ಬೆಂಗಳೂರು: ಇಂದಿನ ವಿಧಾನಸಭಾ ಕಲಾಪ ಆಡಿಯೋ ವಾರ್ನಲ್ಲೇ ಮುಗಿಯಿತು. ಕಲಾಪದ ಆರಂಭದಲ್ಲಿ ಮಾತನಾಡಿದ ಸಭಾಪತಿ ರಮೇಶ್ ಕುಮಾರ್ ಸಿಎಂ ಕುಮಾರಸ್ವಾಮಿ ರಿಲೀಸ್ ಮಾಡಿದ ಆಡಿಯೋ ಕುರಿತು ಪ್ರಸ್ತಾಪಿಸಿದರು.
ಬಿಜೆಪಿ ರಾಜ್ಯಾಧ್ಯಕ್ಷ ಹಾಗೂ ಗುರುಮಿಠ್ಕಲ್ ಜೆಡಿಎಸ್ ಶಾಸಕ ನಾಗನಗೌಡ ಅವರ ಪುತ್ರ ಶರಣಗೌಡ ನಡುವೆ ನಡೆದಿದೆ ಎನ್ನಲಾಗಿರುವ ಅಡಿಯೋ ಕ್ಲಿಪ್ ಒಂದನ್ನು ಸಿಎಂ ಬಜೆಟ್ ದಿನ ರಿಲೀಸ್ ಮಾಡಿದ್ದರು. ಈ ಆಡಿಯೋದಲ್ಲಿ ಸ್ಪೀಕರ್ ರಮೇಶ್ ಕುಮಾರ್ ಹಾಗೂ ಪ್ರಧಾನಿಯವರ ಹೆಸರೂ ಕೇಳಿಬಂದಿತ್ತು. ಈ ಕುರಿತು ಬೇಸರ ವ್ಯಕ್ತಪಡಿಸಿದ ಸ್ಪೀಕರ್ ಅವರು ‘ಚಾರಿತ್ರ್ಯ ವಧೆ ಸಾವಿಗಿಂತ ಕ್ರೂರ’ ಎಂದು ಆಡಿಯೋದಲ್ಲಿ ತನ್ನ ಹೆಸರು ಕೇಳಿ ಬಂದಿರುವ ಬಗ್ಗೆ ಭಾವುಕರಾದರು. ಬಳಿಕ ಈ ಆಡಿಯೋ ಕ್ಲಿಪ್ ಬಗ್ಗೆ ಸಮಗ್ರ ತನಿಖೆ ನಡೆಸಬೇಕು” ಎಂದು ಸಿಎಂ ಅವರಿಗೆ ಸಲಹೆ ನೀಡಿದ್ರು.
ಸ್ಪೀಕರ್ ಅವರ ಸೂಚನೆಗೆ ಒಪ್ಪಿಗೆ ಸೂಚಿಸಿದ ಸಿಎಂ ಆಡಿಯೋ ಪ್ರಕರಣವನ್ನು ಎಸ್ಐಟಿಗೆ ತನಿಖೆಗೆ ವಹಿಸುವುದಾಗಿ ಹೇಳಿದರು. ಎಸ್ಐಟಿ ತನಿಖೆಗೆ ಬಿಜೆಪಿ ತೀವ್ರ ವಿರೋಧ ವ್ಯಕ್ತಪಡಿಸಿತು. ಚಿಕ್ಕನಾಯಕನ ಹಳ್ಳಿ ಶಾಸಕ ಮಾಧುಸ್ವಾಮಿ ಸೇರಿದಂತೆ ಬಿಜೆಪಿ ನಾಯಕರು ಎಸ್ಐಟಿ ತನಿಖೆಯಲ್ಲಿ ತಮಗೆ ನಂಬಿಕೆ ಇಲ್ಲ. ನಿಮ್ಮ ನೇತೃತ್ವದಲ್ಲೇ ತನಿಖೆಯಾಗಲಿ ಎಂದು ಸ್ಪೀಕರ್ ರಮೇಶ್ ಕುಮಾರ್ ಅವರಲ್ಲಿ ಮನವಿ ಮಾಡಿದರು. ಆದರೆ ರಮೇಶ್ ಕುಮಾರ್ ಅವರು ಈ ಆಡಿಯೋ ವಿಚಾರದಲ್ಲಿ ತನ್ನ ಹೆಸರೂ ಕೂಡ ಪ್ರಸ್ತಾಪವಾಗಿದೆ. ನಾನು ಈ ವಿಚಾರವನ್ನು ತನಿಖೆ ಮಾಡಲು ಆಗಲ್ಲ. ನಾನು ಸರ್ಕಾರಕ್ಕೆ ಸಲಹೆಯನ್ನು ನೀಡಬಹುದಷ್ಟೇ ಎಂದರು. 15 ದಿನದೊಳಗೆ ಈ ವಿಚಾರದ ಬಗ್ಗೆ ತನಿಖೆಯಿಂದ ಸ್ಪಷ್ಟನೆ ಸಿಗಬೇಕು ಎಂದರು. ಎಸ್ಐಟಿ ತನಿಖೆಗೆ ಒಪ್ಪಿಸುವುದಾಗಿ ಸಿಎಂ ಘೋಷಿಸಿದ್ರು.
ಬಿಜೆಪಿ ಮಾತ್ರ ಪಟ್ಟು ಸಡಿಲಿಸದೆ ಎಸ್ಐಟಿ ತನಿಖೆಗೆ ವಿರೋಧ ವ್ಯಕ್ತಪಡಿಸಿತು. ಹೀಗೆ ‘ಆಡಿಯೋ ವಾರ್’ನಲ್ಲೇ ಕಲಾಪ ಅಂತ್ಯವಾಯಿತು. ಕೊನೆಯಲ್ಲಿ ಸಿಡಿಯೊಂದನ್ನು ಪ್ರದರ್ಶಿಸಿದ ಶಾಸಕ ರೇಣುಕಾಚಾರ್ಯ, ‘ಇದು 40 ಕೋಟಿ ಸಿಡಿ’ ಎಂದು ಹೇಳಿ ಸ್ಪೀಕರ್ಗೆ ಸಿಡಿ ನೀಡಿ ಈ ಬಗ್ಗೆಯೂ ತನಿಖೆಯಾಗಲಿ ಎಂದು ಒತ್ತಾಯಿಸಿದ್ರು. ನಂತರ ಸ್ಪೀಕರ್ ನಾಳೆ ಬೆಳಗ್ಗೆ 11ಗಂಟೆಗೆ ಕಲಾಪ ಮುಂದೂಡಿದರು.
