ಬಾಗಲಕೋಟೆ : ಬಸ್ನಲ್ಲಿ ಹಣ ಕಳೆದುಕೊಂಡವನಿಗೆ ಹಣ ಹಿಂದಿರುಗಿಸಿ ಕೆಎಸ್ಸಾರ್ಟಿಸಿ ಬಸ್ ಕಂಡಕ್ಟರ್ ಮಾನವೀಯತೆ ಮೆರೆದಿದ್ದಾರೆ.
ಬಾಗಲಕೋಟೆ ಜಿಲ್ಲೆ ಇಳಕಲ್ ಕೆಎಸ್ಸಾರ್ಟಿಸಿ ಡಿಪೋನಲ್ಲಿ ಈ ಅಪರೂಪದ ಘಟನೆ ನಡೆದಿದೆ. ಚನ್ನಬಸಪ್ಪ ಅವರೇ ಮಾನವೀಯತೆ ಮೆರೆದು ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರರಾದ ಕಂಡಕ್ಟರ್.
ಕರಡಿ ಗ್ರಾಮದ ಯಲ್ಲಪ್ಪ ಕುರಿ ಅವರು ಕೆಎಸ್ಸಾರ್ಟಿಸಿ ಬಸ್ನಲ್ಲಿ ಪ್ರಯಾಣಿಸಿದ್ದರು. ಈ ವೇಳೆ ಅವರ ಕ್ಯಾರಿಬ್ಯಾಗ್ ಬಸ್ನಲ್ಲೇ ಬಿಟ್ಟುಹೋಗಿದ್ದರು. ಆ ಬ್ಯಾಗ್ನಲ್ಲಿ 10 ಸಾವಿರ ರೂಪಾಯಿ ಹಾಗೂ ಇನ್ನಿತರೆ ದಾಖಲೆ ಇದ್ದವು. ಇನ್ನೇನು ಬ್ಯಾಗ್ ಇಲ್ಲ, ಹಣವೂ ಇಲ್ಲ ಎಂದು ಮನೆಯತ್ತ ಹೆಜ್ಜೆ ಹಾಕಿದ್ದರು ಯಲ್ಲಪ್ಪ ಕುರಿ.
ಹಣ ತಲುಪಿಸಿದ್ದು ಹೇಗೆ?
ಅಷ್ಟರಲ್ಲಿ ಬಸ್ನಲ್ಲಿದ್ದ ಬ್ಯಾಗ್ ಚನ್ನಬಸಪ್ಪ ಅವರ ಕಣ್ಣಿಗೆ ಬಿದ್ದಿತ್ತು. ಕೂಡಲೇ ಬ್ಯಾಗ್ನಲ್ಲಿದ್ದ ಮೊಬೈಲ್ ನಂಬರ್ ತೆಗೆದುಕೊಂಡು ಯಲ್ಲಪ್ಪ ಅವರಿಗೆ ಕರೆ ಮಾಡಿ ಮಾಹಿತಿ ತಿಳಿಸಿದ್ದರು ಚನ್ನಬಸಪ್ಪ. ಬಳಿಕ, ಹಣ ಕಳೆದುಕೊಂಡವ ಬಸ್ ಸ್ಟ್ಯಾಂಡ್ಗೆ ಬಂದು ತನ್ನ ಕ್ಯಾರಿ ಬ್ಯಾಗ್ ಹಾಗೂ ಅದರಲ್ಲಿದ್ದ 10 ಸಾವಿರ ರೂ. ಪಡೆದುಕೊಂಡಿದ್ದಾರೆ. ಮಾನವೀಯತೆ ಮೆರೆದ ಕಂಡಕ್ಟರ್ಗೆ ಕೈಮುಗಿದು ನಮಿಸಿ ಧನ್ಯವಾದ ಅರ್ಪಿಸಿದ್ದಾರೆ.
