ಕ್ರೇಜಿಸ್ಟಾರ್ ರವಿಚಂದ್ರನ್.. ಸ್ಯಾಂಡಲ್ವುಡ್ನ ಸ್ಟಾರ್ ನಟ, ನಿರ್ದೇಶಕ, ನಿರ್ಮಾಪಕ… ಕನ್ನಡ ಚಿತ್ರರಂಗಕ್ಕೆ ಹೊಸತನವನ್ನು ಕೊಟ್ಟ ‘ಕಲಾವಿದ’. ಆಟ ಆಡುವ ಮಕ್ಕಳಿಂದ ಹಿಡಿದು, ವೃದ್ಧರವರೆಗೂ ಎಲ್ಲರಿಗೂ ‘ಪ್ರೇಮಲೋಕ’ದ ಈ ‘ಚೆಲುವ’ ಗೊತ್ತು..! ಆದರೆ, ಬುಕ್ ಮೈ ಶೋನವರಿಗೆ ಮಾತ್ರ ಇನ್ನೂ ನಮ್ಮ ರವಿಚಂದ್ರನ್ ಗೊತ್ತಿಲ್ಲ..!
ಹೌದು, ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಸುಯೋಧನ (ದುರ್ಯೋಧನ) ಅವತಾರದಲ್ಲಿ ಮಿಂಚುತ್ತಿರುವ ಬಹು ನಿರೀಕ್ಷಿತ ‘ಕುರುಕ್ಷೇತ್ರ’ ಸಿನಿಮಾದ ರಿಲೀಸ್ಗೆ ರೆಡಿಯಾಗಿದೆ. ಇನ್ನೇನು ನಾಲ್ಕೇ ನಾಲ್ಕು ದಿನಕ್ಕೆ ‘ಕುರುಕ್ಷೇತ್ರ’ ತೆರೆಗೆ ಬರ್ತಾ ಇದೆ. ಈ ಶುಕ್ರವಾರ ರಿಲೀಸ್ ಆಗುತ್ತಿರೋ ಈ ಸಿನಿಮಾದಲ್ಲಿ ದರ್ಶನ್ ಮಾತ್ರವಲ್ಲದೆ, ರೆಬೆಲ್ ಸ್ಟಾರ್ ಅಂಬರೀಶ್, ಕ್ರೇಜಿಸ್ಟಾರ್ ರವಿಚಂದ್ರನ್, ಅರ್ಜುನ್ ಸರ್ಜಾ, ಶಶಿಕುಮಾರ್, ಆರುಮುಗಂ ಖ್ಯಾತಿಯ ರವಿಶಂಕರ್, ನಿಖಿಲ್ ಕುಮಾರಸ್ವಾಮಿ, ಬಾಲಿವುಡ್ ಸ್ಟಾರ್ ಸೋನು ಸೂದ್ ಸೇರಿದಂತೆ ದೊಡ್ಡ ತಾರಗಣವಿದೆ.
BookMyShowನಲ್ಲಿ ಈಗಾಗಲೇ ಟಿಕೆಟ್ ಬುಕ್ಕಿಂಗ್ ಶುರುವಾಗಿದೆ. ತಾರಾಗಣದ ಫೋಟೋದಲ್ಲಿ ಬುಕ್ ಮೈ ಶೋ ಯಡವಟ್ಟು ಮಾಡಿದೆ. ಕ್ರೇಜಿಸ್ಟಾರ್ ರವಿಚಂದ್ರನ್ ಅವರ ಬದಲಿಗೆ ತಮಿಳು ನಟ ರವಿಚಂದ್ರನ್ ಫೋಟೋ ಹಾಕಿದ್ದಾರೆ. ಅದೇರೀತಿ ಆರುಮುಗಂ ಖ್ಯಾತಿಯ ರವಿಶಂಕರ್ ಬದಲಿಗೆ ಸಿಲ್ಲಿಲಲ್ಲಿ ಧಾರವಾಹಿಯ ಡಾ. ವಿಠ್ಠಲ್ ರಾವ್ ಖ್ಯಾತಿಯ ರವಿಶಂಕರ್ ಫೋಟೋ ಹಾಕಿದ್ದಾರೆ. ಬುಕ್ಕಿಂಗ್ ಶುರುವಾಗಿ 2ದಿನಗಳಾದ್ರು ಇನ್ನೂ ಕೂಡ ಅದನ್ನು ಬದಲಿಸಿಲ್ಲ.
