ಅರ್ಜುನ್ ರೆಡ್ಡಿಯಿಂದ ಕ್ರೇಜ್ ಕಾ ಬಾಪ್ ಆಗಿದ್ದ ವಿಜಯ್ ದೇವರಕೊಂಡ, ಇದೀಗ ಕ್ರಾಸ್ಬ್ರೀಡ್ ಸಾಲಾ ಲೈಗರ್ ಆಗಿ ಅಬ್ಬರಿಸುತ್ತಿದ್ದಾರೆ. ಬಾಕ್ಸಿಂಗ್ ದಂತಕಥೆ ಮೈಕ್ ಟೈಸನ್, ಬಾಹುಬಲಿಯ ಶಿವಗಾಮಿಯ ಗತ್ತು, ಗಮ್ಮತ್ತು ಇರೋ ಲೈಗರ್ ಟ್ರೈಲರ್ಗೆ ಸಿನಿದುನಿಯಾ ಸ್ಟನ್ ಆಗಿದೆ. ಪೂರಿ ಸ್ಟೈಲ್ ಆಫ್ ಮೇಕಿಂಗ್ನಲ್ಲಿ ಲೈಗರ್ ದರ್ಶನ ಒಮ್ಮೆ ಮಾಡಿಬಿಡಿ.
ಅರ್ಜುನ್ ರೆಡ್ಡಿಯನ್ನ ಮೀರಿಸೋ ದೇವರಕೊಂಡ ಲೈಗರ್
ಪೂರಿ ಸೃಷ್ಟಿಸಿದ ಕ್ರಾಸ್ಬ್ರೀಡ್ ಸಾಲಾ ಲೈಗರ್ ಗಜ ಘರ್ಜನೆ
ತೊದಲು ಭಾಷೆಯಲ್ಲಿ ಫೈಟರ್ನ ಮೆಗಾ ಫೈಟಿಂಗ್..!
ಮೈಕ್ ಟೈಸನ್ ಪಂಚ್.. ಶಿವಗಾಮಿ ರಮ್ಯಾ ಗಮ್ಮತ್ತು
ಟಾಲಿವುಡ್ ಸೂಪರ್ ಸ್ಟಾರ್ ವಿಜಯ್ ದೇವರಕೊಂಡ ಹಾಗೂ ಮಾಸ್ ಡೈರೆಕ್ಟರ್ ಪೂರಿ ಜಗನ್ನಾಥ್ ಕಾಂಬಿನೇಷನ್ನ ಸಿನಿಮಾ ಲೈಗರ್, ರಿಲೀಸ್ಗೂ ಮುನ್ನವೇ ವೈಬ್ರೇಷನ್ ಕ್ರಿಯೇಟ್ ಮಾಡಿದೆ. ಬಾಕ್ಸರ್ ಲುಕ್ನಲ್ಲಿ ಲೈಗರ್ ಚಿತ್ರ ಕೊಟ್ಟ ಕಾವು ಕ್ಷಣ ಕ್ಷಣಕ್ಕೂ ಕುತೂಹಲ ಕೆರಳಿಸುತ್ತಿದೆ. ಬಾಕ್ಸಿಂಗ್ ದಂತಕಥೆ, ದಿಗ್ಗಜ ಮೈಕ್ ಟೈಸನ್ ರೋಲ್ ಕೂಡ ಸಿನಿಮಾದಲ್ಲಿ ಕಿಚ್ಚಿನ ಕಿಡಿ ಹಚ್ಚಿದೆ. ಲೈಗರ್ ಚಿತ್ರದ ಟ್ರೈಲರ್ ರಿಲೀಸ್ ಆದ ಕೆಲವೇ ಕ್ಷಣಗಳಲ್ಲಿ ಹಿಟ್ಸ್ ದಾಖಲಿಸುತ್ತಿದೆ.
ಒಂದು ಲಯನ್ ಟೈಗರ್ಗೆ ಹುಟ್ಟಿರೋನು ಇವನು ಅನ್ನೋ ಮೈನವಿರೇಳಿಸೋ ಡೈಲಾಗ್ ಮೂಲಕ ಟ್ರೈಲರ್ ಆರಂಭವಾಗಲಿದೆ. ಎರಡು ನಿಮಿಷ ಐದು ಸೆಕೆಂಡ್ಗಳ ಕಾಲ ನಿಮ್ಮ ಮೈರೋಮಗಳು ನೆಟ್ಟಗಾಗುತ್ತವೆ. ಕ್ರಾಸ್ ಬ್ರೀಡ್ ಸರ್ ನನ್ನ ಮಗ ಅಂತಾ ಶಿವಗಾಮಿ ಖ್ಯಾತಿಯ ರಮ್ಯಾಕೃಷ್ಣ ಹೇಳೋ ಡೈಲಾಗ್ ಸಿನಿಮಾದಲ್ಲಿ ಟೈಗರ್ ಘರ್ಜನೆ ಯಾವ ಲೆವೆಲ್ನಲ್ಲಿ ಇರಲಿದೆ ಅನ್ನೋ ಮುನ್ಸೂಚನೆ ಕೊಟ್ಟಿದೆ.
