ಆ್ಯಂಟಿಗುವಾ: ಪ್ರವಾಸಿ ಭಾರತ ತಂಡ ಮತ್ತು ಆತಿಥೇಯ ವೆಸ್ಟ್ ಇಂಡೀಸ್ ನಡುವಿನ ಮೊದಲ ಟೆಸ್ಟ್ ಪಂದ್ಯದಲ್ಲಿ ಇಶಾಂತ್ ಶರ್ಮಾರ ಮಾರಕ ಬೌಲಿಂಗ್ ದಾಳಿಗೆ ವೆಸ್ಟ್ ಇಂಡೀಸ್ ಟೀಮ್ ತತ್ತರಿಸಿದೆ. ಎರಡನೇ ದಿನದಾಟದ ಅಂತ್ಯಕ್ಕೆ ವೆಸ್ಟ್ ಇಂಡೀಸ್, 8 ವಿಕೆಟ್ಗಳನ್ನು ಕಳೆದುಕೊಂಡು 189 ರನ್ ಗಳಿಸಿದ್ದು, ಅಲ್ಪ ಮೊತ್ತಕ್ಕೆ ಕುಸಿಯುವ ಭೀತಿಯಲ್ಲಿದೆ.
ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ವಿರಾಟ್ ಪಡೆ ಮೊದಲ ದಿನ ಅಜಿಂಕ್ಯಾ ರಹಾನೆ(81), ಕನ್ನಡಿಗ ಕೆ.ಎಲ್.ರಾಹುಲ್(44)ರವರ ನೆರವಿನಿಂದ 6 ವಿಕೆಟ್ ಕಳೆದುಕೊಂಡು 206 ರನ್ ಕಲೆ ಹಾಕಿತು. ಎರಡನೇ ದಿನ ಆಟ ಮುಂದುವರೆಸಿ, ರವೀಂದ್ರ ಜಡೇಜಾ(58)ರವರ ಅರ್ಧಶತಕದ ನೆರವಿನಿಂದ 297 ರನ್ಗೆ ತನ್ನ ಮೊದಲ ಇನ್ನಿಂಗ್ಸ್ಗೆ ತೆರೆ ಎಳೆಯಿತು. ವೆಸ್ಟ್ ಇಂಡೀಸ್ ಪರವಾಗಿ ಕೆಮರ್ ರೋಚ್ 4 ಹಾಗೂ ಗ್ಯಾಬ್ರಿಯಲ್ 3 ವಿಕೆಟ್ಗಳನ್ನು ಪಡೆದು ಮಿಂಚಿದ್ರು. ಬಳಿಕ ಬ್ಯಾಟಿಂಗ್ಗೆ ಇಳಿದ ವೆಸ್ಟ್ಇಂಡೀಸ್ ಬ್ಯಾಟ್ಸ್ಮನ್ಗಳಿಗೆ ವೇಗಿ ಇಶಾಂತ್ ಶರ್ಮಾರವರು ಸಿಂಹಸ್ವಪ್ನವಾಗಿ ಕಾಡಿದ್ರು. 13 ಓವರ್ ಬೌಲಿಂಗ್ ಮಾಡಿದ ಇಶಾಂತ್ ಶರ್ಮಾ 42 ರನ್ ನೀಡಿ 5 ವಿಕೆಟ್ ಕಬಳಿಸಿದ್ರು. ಈ ಮೂಲಕ ಇಶಾಂತ್ ಶರ್ಮಾ ಟೆಸ್ಟ್ ಕ್ರಿಕೆಟ್ನಲ್ಲಿ 9ನೇ ಬಾರಿಗೆ 5 ವಿಕೆಟ್ ಪಡೆದ ಸಾಧನೆ ಮಾಡಿದ್ರು. 88 ರನ್ನಿಗೆ 4 ವಿಕೆಟ್ಗಳನ್ನು ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಹೋಲ್ಡರ್ ಪಡೆಗೆ ಒಂದು ಹಂತದಲ್ಲಿ ರೋಸ್ಟನ್ ಚೇಸ್(48), ಶಾಯ್ ಹೋಪ್(24), ಶಿಮ್ರಾನ್ ಹೇಟ್ಮಯರ್(35) ಆಸರೆಯಾಗುವ ಯತ್ನ ನಡೆಸಿದ್ರು. ಆದ್ರೆ ಇಶಾಂತ್ ಶರ್ಮಾ ಅವರ್ಯಾರನ್ನೂ ತಳವೂರಲು ಬಿಡಲಿಲ್ಲ. ಇನ್ನು ಭಾರತ ತಂಡ 108 ರನ್ನ್ಗಳ ಮುನ್ನಡೆ ಹೊಂದಿದ್ದು, 3ನೇ ದಿನವಾದ ಇಂದು ಮತ್ತೆ ತನ್ನ ಎರಡನೇ ಇನ್ನಿಂಗ್ಸ್ ಆರಂಭಿಸುವ ಸಾಧ್ಯತೆ ದಟ್ಟವಾಗಿದೆ.
