ಬೆಂಗಳೂರು: ಇದು ಥೇಟ್ ಸಿನಿಮಾ ಶೈಲಿಯಲ್ಲಿ ನಡೆದಿರೋ ಭಯಾನಕ ಘಟನೆ. ಇತ್ತೀಚೆಗೆ ಬೆಂಗಳೂರಲ್ಲಿ ಒಂದಲ್ಲಾ ಒಂದು ಕ್ರೈಮ್ ಘಟನೆಗಳು ನಡೀತಾನೇ ಇವೆ. ಇದೀಗ ನಗರದ ಪ್ರತಿಷ್ಠಿತ ಏರಿಯಾ, 24/7 ಜೀವಕಳೆಯಿಂದ ಕೂಡಿರುವ ಎಂಜಿ ರಸ್ತೆಯಲ್ಲೇ ಕಿಡ್ನ್ಯಾಪ್ ಘಟನೆಯೊಂದು ನಡೆದಿರೋದು ಬಯಲಾಗಿದೆ. ನಿಜಕ್ಕೂ ಇದು ಆಘಾತಕಾರಿ ಘಟನೆ.
ಈ ಘಟನೆ ಇದೇ ಜೂನ್ 16ರಂದು ನಡೆದಿದೆ. ಹೈಫೈ ಲೈಫ್ ಲೀಡ್ ಮಾಡ್ತಿರೋ ರಾಜು ಎಂಬಾತನನ್ನ ಕಿಡ್ನಾಪ್ ಮಾಡಿತ್ತು ಖತರ್ನಾಕ್ ಗ್ಯಾಂಗ್. ಈ ರಾಜು ಸ್ಟಾಕ್ ಮಾರ್ಕೆಟ್ನಲ್ಲಿ ಇನ್ವೆಸ್ಟ್ ಮಾಡೋ ಕೆಲಸದಲ್ಲಿದ್ದ. ಈತನೂ ಒಂದಿಷ್ಟು ಶೋಕಿಗೆ, ಐಷಾರಾಮಿ ಕಾರ್ ಮತ್ತು ಕ್ರಿಕೆಟರ್ಗಳ ಜೊತೆ ಪೋಸ್ ಕೊಟ್ಟು, ಹೈಫೈ ಲೈಫ್ ಲೀಡ್ ಮಾಡೋರಂತೆ ಸೋಷಿಯಲ್ ಮೀಡಿಯಾಗಳಲ್ಲಿ ಪೋಸ್ಟ್ ಹಾಕ್ತಿದ್ದ. ಈತನನ್ನ ವಾಚ್ ಮಾಡಿತ್ತು ಆಂಧ್ರ ಮೂಲದ ಖದೀಮರ ಗ್ಯಾಂಗ್. ಈತ ಯಾರೋ ದೊಡ್ಡ ಕುಳ ಇರಬೇಕು ಎಂದು ಕಿಡ್ನಾಪ್ ಮಾಡಿತ್ತು. ಈ ದೃಶ್ಯ ಎಂಜಿ ರಸ್ತೆಯ ಸಿಸಿ ಟಿವಿಯಲ್ಲಿ ಸೆರೆಯಾಗಿದೆ.
ಸಿನಿಮಾ ಮಾದರಿಯಲ್ಲಿ ರಾಜುನನ್ನ ಅಪಹರಣಕಾರರು ಕವರಪ್ ಮಾಡ್ತಾರೆ. ಬಳಿಕ ಆತನನ್ನ ಎತ್ತಿಕೊಂಡು ವಾಹನದಲ್ಲಿ ತೂರಿಸಿ ಪರಾರಿಗೆ ಮುಂದಾಗ್ತಾರೆ. ಈ ವೇಳೆ ಖದೀಮರಿಂದ ತಪ್ಪಿಸಿಕೊಳ್ಳಲು ರಾಜು ಸಾಕಷ್ಟು ಪ್ರಯತ್ನ ಮಾಡ್ತಾನೆ. ಕಿರುಚುತ್ತಾನೆ. ಆದ್ರೆ ಅಲ್ಲಿ ಹೋಗುತ್ತಿರೋ ಯಾರೊಬ್ಬರೂ ಈತನ ಸಹಾಯಕ್ಕೆ ಧಾವಿಸಲ್ಲ.
