ಟೀ ಇಂಡಿಯಾ ಇಡೀ ವಿಶ್ವ ಕ್ರಿಕೆಟನ್ನು ಆಳ್ತಿದೆ..! ಲೆಕ್ಕವಿಲ್ಲದಷ್ಟು ದಿಗ್ಗಜರನ್ನು ವಿಶ್ವ ಕ್ರಿಕೆಟ್ಗೆ ಪರಿಚಯಿಸಿದ್ದು ಟೀಮ್ ಇಂಡಿಯಾವೇ..! ಇಂದು ಕೂಡ ಘಟಾನುಘಟಿ, ವಿಶ್ವ ಶ್ರೇಷ್ಠ ಕ್ರಿಕೆಟಿಗರಿರುವುದು ಭಾರತದಲ್ಲೇ..! ಟೀಮ್ ಇಂಡಿಯಾದ ನಾಯಕ ವಿರಾಟ್ ಕೊಹ್ಲಿಯೇ ವಿಶ್ವದ ನಂಬರ್ 1 ಬ್ಯಾಟ್ಸ್ಮನ್, ಉಪ ನಾಯಕ ರೋಹಿತ್ ಶರ್ಮಾರೇ ನಂಬರ್ 2..! ಬೌಲಿಂಗ್ನಲ್ಲೂ ನಮ್ ಟೀಮ್ ಇಂಡಿಯಾದ ವೇಗಿ ಜಸ್ಪ್ರೀತ್ ಬುಮ್ರಾರೇ ಫಸ್ಟ್..!
ಹೀಗೆ ಭಾರತ ಕ್ರಿಕೆಟ್ ವಿಶ್ವ ಮಟ್ಟದಲ್ಲಿ ಯಶಸ್ಸಿನ ಶಿಖರದ ತುತ್ತ ತುದಿಯಲ್ಲಿದೆ. ಆದ್ರೆ, ಟೀಮ್ ಇಂಡಿಯಾದ ಕ್ಯಾಪ್ಟನ್ ಕೊಹ್ಲಿ ಹಾಗೂ ವೈಸ್ ಕ್ಯಾಪ್ಟನ್ ಶರ್ಮಾ ನಡುವೆ ಕೋಲ್ಡ್ವಾರ್ ನಡೀತಾ ಇದೆ ಅನ್ನೋ ಗುಸುಗುಸು ಚರ್ಚೆಯೊಂದೇ ಬೇಜಾರಿನ ವಿಷಯ..! ಈ ಇಬ್ಬರು ಸ್ಟಾರ್ ಆಟಗಾರರ ನಡುವಿನ ಮುನಿಸು ಟೀಮ್ ಇಂಡಿಯಾದ ಮೇಲೆ ಪ್ರಭಾವ ಬೀರುತ್ತಾ ಅನ್ನೋ ಆತಂಕ..!
ಈ ಬಗ್ಗೆ ಮೊನ್ನೆ ಮೊನ್ನೆಯಷ್ಟೇ ಪ್ರತಿಕ್ರಿಯೆ ನೀಡಿದ್ದ ವಿರಾಟ್ ಕೊಹ್ಲಿ, ನಮ್ಮ ನಡುವೆ ಏನೂ ಇಲ್ಲ ಎಂದು ಹೇಳುವ ಮೂಲಕ ವಿವಾದಕ್ಕೆ ತೆರೆ ಎಳೆದಿದ್ರು. ಆದ್ರೆ, ನಿನ್ನೆ ರೋಹಿತ್ ಶರ್ಮಾ ‘ನಾನು ತಂಡಕ್ಕೋಸ್ಕರ ಮಾತ್ರ ಫೀಲ್ಡ್ಗೆ ಇಳಿಯಲ್ಲ. ಇಡೀ ದೇಶವನ್ನು ಪ್ರತಿನಿಧಿಸಲು ಇಳಿಯುತ್ತೇನೆ’ ಅಂತ ಮಾಡಿದ್ದ ಟ್ವೀಟ್ ಮತ್ತೆ ಹತ್ತಾರು ಚರ್ಚೆಗೆ ಕಾರಣವಾಗಿದೆ.
ಕೊಹ್ಲಿ – ರೋಹಿತ್ ನಡುವೆ ಕೋಲ್ಡ್ವಾರ್ ನಡೀತಾ ಇದೆ ಅನ್ನೋ ಮಾತುಗಳಿಗೆ ಸಂಬಂಧಿಸಿದಂತೆ ಭಾರತಕ್ಕೆ ಚೊಚ್ಚಲ ವರ್ಲ್ಡ್ಕಪ್ ತಂದುಕೊಟ್ಟಿದ್ದ ಕ್ಯಾಪ್ಟನ್ ಕಪೀಲ್ ದೇವ್ ಪ್ರತಿಕ್ರಿಯಿಸಿದ್ದಾರೆ. ‘ಕೊಹ್ಲಿ, ರೋಹಿತ್ ನಡುವೆ ಯಾವ್ದೇ ಜಗಳವಿರಬಹುದು. ಅದು ಕ್ರಿಕೆಟ್ ಫೀಲ್ಡ್ನಿಂದ ಆಚೆಗಿರ್ಬೇಕು. ಅವರಿಬ್ಬರ ನಡ್ವೆ ಕ್ರಿಡಾ ಬದ್ಧತೆ ಎಲ್ಲಿ ತನಕ ಇರುತ್ತೋ, ಅಲ್ಲಿವರೆಗೂ ಇನ್ನುಳಿದ ವಿಚಾರಗಳು ಅಪ್ರಸ್ತುತ. ಫೀಲ್ಡ್ನಲ್ಲಿ ಒಂದೇ ಗುರಿಗಾಗಿ ಆಡಿ, ಮ್ಯಾಚ್ ಹೇಗೆ ಗೆಲ್ತೀರಿ ಅನ್ನೋದಷ್ಟೇ ಮುಖ್ಯ’ ಅಂತ ಕಪಿಲ್ ದೇವ್ ಹೇಳಿದ್ದಾರೆ.
