ತಮಿಳಿನ ಖ್ಯಾತ ನಟ, ಸೂಪರ್ ಸ್ಟಾರ್ ವಿಕ್ರಮ್ಗೆ ಲಘು ಹೃದಯಾಘಾತವಾಗಿದೆ. ಕೋಟ್ಯಂತರ ಅಭಿಮಾನಿಗಳ ನೆಚ್ಚಿನ ನಟ ವಿಕ್ರಮ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಸುದ್ದಿ ಕೇಳಿದ ತಕ್ಷಣ ಅವ್ರ ಅಪಾರ ಅಭಿಮಾನಿ ಬಳಗ ಆತಂಕಗೊಂಡಿದೆ. ಚೆನ್ನೈನ ಕಾವೇರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರೋ ವಿಕ್ರಂಗೆ ಏನಾಗಿದೆ ಅಂತೀರಾ..?
ವಿಕ್ರಮ್ಗೆ ಹೃದಯಾಘಾತ.. ಆತಂಕದಲ್ಲಿ ಅಭಿಮಾನಿ ಬಳಗ
ICUನಲ್ಲಿ ಚಿಕಿತ್ಸೆ.. ಚಿಕ್ಕ ಸರ್ಜರಿ.. ನಾಳೆಯೇ ಡಿಸ್ಚಾರ್ಜ್ ಸಾಧ್ಯತೆ
ಹೃದಯಾಘಾತದಿಂದ ನಮ್ಮನ್ನೆಲ್ಲಾ ಅಗಲಿದ ಅಪ್ಪುವಿನ ಆ ಕರಾಳ ದಿನವನ್ನು ಇಂದಿಗೂ ಮರೆಯೋಕೆ ಆಗ್ತಿಲ್ಲ. ಹಾರ್ಟ್ ಅಟ್ಯಾಕ್ ಅನ್ನೋ ಪದ ಕೇಳ್ತಿದ್ದ ಹಾಗೆ ಒಂದು ಕ್ಷಣ ಮೈಜುಮ್ ಅನ್ನುತ್ತೆ. ವಯಸ್ಸಲ್ಲದ ವಯಸ್ಸಲ್ಲಿ ನಮ್ಮನ್ನೆಲ್ಲಾ ಬಿಟ್ಟು ಹೊರಟು ಹೋದ ಯುವರತ್ನ ಸಖತ್ ಫಿಟ್ ಅಂಡ್ ಫೈನ್ ಆಗೇ ಇದ್ದವ್ರು. ಅದೇ ರೀತಿ ತಮಿಳಿನ ಸೂಪರ್ ಸ್ಟಾರ್ ಚಿಯಾನ್ ವಿಕ್ರಮ್ಗೆ ಲಘು ಹೃದಯಾಘಾತದ ಸುದ್ದಿ ಕೇಳಿ ಇಡೀ ಭಾರತೀಯ ಚಿತ್ರರಂಗ ಬೆಚ್ಚಿ ಬಿದ್ದಿತ್ತು. ಮತ್ತೆ ಅರೆ ಕ್ಷಣ ಶಾಕ್ಗೆ ಒಳಗಾಗಿತ್ತು.
ಎದೆ ನೋವು ಕಾಣಿಸಿಕೊಂಡಿದ್ರಿಂದ ನಿನ್ನೆಯೇ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಚೆನ್ನೈನ ಕಾವೇರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ವಿಕ್ರಮ್, ಸದ್ಯ ಆರೋಗ್ಯವಾಗಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ. ಇಂದಿನ ತರುಣರೂ ಕೂಡ ನಾಚುವ ರೀತಿಯಲ್ಲಿ ಫಿಟ್ ಆಗಿರೋ ವಿಕ್ರಮ್ ಆಸ್ಪತ್ರೆಗೆ ದಾಖಲಾಗಿರೋ ಸುದ್ದಿ ಕೇಳಿ ಅಭಿಮಾನಿಗಳು ಕೂಡ ಆತಂಕಗೊಂಡಿದ್ರು. 56ರ ಹರೆಯದಲ್ಲೂ ಸಖತ್ ಫಿಟ್ ಆಗಿರೋ ವಿಕ್ರಮ್ಗೆ ದಿಢೀರ್ ಅರೋಗ್ಯ ಏರುಪೇರಾದ ಬಗ್ಗೆ ಎಲ್ಲರನ್ನ ಚಿಂತೆಗೀಡುಮಾಡಿದೆ.
