ಶಿಮ್ಲಾ: ಪಂಚ ರಾಜ್ಯ ಚುನಾವಣೆಯಲ್ಲಿ ಭರ್ಜರಿ ಪ್ರಚಾರದಲ್ಲಿ ತೊಡಗಿದ್ದ ರಾಹುಲ್ ಗಾಂಧಿ ಈಗ ಶಿಮ್ಲಾದಲ್ಲಿ ಸಹೋದರಿ ಜೊತೆ ರಜೆಯನ್ನು ಅನುಭವಿಸುತ್ತಿದ್ದಾರೆ.
ಸಹೋದರಿ ಪ್ರಿಯಾಂಕ ಗಾಂಧಿ ವಾದ್ರಾ ಹಾಗೂ ಅವರ ಮಕ್ಕಳೊಂದಿಗೆ ರಾಹುಲ್ ಗಾಂಧಿ ಶಿಮ್ಲಾದಲ್ಲಿ ರಜೆಯ ಸಮಯವನ್ನು ಆನಂದಿಸಿದ್ರು. ದಾರಿ ಮಧ್ಯೆ ಸೋಲನ್ ಜಿಲ್ಲೆಯ ಡಾಬಾವೊಂದರಲ್ಲಿ ಒಂದಷ್ಟು ಸಮಯ ಕಳೆದ ಕಾಂಗ್ರೆಸ್ ಅಧ್ಯಕ್ಷ ಮ್ಯಾಗಿ ನೂಡಲ್ಸ್ ಮತ್ತು ಟೀ ಸವಿದಿದ್ದಾರೆ. ರಾಹುಲ್ಗಾಂಧಿ ಡಾಬಾ ಬಳಿ ಬಂದಿರುವುದನ್ನು ಅರಿತ ಕೂಡಲೇ ಮಹಿಳೆಯರೂ ಸೇರಿದಂತೆ ಜನ ಕಾಂಗ್ರೆಸ್ ಅಧ್ಯಕ್ಷರನ್ನು ನೋಡೋಕೆ ಬಂದಿದ್ರು. ಮೂರು ರಾಜ್ಯಗಳಲ್ಲಿ ಕಾಂಗ್ರೆಸ್ ಗೆಲುವಿಗೆ ಜನ ಶುಭಾಶಯ ತಿಳಿಸಿದ್ರು.
ತಾನು ಖಾಸಗಿ ಕೆಲಸಕ್ಕಾಗಿ ಬಂದಿದ್ದೇನೆ ಅಂತ ಹೇಳಿರೋ ರಾಹುಲ್ಗಾಂಧಿ ಛರಬ್ರಾ ಹೊಟೇಲ್ನಲ್ಲಿ ಉಳಿದುಕೊಂಡಿದ್ದಾರೆ. ಹಿಮಾಚಲ ಪ್ರದೇಶ ಕಾಂಗ್ರೆಸ್ ಅಧ್ಯಕ್ಷ ಸುಖ್ವಿಂದರ್ ಈ ಕುರಿತು ಪ್ರತಿಕ್ರಿಯಿಸಿದ್ದು, ರಾಹುಲ್ಗಾಂಧಿ ಆಗಮನದ ಕುರಿತು ಯಾವುದೇ ಅಧಿಕೃತ ಮಾಹಿತಿ ಇಲ್ಲ ಎಂದಿದ್ದಾರೆ. ಮಧ್ಯಪ್ರದೇಶ, ರಾಜಸ್ಥಾನ ಹಾಗೂ ಛತ್ತೀಸ್ಗಡ್ನ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ ಜಯಭೇರಿ ಬಾರಿಸಿತ್ತು.
