ಬೆಂಗಳೂರು : ನ್ಯೂಜಿಲೆಂಡ್ ವಿರುದ್ಧದ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ 190 ರನ್ಗಳ ಭರ್ಜರಿ ಗೆಲುವು ಸಾಧಿಸಿತು. ಆ ಮೂಲಕ ಭಾರತವನ್ನು ಹಿಂದಿಕ್ಕಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿತು.
ಪುಣೆಯಲ್ಲಿ ನಡೆದ ವಿಶ್ವಕಪ್-2023 ಟೂರ್ನಿಯ 32ನೇ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ದಕ್ಷಿಣ ಆಫ್ರಿಕಾ ನಿಗದಿತ 50 ಓವರ್ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 357 ರನ್ ಕಲೆಹಾಕಿತು. 358 ರನ್ಗಳ ಬೃಹತ್ ಟಾರ್ಗೆಟ್ ಬೆನ್ನಟ್ಟಿದ ಕಿವೀಸ್ ಹರಿಣಗಳ ಮಾರಕ ಬೌಲಿಂಗ್ ದಾಳಿಗೆ ನಲುಗಿತು.
35.3 ಓವರ್ಗಳಲ್ಲಿ ಕೇವಲ 167 ರನ್ಗಳಿಸುವ ಮೂಲಕ ಸರ್ವಪತನ ಕಂಡಿತು. ನ್ಯೂಜಿಲೆಂಡ್ ಪರ ಫಿಲಿಪ್ಸ್ ಅರ್ಧಶತಕ (60) ಸಿಡಿಸಿದ್ದು ಬಿಟ್ಟರೆ ಯಾವೊಬ್ಬ ಬ್ಯಾಟರ್ ಸಹ ಉತ್ತಮ ಪ್ರದರ್ಶನ ನೀಡಲಿಲ್ಲ. ಆರಂಭಿಕರಾದ ಕಾನ್ವೆ 2, ಯಂಗ್ 33, ರಚಿನ್ ರವೀಂದ್ರ 9, ಮಿಚೆಲ್ 24 ಹಾಗೂ ನಾಯಕ ಲ್ಯಾಥಮ್ 4 ರನ್ ಗಳಿಸಿದರು. ಹೀಗಾಗಿ, ಕಿವೀಸ್ ಹೀನಾಯ ಸೋಲು ಅನುಭವಿಸಿತು. ದಕ್ಷಿಣ ಆಫ್ರಿಕಾ ಪರ ಮಹಾರಾಜ್ 4, ಜಾನ್ಸೆನ್ 3, ಕೊಯೆಟ್ಟಿ 2 ಹಾಗೂ ರಬಾಡ ಒಂದು ವಿಕೆಟ್ ಪಡೆದರು.
ಡಿ ಕಾಕ್, ಡಸ್ಸೆನ್ ಬೊಂಬಾಟ್ ಆಟ
ಮೊದಲು ಬ್ಯಾಟಿಂಗ್ ಮಾಡಿದ ದಕ್ಷಿಣ ಆಫ್ರಿಕಾ ಪರ ಕ್ವಿಂಟನ್ ಡಿ ಕಾಕ್ ಹಾಗೂ ಡಸ್ಸೆನ್ ಬೊಂಬಾಟ್ ಆಟ ಪ್ರದರ್ಶಿಸಿ ಇಬ್ಬರೂ ಶತಕ ಸಿಡಿಸಿ ಮಿಂಚಿದರು. ಡಿ ಕಾಕ್ 3 ಭರ್ಜರಿ ಸಿಕ್ಸರ್ ಹಾಗೂ 10 ಬೌಂಡರಿಗಳೊಂದಿಗೆ 114, ಡಸ್ಸೆನ್ 5 ಬೊಂಬಾಟ್ ಸಿಕ್ಸರ್ ಹಾಗೂ 9 ಬೌಂಡರಿಗಳ ನೆರವಿನೊಂದಿಗೆ 133, ಡೇವಿಡ್ ಮಿಲ್ಲರ್ 4 ಸಿಕ್ಸರ್ ಹಾಗೂ 2 ಬೌಂಡರಿ ನೆರನೊಂದಿಗೆ 53 ಸಿಡಿಸಿದರು.
