ಶ್ರೀನಗರ : ಕಾಶ್ಮೀರದ ಪಹಲ್ಗಾಮ್ನಲ್ಲಿ ಮಂಗಳವಾರ ನಡೆದ ಭಯೋತ್ಪಾದಕ ದಾಳಿಯಲ್ಲಿ ಕನಿಷ್ಠ 26 ಜನರು ಸಾವನ್ನಪ್ಪಿದ್ದು. ಘಟನೆಯಲ್ಲಿ ಹೊಸದಾಗಿ ವಿವಾಹವಾದ ಭಾರತೀಯ ನೌಕಾಪಡೆಯ ಅಧಿಕಾರಿ, ಹರಿಯಾಣ ಮೂಲದ 26 ವರ್ಷದ ಲೆಫ್ಟಿನೆಂಟ್ ವಿನಯ್ ನರ್ವಾಲ್ ಕೂಡ ಬಲಿಯಾಗಿದ್ದಾರೆ.
ವಿನಯ್ ನರ್ವಾಲ್ ಕಳೆದ ಏ.16ರಂದು ಹಿಮಾಂಶಿ ಎಂಬುವವರ ಜೊತೆ ಮದುವೆಯಾಗಿ ಹನಿಮೂನ್ಗೆ ಎಂದು ಕಾಶ್ಮೀರ್ಗೆ ಬಂದಿದ್ದರು. ಆದರೆ ಉಗ್ರದಾಳಿಯಲ್ಲಿ ವಿನಯ್ ಸಾವನ್ನಪ್ಪಿದ್ದಾರೆ. ಮೇ 1 ರಂದು ತಮ್ಮ 27 ನೇ ಹುಟ್ಟುಹಬ್ಬವನ್ನು ಆಚರಿಸಲು ವಿನಯ್ ಎದುರು ನೋಡುತ್ತಿದ್ದರು, ಇದಕ್ಕಾಗಿ ಅವರ ಕುಟುಂಬವು ಅದ್ಧೂರಿ ಕಾರ್ಯಕ್ರಮವನ್ನು ಯೋಜಿಸಿತ್ತು.
ಇದನ್ನೂ ಓದಿ:ಕೇಂದ್ರ ಸರ್ಕಾರದ ವೈಪಲ್ಯ: ಮೋದಿ ಇಂದಿರಾ ಗಾಂಧಿಯಂತೆ ಕ್ರಮ ಕೈಗೊಳ್ಳಬೇಕು: ರಾಮಲಿಂಗರೆಡ್ಡಿ
ಕೊಚ್ಚಿಯಲ್ಲಿ ನೌಕಾ ಅಧಿಕಾರಿಯಾಗಿ ಕಾರ್ಯನಿರ್ವಹಿಸುತ್ತಿದ್ದ ವಿನಯ್ ನರ್ವಾಲ್ ತಮ್ಮ ಮದುವೆ ಮತ್ತು ಹುಟ್ಟುಹಬ್ಬದ ಆಚರಣೆಗಾಗಿ 40 ದಿನಗಳ ರಜೆ ತೆಗೆದುಕೊಂಡಿದ್ದರು. ಏಪ್ರಿಲ್ 4 ರಂದು ಹಿಮಾಂಶಿ ಜೊತೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದ ವಿನಯ್, ಏಪ್ರಿಲ್ 16 ರಂದು ಮಸ್ಸೂರಿಯಲ್ಲಿ ಮದುವೆ ಮಾಡಿಕೊಂಡಿದ್ದರು. ಮದುವೆಯ ನಂತರ, ಕುಟುಂಬವು ಏಪ್ರಿಲ್ 19 ರಂದು ಕರ್ನಾಲ್‌ನಲ್ಲಿ ಆರತಕ್ಷತೆಯನ್ನು ಮುಗಿಸಿ ಏಪ್ರೀಲ್ 21ರಂದು ಕಾಶ್ಮೀರಕ್ಕೆ ವಿಮಾನ ಹತ್ತಿದ್ದರು.