ಚಡ್ಡಿ ಹಾಕೋ ವಯಸ್ಸಿನಲ್ಲೇ ವಿಜಯ್ ದೊಡ್ಡ ಫೈಟರ್. ಇವನನ್ನು ಎದುರು ಹಾಕ್ಕೋಂಡ್ರೆ ಮೂಳೆ ಮುರಿಯೋದ್ರಲ್ಲಿ ಟಾಪರ್. ಲಯನ್ ಟೈಗರ್ ಮಿಕ್ಸ್ ಬ್ರೀಡ್ ಇದು. ಹಾಗಾಗಿ ಬಾಕ್ಸಿಂಗ್ ಅಖಾಡಕ್ಕೆ ಇಳಿಯೋ ಮುಂಚೆ, ಮೈ ಕೈ ಗಟ್ಟಿ ಇದೆಯಾ ಅಂತಾ ನೋಡ್ಕೋಬೇಕು. ಸಿನಿಮಾದಲ್ಲಿ ಅಮ್ಮ ಮಗನ ಕಾಂಬಿನೇಷನ್ ವಿಭಿನ್ನವಾಗಿ ಮೂಡಿ ಬಂದಿದೆ. ಪ್ರೀತಿ, ಪ್ರೇಮ, ಸಾಹಸಮಯ ದೃಶ್ಯ, ತಾಯಿ ಮಗನ ಸೆಂಟಿಮೆಂಟ್ ಸಿನಿಮಾ ಉದ್ದಕ್ಕೂ ಇರೋ ಸೂಚನೆ ಸಿಕ್ಕಿದೆ. ವಿಜಯ್ಗೆ ಮಾತು ತಡವರಿಸಿದ್ರೂ, ಶತ್ರುಗಳನ್ನು ಸೆದೆಬಡಿಯಲು ಎಂದು ತಡವರಿಸೋದಿಲ್ಲ.
ಒಂದು ಕಡೆ ಲೈಗರ್ ಐ ಯಾಮ್ ಫೈಟರ್ ಅಂತಾ ಮೈ ಕೊಡವಿ ಬರೋ ಸಿಂಹನಂತೆ ಘರ್ಜನೆ ಮಾಡ್ತಿದ್ರೆ, ನೀನು ಫೈಟರ್ ಆದ್ರೇ, ನಾನು ಏನು ಅಂತಾ ಬಾಕ್ಸಿಂಗ್ ದಿಗ್ಗಜ ಮೈಕ್ ಟೈಸನ್ ಸವಾಲಾಕುತ್ತಾರೆ. ಒಟ್ನಲ್ಲಿ ವಿಶ್ವ ಕಂಡ ಶ್ರೇಷ್ಠ ದಿಗ್ಗಜ ಮೈಕ್ ಟೈಸನ್ ಜೊತೆ ನಡೆಯೋ ಯುದ್ಧ ಭರ್ಜರಿಯಾಗಿರಲಿದೆ. ಹಸಿದ ಹೆಬ್ಬುಲಿಗಳ ಹೋರಾಟ ಭಯಂಕರವಾಗಿರಲಿದೆ. ಹಾಲಿವುಡ್ ರೇಂಜ್ ಮೀರಿಸೋ ಲೈಗರ್ ಟ್ರೈಲರ್ಗೆ ಚಿತ್ರರಸಿಕರು ಕ್ಲೀನ್ ಬೋಲ್ಡ್ ಆಗಿದ್ದಾರೆ.
ಮದಗಜಗಳ ಸೆಣಸಾಟ ನೋಡೋಕೆ ಆಗಸ್ಟ್ 22ರವರೆಗೂ ಕಾಯಲೇಬೇಕು. ಒಟ್ಟು ಐದು ಭಾಷೆಗಳಲ್ಲಿ ಲೈಗರ್ ದರ್ಬಾರ್ ಜೋರಾಗಿರಲಿದೆ. ಪೂರಿ ಜಗನ್ನಾಥ್ ಊಹೆಗೂ ಮೀರಿದ ಸಿನಿಮಾ ರೆಡಿ ಮಾಡಿದ್ದಾರೆ. ವಿಜಯ್ ಕಟ್ಟುಮಸ್ತು ದೇಹ ಕಣ್ತುಂಬಿಕೊಳ್ಳೋಕೆ ಕೆಲದಿನಗಳವರೆಗು ಕಾಯಲೇಬೇಕಾಗಿದೆ. ಕಥೆ ಬರೆದು ನಿರ್ದೇಶನ ಮಾಡ್ತಿರೋ ಪುರಿ ಜಗನ್ನಾಥ್ ಅವರ ಕನಸಿನ ಸಿನಿಮಾ ಇದು. ಈ ಚಿತ್ರಕ್ಕೆ ಕರಣ್ ಜೋಹರ್, ಚಾರ್ಮಿ ಕೌರ್, ಅಪೂರ್ವ ಮೆಹ್ತಾ, ಪೂರಿ ಜಗನ್ನಾಥ್ ಕೂಡ ಬಂಡವಾಳ ಹೂಡಿದ್ದಾರೆ. ವಿಷ್ಣು ಶರ್ಮಾ ಕ್ಯಾಮೆರಾ ಕೈಚಳಕ ಟ್ರೈಲರ್ ಪೂರ್ತಿ ಜಗಮಗಿಸುತ್ತೆ. ಅಂತೂ ಕ್ರಾಸ್ ಬ್ರೀಡ್ ಕರಾಮತ್ತು ಸಿಲ್ವರ್ ಸ್ಕ್ರೀನ್ ಮೇಲೆ ಹೇಗಿರುತ್ತೋ ಕಾದು ನೋಡ್ಬೇಕು.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯೂರೋ, ಪವರ್ ಟಿವಿ