ಚೊಚ್ಚಲ ಮ್ಯಾಚ್​ನಲ್ಲೇ ದಾಖಲೆ ಬರೆದ ಸೈನಿ..!

ವೆಸ್ಟ್​ ಇಂಡೀಸ್ ವಿರುದ್ಧದ ಮೂರು ಪಂದ್ಯಗಳ ಟಿ20 ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ 4 ವಿಕೆಟ್​ಗಳಿಂದ ಗೆದ್ದು ಬೀಗಿದೆ. ನಿನ್ನೆ ಅಮೆರಿಕಾದ ಪ್ಲೋರಿಡಾದ ಲಾಡರ್ ಹಿಲ್​ನ ಸೆಂಟ್ರಲ್​ ಬ್ರೋವರ್ಡ್​ ರೀಜಿನಲ್ ಪಾರ್ಕ್​ ಸ್ಟೇಡಿಯಂನಲ್ಲಿ ನಡೆದ ಮ್ಯಾಚ್​​​ನಲ್ಲಿ ಭಾರತದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದು ಆರ್​ಸಿಬಿ ವೇಗಿ ನವದೀಪ್ ಸೈನಿ.
ಮೊದಲ ಪಂದ್ಯದಲ್ಲೇ ಮಿಂಚಿನ ಪ್ರದರ್ಶನ (17ಕ್ಕೆ 3) ನೀಡಿದ ಸೈನಿ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೂ ಪಾತ್ರರಾದರು. ಅಷ್ಟೇ ಅಲ್ಲದೆ ಈ ಮ್ಯಾಚ್​ನಲ್ಲಿ ಸೈನಿ ವಿಶೇಷ ದಾಖಲೆಯನ್ನು ಕೂಡ ಮಾಡಿದ್ದಾರೆ.
ತಂಡದ ಪರ 20ನೇ ಓವರ್ ಬೌಲಿಂಗ್ ಮಾಡಿದ ಸೈನಿ.. ಆ ಓವರ್​ನಲ್ಲಿ ಎದುರಾಳಿಗೆ ತಂಡಕ್ಕೆ ಒಂದೇ ಒಂದು ರನ್​ ಬಿಟ್ಟು ಕೊಡಲಿಲ್ಲ. ಟಿ20 ಇಂಟರ್​​ನ್ಯಾಷನಲ್​ನಲ್ಲಿ ಕೊನೆಯ ಓವರ್ ಮೇಡನ್​ ಮಾಡಿದ ಭಾರತದ ಮೊದಲ ಹಾಗೂ ವಿಶ್ವಕ್ರಿಕೆಟ್​ನ 4ನೇ ಬೌಲರ್ ಎನಿಸಿಕೊಂಡಿದ್ದಾರೆ. 2008ರಲ್ಲಿ ನ್ಯೂಜಿಲೆಂಡ್​ನ ಜೀತನ್​ ಪಟೇಲ್, 2010ರಲ್ಲಿ ಪಾಕಿಸ್ತಾನದ ಮೊಹಮ್ಮದ್​ ಆಮಿರ್, 2019ರಲ್ಲಿ ಸಿಂಗಾಪುರದ ಜನಕ್​ ಪ್ರಕಾಶ್ ಈ ಸಾಧನೆ ಮಾಡಿದ್ದರು.