ಮೊದಲು ಸ್ವಿಜರ್ಲ್ಯಾಂಡ್ ಹೋಗಲು ಯೋಜನೆ ರೂಪಿಸಿದ್ದ ವಿನಯ್ ಅಲ್ಲಿಗೆ ಹೋಗಲು ಸೇನೆ ಅನುಮತಿ ನೀಡದ ಹಿನ್ನಲೆ ಕಾಶ್ಮೀರಕ್ಕೆ ಬಂದಿದ್ದರು. ಆದರೆ ಇದೀಗ ಪಹಲ್ಗಾಮ್ನಲ್ಲಿ ನಡೆದ ಉಗ್ರ ದಾಳಿಯಲ್ಲಿ ವಿನಯ್ ಸಾವನ್ನಪ್ಪಿದ್ದಾರೆ. ಮದುವೆಯಾಗಿ ಕೈಯಲ್ಲಿನ ಮೆಹಂದಿ ಅಳಿಸುವ ಮುನ್ನವೇ ಹಿಮಾಂಶಿ ಹಣೆಯಲ್ಲಿನ ಕುಂಕುಮವನ್ನ ಉಗ್ರರು ಅಳಿಸಿದ್ದಾರೆ. ವಿನಯ್ ಮೇ.01ರಂದು ತಮ್ಮ ಹುಟ್ಟುಹಬ್ಬ ಆಚರಿಸಿಕೊಂಡು ಮೇ.03ರಂದು ಪತ್ನಿಯೊಂದಿಗೆ ಕೊಚ್ಚಿಗೆ ತೆರಳಲು ನಿರ್ಧರಿಸಿದ್ದರು.
ಇದನ್ನೂ ಓದಿ :ಭೀಕರ ಉಗ್ರದಾಳಿ: IPL ಪಂದ್ಯದ ವೇಳೆ ಕಪ್ಪುಪಟ್ಟಿ ಧರಿಸಿ ಆಟವಾಡಲು ನಿರ್ಧಾರ
ವಿನಯ್ ನರ್ವಾಲ್ ಅವರ ಪಾರ್ಥೀವ ಶರೀರ ಬುಧವಾರ ಸಂಜೆ ಕರ್ನಾಲ್‌ನಲ್ಲಿರುವ ಅವರ ಹುಟ್ಟೂರಿಗೆ ತಲುಪಲಿದ್ದು, ಅಲ್ಲಿ ಕುಟುಂಬವು ಅವರ ಅಂತಿಮ ವಿಧಿಗಳನ್ನು ನೆರವೇರಿಸಲಿದೆ.
ವೈರಲ್ ಆಗಿರುವ ವೀಡಿಯೊವೊಂದರಲ್ಲಿ ವಿನಯ್ ಪತ್ನಿ ಹಿಮಾಂಶಿ, “ನಾನು ನನ್ನ ಪತಿಯೊಂದಿಗೆ ಭೇಲ್ ಪುರಿ ತಿನ್ನುತ್ತಿದ್ದೆ. ಒಬ್ಬ ವ್ಯಕ್ತಿ ಬಂದು ನೀವು ಮುಸ್ಲಿಂ ಎಂದು ಕೇಳಿದ. ಅವರು ನಿರಾಕರಿಸಿದಾಗ, ಆ ವ್ಯಕ್ತಿ ಅವರನ್ನು ಗುಂಡು ಹಾರಿಸಿ ಕೊಂದರು” ಎಂದು ಹೇಳುತ್ತಿರುವುದು ಕೇಳಿಬಂದಿದೆ.
ಘಟನೆ ಸಂಬಂಧ ಹರಿಯಾಣ ಮುಖ್ಯಮಂತ್ರಿ ನಯಾಬ್ ಸಿಂಗ್ ಸೈನಿ ಅವರು ಮೃತರ ಕುಟುಂಬಗಳಿಗೆ ಸಂತಾಪ ಸೂಚಿಸಿ, ಈ ಘಟನೆಯನ್ನು “ದುರದೃಷ್ಟಕರ” ಎಂದು ಬಣ್ಣಿಸಿದ್ದಾರೆ. “ಸರ್ಕಾರವು ತಮ್ಮ ಸದಸ್ಯರನ್ನು ಕಳೆದುಕೊಂಡ ಕುಟುಂಬಗಳೊಂದಿಗೆ ಒಗ್ಗಟ್ಟಿನಿಂದ ನಿಲ್ಲುತ್ತದೆ” ಎಂದು ಅವರು ಹೇಳಿದರು.
