ಕಲಬುರಗಿ : ಪ್ರಜ್ವಲ್ ರೇವಣ್ಣ ಪ್ರಕರಣದಲ್ಲಿ ಕಾಂಗ್ರೆಸ್ ‘ಮಹಾನಯಕ’ರ ಕೈವಾಡವಿದೆ ಎಂಬ ಮಾಜಿ ಸಿಎಂ ಹೆಚ್.ಡಿ. ಕುಮಾರಸ್ವಾಮಿ ಆರೋಪಕ್ಕೆ ಸಚಿವ ಪ್ರಿಯಾಂಕ್ ಖರ್ಗೆ ತಿರುಗೇಟು ನೀಡಿದ್ದಾರೆ.
ಕಲಬುರಗಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಮೊದಲು ನಿಮ್ಮ ಡಬಲ್ ‘ಆರ್’ ಬಗ್ಗೆ ಮಾತನಾಡಿ. ಪ್ರಜ್ವಲ್ ರೇವಣ್ಣ ಅಂಡ್ ಹೆಚ್.ಡಿ. ರೇವಣ್ಣ ಬಗ್ಗೆ ಯಾಕೆ ಮಾತನಾಡ್ತಿಲ್ಲ ಎಂದು ಪ್ರಶ್ನೆ ಮಾಡಿದ್ದಾರೆ.
ಪದೇ ಪದೆ ಹೆಚ್.ಡಿ. ಕುಮಾರಸ್ವಾಮಿ ಕಾಂಗ್ರೆಸ್ ಮೇಲೆ ಆರೋಪ ಮಾಡೋದ್ಯಾಕೆ? ನಾವು ಏನಾದರೂ ಹಿಡನ್ ಕ್ಯಾಮೆರಾ ಇಟ್ಟು ರೆರ್ಕಾಡ್ ಮಾಡಿಸಿದ್ದಿವಾ? ರೆಕಾರ್ಡ್ ಮಾಡಿದ್ದು ಅವರು, ಪೆನ್ಡ್ರೈವ್ ಮಾಡಿದ್ದು ಅವರ ಡ್ರೈವರ್, ಹಂಚಿದ್ದು ಬಿಜೆಪಿ ಪರಾಜಿತ ಅಭ್ಯರ್ಥಿ. ಸುಮ್ಮನೆ ಮಹಾನಾಯಕ ಅಂತ ಆರೋಪ ಮಾಡೊದು ಬಿಡಬೇಕು ಎಂದು ಹೇಳಿದ್ದಾರೆ.
ಆ ಸಂತ್ರಸ್ತ ಹೆಣ್ಮಕ್ಕಳ ಬಳಿ ಕ್ಷಮೆ ಕೇಳಿ
ಕುಮಾರಸ್ವಾಮಿಯವರು ಎಸ್ಐಟಿಯನ್ನ ತ್ರಿಬಲ್ ಎಸ್‌ಐಟಿ ಅಂತಾರೆ. ಮೊದಲು ನಿಮ್ಮ ಡಬಲ್ ‘R’ ಬಗ್ಗೆ ಮಾತನಾಡಿಲಿ. ಹೆಣ್ಣು ಮಕ್ಕಳ ಮಾನ ಹರಾಜು ಹಾಕಿದ್ದಾರೆ ಎನ್ನುವವರು ವಿಡಿಯೋ ರೆಕಾರ್ಡ್ ಮಾಡಿಕೊಂಡವರ ಬಗ್ಗೆ ಮಾತನಾಡಬೇಕಲ್ವಾ..? ಮೊದಲು ಆ ಸಂತ್ರಸ್ತ ಹೆಣ್ಣು ಮಕ್ಕಳ ಬಳಿ ಕ್ಷಮೆ ಕೇಳಲಿ. ನಮ್ಮ ಮನೆ ಮಗನಿಂದ ತಪ್ಪಾಗಿದೆ ಅಂತ ಕ್ಷಮೆಯಾಚಿಸಲಿ ಎಂದು ಕುಟುಕಿದ್ದಾರೆ.
ವಿಡಿಯೋದಲ್ಲಿರುವ ಆ್ಯಕ್ಟರ್ ಯಾರು..?
ಅಶೋಕಣ್ಣ ನಮ್ಮ ನಾಯಕರನ್ನ ಸ್ಕ್ರಿಪ್ಟ್ ರೈಟರ್, ಡೈರೆಕ್ಟರ್, ಪ್ರಡ್ಯೂಸರ್ ಅಂತಾರೆ. ಆದ್ರೆ, ಆ ವಿಡಿಯೋದಲ್ಲಿರುವ ಆ್ಯಕ್ಟರ್ ಯಾರು..? ಆ ಆ್ಯಕ್ಟರ್ ನಮ್ಮ ಪ್ರಕಾರ ವಿಲನ್, ಬಿಜೆಪಿಯವರ ಪ್ರಕಾರ ಹೀರೋ. ಡೈರೆಕ್ಟರ್, ಪ್ರಡ್ಯೂಸರ್ ಬಿಟ್ಟು ಆ್ಯಕ್ಟರ್ ಬಗ್ಗೆ ಮಾತನಾಡಲಿ ಎಂದು ಆರ್. ಅಶೋಕ್ ಹಾಗೂ ಬಿಜೆಪಿ ವಿರುದ್ಧ ಪ್ರಿಯಾಂಕ್ ಖರ್ಗೆ ವಾಗ್ದಾಳಿ ನಡೆಸಿದ್ದಾರೆ.
