ಬೆಂಗಳೂರು : ಬೌಲಿಂಗ್ನಲ್ಲಿ ಜಡ್ಡು ಜಾದು. ಬ್ಯಾಟಿಂಗ್ನಲ್ಲಿ ಋತು ರಾಕ್. ಕೆಕೆಆರ್ ಫ್ಯಾನ್ಸ್ಗೆ ಬೇವು, ಸಿಎಸ್ಕೆ ಫ್ಯಾನ್ಸ್ಗೆ ಬೆಲ್ಲ. ಸೋಲೇ ಕಾಣದ ಕೋಲ್ಕತ್ತಾಗೆ ಸೋಲಿನ ರುಚಿ ತೋರಿಸಿದ ಚೆನ್ನೈ.
ಚೆನ್ನೈನ ಎಂ.ಎ ಚಿದಂಬರಂ ಮೈದಾನದಲ್ಲಿ ನಡೆದ ಕೋಲ್ಕತ್ತಾ ವಿರುದ್ಧದ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ 7 ವಿಕೆಟ್ಗಳ ಭರ್ಜರಿ ಗೆಲುವು ದಾಖಲಿಸಿತು.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಕೋಲ್ಕತ್ತಾ ನಿಗದಿತ 20 ಓವರ್ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 137 ರನ್ ಗಳಿಸಿತು. ಈ ಸುಲಭ ಗುರಿಯನ್ನು ಬೆನ್ನಟ್ಟಿದ ಚೆನ್ನೈ ಸೂಪರ್ ಕಿಂಗ್ಸ್ 17.4 ಓವರ್ಗಳಲ್ಲಿ 3 ವಿಕೆಟ್ ಕಳೆದುಕೊಂಡು ಗೆಲುವಿನ ನಗೆ ಬೀರಿತು. ಸತತ ಎರಡು ಸೋಲುಗಳ ಬಳಿಕ ಋತುರಾಜ್ ಪಡೆ ಗೆಲುವಿನ ಟ್ರ್ಯಾಕ್ಗೆ ಮರಳಿತು.
ಸುಲಭ ಟಾರ್ಗೆಟ್ ಬೆನ್ನಟ್ಟಿದ ಚೆನ್ನೈಗೆ ನಾಯಕ ಋತುರಾಜ್ ಗಾಯಕ್ವಾಡ್ ಹಾಗೂ ರಚಿನ್ ರವೀಂದ್ರ ಉತ್ತಮ ಆರಂಭ ನೀಡಿದರು. ರಚಿನ್ 15 ರನ್ ಗಳಿಸಿ ಔಟಾದರು. ಬಳಿಕ ಬಂದ ಮಿಚೆಲ್ 25 ರನ್ಗಳ ಕಾಣಿಕೆ ನೀಡಿದರು. ಶಿವಂ ದುಬೆ 3 ಸಿಕ್ಸ್ ಹಾಗೂ ಒಂದು ಬೌಂಡರಿ ಸಿಡಿಸಿ (28) ಅಬ್ಬರಿಸಿದರು.
ಋತುರಾಜ್ ಬೊಂಬಾಟ್ ಅರ್ಧಶತಕ
ಕೊನೆಯ ಎಸೆತದ ವರೆಗೂ ನಾಯಕನ ಆಟ ಪ್ರದರ್ಶಿಸಿದ ಋತುರಾಜ್ ಗಾಯಕ್ವಾಡ್ ಅವರು ಚೆನ್ನೈ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಗೆಲುವಿಗೆ 3 ರನ್ ಬೇಕಿದ್ದಾಗ ಮಹೇಂದ್ರ ಸಿಂಗ್ ಧೋನಿ ಮೈದಾನದಲ್ಲಿ ಫ್ಯಾನ್ಸ್ಗೆ ದರ್ಶನ ನೀಡಿದರು. ಋತುರಾಜ್ ಅರ್ಧಶತಕ (67) ಸಿಡಿಸಿ ಮಿಂಚಿದರು. ಕೆಕೆಆರ್ ಪರ ವೈಭವ್ ಅರೋರಾ 2 ಹಾಗೂ ಸುನಿಲ್ ನರೈನ್ ಒಂದು ವಿಕೆಟ್ ಪಡೆದರು.
ಬೌಲಿಂಗ್ನಲ್ಲಿ ಜಡ್ಡು ಜಾದು
ಮೊದಲು ಬ್ಯಾಟಿಂಗ್ ಮಾಡಿದ ಕೆಕೆಆರ್ ಆರಂಭದಿಂದಲೂ ವೈಫಲ್ಯ ಅನುಭವಿಸಿತು. ಫಿಲ್ ಸಾಲ್ಟ್ ಶೂನ್ಯಕ್ಕೆ ನಿರ್ಗಮಿಸಿದರು. ಚೆನ್ನೈ ಪರ ರವೀಂದ್ರ ಜಡೇಜಾ ಮ್ಯಾಜಿಕ್ ಮಾಡಿದರು. ಜಡೇಜಾ 3, ತುಷಾರ್ ದೇಶಪಾಂಡೆ 3, ರೆಹಮಾನ್ 2 ಹಾಗೂ ಮಹೀಶ್ ತೀಕ್ಷಣ ಒಂದು ವಿಕೆಟ್ ಪಡೆದರು. ಕೆಕೆಆರ್ ಪರ ನಾಯಕ ಶ್ರೇಯಸ್ ಅಯ್ಯರ್ 34, ನರೈನ್ 27, ರಘುವಂಶಿ 24 ರನ್ ಗಳಿಸಿದರು. ಹ್ಯಾಟ್ರಿಕ್ ಗೆಲುವು ಕಂಡಿದ್ದ ಕೊಲ್ಕತ್ತಾ ಮೊದಲ ಸೋಲು ಅನುಭವಿಸಿತು.
.@imjadeja set the ball rolling for @ChennaiIPL & bagged the Player of the Match award as #CSK beat #KKR at Chepauk 👏 👏
Scorecard ▶ https://t.co/5lVdJVscV0#TATAIPL | #CSKvKKR pic.twitter.com/cjMwEo83hB
— IndianPremierLeague (@IPL) April 8, 2024
