ಬೆಂಗಳೂರು : ರಿಲಯನ್ಸ್ ಜಿಯೋದ ಬಹುನಿರೀಕ್ಷೆಯ ಏರ್ಫೈಬರ್ ಸರ್ವಿಸ್ನ ಬಿಡುಗಡೆ ಮುಹೂರ್ತ ಫಿಕ್ಸ್ ಆಗಿದೆ.
ರಿಲಯನ್ಸ್ನ 46ನೇ ವಾರ್ಷಿಕ ಮಹಾಸಭೆಯಲ್ಲಿ ಮುಕೇಶ್ ಅಂಬಾನಿ ಅವರು ಏರ್ಫೈಬರ್ ಸರ್ವಿಸ್ ಬಗ್ಗೆ ಪ್ರಸ್ತಾಪಿಸಿದ್ದು, ಗಣೇಶ ಚತುರ್ಥಿ ಹಬ್ಬದ ದಿನವಾದ ಸೆಪ್ಟೆಂಬರ್ 19ರಂದು ಬಿಡುಗಡೆ ಮಾಡುತ್ತಿರುವುದಾಗಿ ಹೇಳಿದ್ದಾರೆ.
ಈ ಏರ್ಫೈಬರ್ ಸೇವೆ ಮೂಲಕ ಜಿಯೋ ದಿನಕ್ಕೆ ಒಂದೂವರೆ ಲಕ್ಷ ಕನೆಕ್ಷನ್ಗಳ ವೇಗದಲ್ಲಿ ಒಟ್ಟು 20 ಕೋಟಿಯಷ್ಟು ಗ್ರಾಹಕರನ್ನು ತಲುಪುವ ಗುರಿ ಹೊಂದಿದೆ. ‘ಭಾರತದಾದ್ಯಂತ ಇರುವ 5ಜಿ ನೆಟ್ವರ್ಕ್ ಅನ್ನು ಜಿಯೋ ಏರ್ಫೈಬರ್ ಬಳಸುತ್ತದೆ. ಇದರಿಂದ ದಿನಕ್ಕೆ 1.5 ಲಕ್ಷ ಕನೆಕ್ಷನ್ ಕೊಡಲು ಸಾಧ್ಯವಾಗುತ್ತದೆ,’ ಎಂದು ಮುಕೇಶ್ ಅಂಬಾನಿ ಮಾಹಿತಿ ನೀಡಿದ್ದಾರೆ.
ರಿಲಯನ್ಸ್ ಜಿಯೋದ ಬ್ರಾಡ್ಬ್ಯಾಂಡ್ ಸೇವೆಯಾದ ಜಿಯೋಫೈಬರ್ ಸೇವೆಯನ್ನು 1 ಕೋಟಿ ಗ್ರಾಹಕರು ಪಡೆದಿದ್ದಾರೆ. ಮುಂದಿನ ದಿನಗಳಲ್ಲಿ ಜಿಯೋ ಏರ್ಫೈಬರ್ ಸೇವೆಯನ್ನು 20 ಕೋಟಿ ಗ್ರಾಹಕರಿಗೆ ತಲುಪಿಸುವ ಗುರಿ ಇದೆ ಎಂದು ಅಂಬಾನಿ ಹೇಳಿದ್ದಾರೆ.
