ಮೈಸೂರು: ಬಸ್ ನಲ್ಲಿ ಕಂಡಕ್ಟರ್ ಇಲ್ಲದಿರುವ ಬಗ್ಗೆ ಅರಿವೇ ಇಲ್ಲದೆ ಕೆಎಸ್ ಆರ್ ಟಿಸಿ ಬಸ್ ಚಾಲಕನೋರ್ವ ಸುಮಾರು ಒಂದು ಕಿ.ಮೀ ದೂರ ಸಾಗಿ ನಗೆಪಾಟಲಿಗೀಡಾಗಿರುವ ಘಟನೆ ವಿರಾಜಪೇಟೆ ಹಾಗು ಮೈಸೂರು ಮಾರ್ಗ ಮಧ್ಯೆ ಸಂಚಾರದ ವೇಳೆ ನಡೆದಿದೆ.
ವಿರಾಜಪೇಟೆಯಿಂದ ಮೈಸೂರಿಗೆ ಟ್ರಿಪ್ ಹೋಗಬೇಕಾಗಿತ್ತು. ಬಸ್ ತುಂಬ ಪ್ರಯಾಣಿಕರು ಭರ್ತಿಯಾಗಿದ್ದರು. ಚಾಲಕನ ಸೀಟ್ ಮೇಲೆ ಕೂತ ಡ್ರೈವರ್ ಬಸ್ ಸ್ಟಾರ್ಟ್ ಮಾಡಿ ಮುಂದೆ ಸಾಗಿದ್ದಾನೆ, ಬಸ್ ನಲ್ಲಿದ್ದ ಪ್ರಯಾಣಿಕರು ಟಿಕೆಟ್ ಖರೀದಿಸಲು ಜೇಬಿನಲ್ಲಿದ್ದ ಹಣವನ್ನು ಸಿದ್ದಪಡಿಸಿಕೊಂಡು ತಮ್ಮ ಪಾಡಿಗೆ ತಾವಿದ್ದಾರೆ. ಆದರೇ, ಈ ನಡುವೆ ಇಷ್ಟೊತ್ತಾದರೂ ಬಸ್ ನಲ್ಲಿ ಪ್ರಯಾಣಿಕರಿಗೆ ಟಿಕೇಟ್ ನೀಡಲು ಕಂಡಕ್ಟರ್ ಬರದಿರುವುದನ್ನು ಕಂಡು ಪ್ರಯಾಣಿಕರು ಸುತ್ತಲು ಹುಡುಕಾಡಿದ್ದಾರೆ.
ಇದನ್ನೂ ಓದಿ: ಸೋತ ಮಾತ್ರಕ್ಕೆ ಮನೆಯಲ್ಲಿ ಕೂರುವುದಿಲ್ಲ ಎಂದ ನಿಖಿಲ್!
ಆಗ, ಬಸ್ ನಲ್ಲಿ ಕಂಡಕ್ಟರ್ ಇಲ್ಲದಿರುವ ಬಗ್ಗೆ ಅರಿವಾಗಿದೆ, ಕೂಡಲೇ ಈ ವಿಷಯವನ್ನು ಬಸ್ ನಲ್ಲಿದ್ದ ಪ್ರಯಾಣಿಕನೋರ್ವ ಚಾಲಕನ ಗಮನಕ್ಕೆ ತಂದಿದ್ದಾನೆ. ವಿಚಾರ ತಿಳಿದು ಗಾಬರಿಯಾದ ಚಾಲಕ ತಕ್ಷಣವೇ ಬಸ್ ನ್ನು ಮಾರ್ಗ ಮಧ್ಯೆ ರಸ್ತೆ ಪಕ್ಕದಲ್ಲಿ ನಿಲ್ಲಿಸಿ ನೋಡಿಕೊಂಡಿದ್ದಾನೆ.
ಪ್ರಯಾಣಿಕರು ಚಾಲಕನನ್ನು ಪ್ರಶ್ನಿಸಿ ಕಂಡಕ್ಟರ್ ಗೆ ಫೋನ್ ಮಾಡಿ ಎಂದಿದ್ದಾರೆ, ಕಂಡಕ್ಟರ್ ನಂಬರ್ ನನ್ನ ಬಳಿ ಇಲ್ಲ ಎಂದಿದ್ದಾನೆ, ಹೋಗಲಿ ಕಂಡಕ್ಟರ್ ಫೋನ್ ಮಾಡ್ತಾನೆ ಕಾಯೋಣ ಎಂದು ಪ್ರಯಾಣಿಕರು ಹೇಳಿದ್ದಾರೆ. ಅದಕ್ಕೆ ಅವನ ಬಳಿಯೂ ನನ್ನ ನಂಬರ್ ಇಲ್ಲ ಎಂದು ಚಾಲಕ ಉತ್ತರ ಕೊಟ್ಟಿದ್ದಾನೆ. ಈ ಮಾತುಕತೆ ನಡುವೆ ಬಸ್ ನಿಂತಿದ್ದ ಜಾಗಕ್ಕೆ ಸ್ಕೂಟಿಯಲ್ಲಿ ವೇಗವಾಗಿ ಬಂದ ಕಂಡಕ್ಟರ್ ನಗುನಗುತ್ತಾ ಬಂದಿಳಿದಿದ್ದಾನೆ. ಇದಾದ ಬಳಿಕ ಅಸಲಿ ವಿಷಯ ಬೆಳಕಿಗೆ ಬಂದಿದೆ.
ಈ ಚಾಲಕ ಮತ್ತು ನಿರ್ವಾಹಕರಿಬ್ಬರು ಇಂದೇ ಹೊಸದಾಗಿ KSRTC ಸಾರಿಗೆಗೆ ಕೆಲಸಕ್ಕೆ ಸೇರಿಕೊಂಡಿದ್ದು ಒಬ್ಬರಿಗೊಬ್ಬರು ಪರಿಚಯ ಮಾಡಿಕೊಳ್ಳಲು ಸಹ ಸಮಯವಿಲ್ಲದೇ ಮೊದಲ ದಿನವೇ ವಿರಾಜಪೇಟೆ to ಮೈಸೂರು ಮಾರ್ಗದ ಬಸ್ಗೆ ಹತ್ತಿದ್ದಾರೆ ಅಷ್ಟರಲ್ಲಿ ಇಷ್ಟೆಲ್ಲ ನಡೆದಿದೆ ಎಂದು ತಿಳಿದು ಪ್ರಯಾಣಿಕರು ನಕ್ಕು ನಕ್ಕು ಸುಸ್ತಾಗಿದ್ದಾರೆ.
