2 ಚಿತ್ರೀಕರಣದಿಂದ ಸ್ಥಳೀಯರಿಗೆ ಕೆಲಸ ಸಿಕ್ಕಿದೆ. ನಮ್ಮ ದೈನಂದಿನ ಜೀವನ ಸಾಗ್ತಿತ್ತು. ಅರ್ಜಿದಾರರು ಕೋರ್ಟಿಗೆ ತಪ್ಪು ಮಾಹಿತಿ ನೀಡಿದ್ದಾರೆ. ಕೋರ್ಟ್ ಪರಿಶೀಲನೆ ನಡೆಸಿ ಚಿತ್ರೀಕರಣಕ್ಕೆ ಅನುಮತಿ ನೀಡಬೇಕೆಂದು ಪ್ರತಿಭಟನಾಕಾರರು ಮನವಿ ಮಾಡಿದ್ದಾರೆ.