ಸದ್ಯ ನಟ ವಿಕ್ರಮ್ಗೆ ಆಂಜಿಯೋಪ್ಲಾಸ್ಟಿ ಮಾಡಲಾಗಿದ್ದು, ಐಸಿಯುನಲ್ಲಿರಿಸಲಾಗಿದೆ. ಸ್ಟಂಟ್ ಅಳವಡಿಕೆ ನಂತ್ರ ವಿಶ್ರಾಂತಿ ಪಡೆಯುತ್ತಿರೋ ವಿಕ್ರಮ್, ಇಂದು ತಡರಾತ್ರಿ ಅಥ್ವಾ ನಾಳೆ ಡಿಸ್ಚಾರ್ಜ್ ಆಗೋ ಸಂಭವವಿದೆ. ಈ ಸುದ್ದಿ ಕೇಳಿ ನಿರಾಳಗೊಂಡಿರೋ ಕೋಟ್ಯಂತರ ಅಭಿಮಾನಿಗಳು ಹಾಗೂ ಚಿತ್ರರಂಗದ ಕಲಾವಿದರು, ಪ್ರಾರ್ಥನೆ ಫಲಿಸಿತು ಅಂತ ನಿಟ್ಟುಸಿರು ಬಿಟ್ಟಿದ್ದಾರೆ.
ಮಣಿರತ್ನಂ ನಿರ್ದೇಶನದ 500 ಕೋಟಿ ಭಾರೀ ಬಜೆಟ್ ಚಿತ್ರ ಪೊನ್ನಿಯನ್ ಸೆಲ್ವನ್-1ರಲ್ಲಿ ವಿಕ್ರಮ್ ನಟಿಸಿದ್ದು, ಟೀಸರ್ ಕೂಡ ಲಾಂಚ್ ಆಗಿದೆ. ಇವೆಂಟ್ನಲ್ಲಿ ಭಾಗಿಯಾಗಬೇಕಿದ್ದ ವಿಕ್ರಮ್, ಆಸ್ಪತ್ರೆಯಲ್ಲಿ ರೆಸ್ಟ್ ಮಾಡುವಂತಾಗಿದೆ. ಇನ್ನು ನಮ್ಮ ಕೆಜಿಎಫ್ ಪೋರಿ ಶ್ರೀನಿಧಿ ಶೆಟ್ಟಿ ಜೊತೆಯಲ್ಲಿ ಕೋಬ್ರಾ ಸಿನಿಮಾ ತಯಾರಾಗಿದ್ದು, ರಿಲೀಸ್ಗೆ ರೆಡಿಯಾಗಿದೆ.
ಪಾತ್ರಗಳಿಗಾಗಿ ಪದೇ ಪದೆ ತೂಕ ಇಳಿಸಿಕೊಳ್ಳುವ ಹಾಗೂ ಏರಿಸಿಕೊಳ್ಳೋ ವಿಕ್ರಮ್, ಸಿಕ್ಕಾಪಟ್ಟೆ ಡಯೆಟ್ ಮಾಡ್ತಾರೆ. ಬಹುಶಃ ಅದರ ಎಫೆಕ್ಟ್ ಹೀಗಾಗಿರಬಹುದು ಅನ್ನೋದು ಹಲವರ ಅಭಿಪ್ರಾಯ. ಮಗ ಕೂಡ ಹೀರೋ ಆಗಿ ಲಾಂಚ್ ಆಗಿದ್ದು, ಅಕ್ಷರಶಃ ಆತಂಕ ಮೂಡಿತ್ತು. ಆದ್ರೀಗ ಆ ಆತಂಕ ದೂರಾಗಿದ್ದು, ಚೇತರಿಸಿಕೊಳ್ತಿದ್ದಾರೆ ವಿಕ್ರಮ್.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯೂರೋ, ಪವರ್ ಟಿವಿ