ಇದನ್ನೂ ಓದಿ: ಹೈವೇನಲ್ಲಿ ಹಾಯ್ ಬೇಬಿ ಅಂತಾ ಕ್ವಾಟ್ಲೆ..!: ವಿಡಿಯೋ ಮಾಡ್ತಿದ್ದಂತೆ ವೀಲಿಂಗ್ ಪುಡಾಂಗ್ಗಳು ಪರಾರಿ
ಈತನನ್ನ ಕಿಡ್ನ್ಯಾಪ್ ಮಾಡಿದ್ದ ಗ್ಯಾಂಗ್ ತೆಲಂಗಾಣದ ಅರಣ್ಯ ಪ್ರದೇಶದ ಫಾರ್ಮ್ ಹೌಸ್ ಒಂದರಲ್ಲಿ ಕೂಡಿ ಹಾಕಿತ್ತು. ಈತನ ಕತ್ತಿನ ಮೇಲೆ ಚಾಕು ಮತ್ತು ಮಾರಕಾಸ್ತ್ರ ಇಟ್ಟು ಆರೋಪಿಗಳು ಹಲ್ಲೆಗೈದು ಬೆದರಿಕೆ ಹಾಕಿದ್ರು. ಬರೋಬ್ಬರಿ ಐದು ಕೋಟಿ ಹಣಕ್ಕೆ ಡಿಮ್ಯಾಂಡ್ ಮಾಡಿದ್ರು. ಈತ ಷೇರ್ ಮಾರ್ಕೆಟ್ನಲ್ಲಿ ಇನ್ವೆಸ್ಟ್ ಮಾಡ್ತಿರೋ ಕಂಪನಿಯಲ್ಲಿ ಇದ್ದುದರಿಂದ ಬಿಟ್ ಕಾಯ್ನ್ ಬಗ್ಗೆ ಈತನಿಗೆ ಚೆನ್ನಾಗಿ ಗೊತ್ತಿರುತ್ತೆ ಅನ್ಕೊಂಡಿದ್ರು. ಹಾಗಾಗಿ ಬಿಟ್ ಕಾಯ್ನ್ಗೂ ಪುಂಡರ ಗುಂಪು ಬೇಡಿಕೆ ಇಟ್ಟಿತ್ತು. ಇಂಟರ್ ನ್ಯಾಷನಲ್ ಅಕೌಂಟ್ನಲ್ಲಿರೋ ಹಣ ಟ್ರಾನ್ಸ್ಫರ್ಗೆ ಬೇಡಿಕೆ ಇಡಲಾಗಿತ್ತು.
ರಾಜು ಕಿಡ್ನ್ಯಾಪ್ ಆಗಿರುವ ಸುದ್ದಿ ತಿಳಿದು ಸ್ನೇಹಿತನೊಬ್ಬ ಹಲಸೂರು ಠಾಣೆಗೆ ದೂರು ನೀಡಿದ್ದ. ಸಿಸಿಟಿವಿ ಪರಿಶೀಲಿಸಿದ್ದ ಪೊಲೀಸರು, ಅದೇ ಜಾಡು ಹಿಡಿದು ತನಿಖೆ ಆರಂಭಿಸಿದ್ರು. ವಾಹನ ಸಾಗಿದ ಮಾರ್ಗ ಗುರುತಿಸಿ ಆರೋಪಿಗಳನ್ನ ಪತ್ತೆ ಹಚ್ಚಿದ್ರು. ಕೇವಲ 48 ಗಂಟೆಗಳಲ್ಲಿ ರಾಜು ಕಿಡ್ನ್ಯಾಪ್ ಮಾಡಿಟ್ಟಿದ್ದ ಜಾಗಕ್ಕೆ ಲಗ್ಗೆ ಇಟ್ಟಿತ್ತು ಐಟಿಸಿಟಿಯ ಪೊಲೀಸರ ಟೀಮ್. ಅಲ್ಲಿದ್ದ ಇಬ್ಬರು ಆರೋಪಿಗಳನ್ನು ಬಂಧಿಸಿ, ಕಿಡ್ನ್ಯಾಪ್ ಆಗಿದ್ದ ರಾಜುನನ್ನ ಕಾಪಾಡಲಾಗಿದೆ. ಆದ್ರೆ ಖದೀಮರ ಗ್ಯಾಂಗ್ನಲ್ಲಿದ್ದ ಎಲ್ಲರನ್ನೂ ಬಂಧಿಸಲು ಪೊಲೀಸರು ತನಿಖೆ ಕೈಗೊಂಡಿದ್ದಾರೆ. ಬೆಂಗಳೂರಿನ ಎಂಜಿ ರೋಡಿನಲ್ಲೇ ನಡೆದಿರೋ ಈ ಘಟನೆ ಮಾತ್ರ ಎಲ್ಲರೂ ಬೆಚ್ಚಿಬೀಳುವಂತೆ ಮಾಡಿದೆ.
